1 Tama nosali Godigo Jekopbolo te po wai, “Nage hogodama, tama nage te Betelba pelama, tama nage teba osogo bidigi pao,” wali. “Tama nago te Godibolo ofa yabo te alta sai me deli nigao, te God nageba pedelali, te naga ama Iso dali wi ebaso soali sogo, te God nageba pedelai,” wali. * Gag 28:11-17 2 Tialima, Jekopgo te aga we waibolo, me te augwali dali bidaluali we bidi tigidalibolo wai, “Dagego duga tibo god dabe tigidali te sela sąyao. Dage te wę bugagia paluama, tama meda meni yai ugwa naga muao,” wai. 3 “Te dago te bulu taga peyu, te da Betel teba holoyu, tama paibao. Tama eno te Godibolo te alta me deli nigaibao. Agai ena te sęgę elalubo sogo tau sali, tama ena menaba pali, teba aga ena dali bidali,” wali. 4 Tialima, augwaligo te augwa tibo god dabe tigidali te Jekopbolo mawai. Tama te odode walali ring dabe me te augwaligo agabolo mani. Tama Jekopgo te nai dabe tigidali te Sekem pąde te genuai ni page dologode pubulali. 5 Jekop dali aga ogomani augwali pepela wali. Tama Godigo te Sekem hanu pąde bidalubo we bidi augwaliba te genuai wi pedalumainu ilama, tama augwaligo te Jekop dali me boi hwįabo homu eyu, pobeasa pabeo. 6 Tama Jekop aga hani dali augwali tigidali te bulu Lusba pali, te bulu gasa nogi me Betel wabo, te Kenan tǫ pedai badu elalubo buluba tama pali. 7 Tama agai te alta sai me deli nigilama, tama te bulu nogi poali, te Betel God da wali, magi baso meni, God aga digi aga te Jekopbolo waselai, te aga amade wi elama soali, te sogo aga ola mani.

8 Tama Debora, te Rebekago sę polobadu yali we, aga isai, tama augwaligo aga te Betelde te genuai ni dologode pubulai. Tama augwaligo te ni nogi poali, ‘Tede gela wali ni dao,’ te po wai.

9 Te Jekop te Mesopotemiade bidali ma asobo sogode, God te agaba ma pedelama, tama agaba dwagi yai sę pedelabo po te agabolo mawai. 10 Tama tiyu, Godigo agabolo te po wai, “Nago nogi Jekop dao. Tiali goli, megi da, te augwaligo nago nogi te Jekop ma nogi me wagobeo. Augwaligo nago nogi te Israel nogi yaibao,” wali. Tama Godigo aga nogi te Israel poali. * Gag 32:28 11 Tama Godigo agabolo te po wali, “Ena da, te Tigidali Bomo Mu Elalubo God dao. Nago te wai hauwa pedalumainu yao. Te nage hauwa we bidigo wąį hani pedelama, tama te bidi dabe meba augwali te gavman tuni bidi pedelaibao. 12 Te tǫ eno polobadu te Abrahambolo me Aisakbolo mani tǫ, te megi eno nagebolo mobao. Tama eno nago hani wąį dabebolo me mawaibao.” * Gag 17:4-8 13 Godigo po miani silama, tama agai Jekop taga peyu, aga te dagaluba ma pai.

14 Tialima, Jekopgo te Godigo aga dali po miani pesagede te bobage masigi me deli selama, te ugwaba dodolama, muani. Tama agai te masigi daiba ugwadu te wain wę me, wel dali si te ofa tiwai elama gelali. 15 Tama tiyu, te bulu agai te nogi Betel ma poali. * Gag 28:18-19

16 Augwaligo te Betel taga peyu, tama augwali te Efrata teba painu yali. Augwali pedubadi, tama te Reselgo wai tega pabo sogo te pedelali. Tama aga dene genuai mu sai. 17 Te aga te tiwai genuai dene sabo sogo, te aga tau sabo wego agabolo te po wali, “Nage wi me elamuo. Te gasa ogwa wai me dao,” wali. 18 Tama pąde Resel mu isainu ebode, tama agai te wai nogi Benoni poali. * Te Hibru pogo te nogi Benoni te page elalubao, te “Eno denede sali ogwa da,” te wabo. Tiali goli, aga ayago aga nogi Benjamin poai. † Te Hibru pogo te nogi Benjamin te page elalubao, te “Eno dolo nogo badu bidibo ogwa da,” te wabo. 19 Resel isibaso, tama augwaligo aga te Efrataba pabo sunumide pubulali, te Betlehem hanu pąde dao. 20 Tama Jekopgo aga pubulali gų page homugo konealumainu tama masigi me deli dodolali. Tama te Reselgo dąį ilali te megi me elalubo dao. 21 Tama Israel pelama, tama te gasa bagego augwa sipsip tonalumainu eyu, bobage masigi be sęwai madi, te bulu taga soyu, tama dwasianu pelama gana tama aga bidabo pesage nigai. 22 Israel tede bididubadi, tama Rubengo te aga ayago sę ebo we Bilha dali pagela piali. Tama Israelgo te tiali po odali.

Te Jekopgo ogwa dabe te nogo si olama, sągągo si elaluai. 23 Te Leago wai dabe e dao, Ruben, te Jekopgo gomunai ogwa da, tama Simeon, me Livai, me Juda, me Isakar, me Sebulun. 24 Reselgo wai si elaluali, Josep me Benjamin. 25 Bilha te Reselgo sę ebo wego te wai si elaluali, Dan me Naptali. 26 Silpa, te Leago sę ebo wego te wai si elaluali, Gat me Aser. Jekop te Mesopotemia tǫde bidiyu, tama agai te wai dabe augwali ame nai.

27 Jekop te aga aya Aisak bidibo digi, te moni ni sili nogi Mamre, teba sabolali. Te bidi mebago te bulu nogi te Kiriat Arba nogiyu, tama nosali te gasa nogi me elaluali, te Hebron nogi yali. Te bulu te Abraham me Aisak te polobadu bidai bulu dao. * Gag 13:18 28 Te Jekop aga Aisak dali nosali bidada peyu, tama Aisak te kibu be 180 bida silama, tama aga isai dao. 29 Aga te monu dabe mu elama, tama mobo kegebo silama, tama aga isali hani bage dali bidigi pai. Tama aga ogwa si, Iso me Jekop, augwali sigo aga pubulai dao.