1 Augwaligo te sisi yai sipsip nisi, me mama yai sipsip nisigo nigali hobi te augwaligo selama, tama te gasa wiegi yai ugwa te pris dabe augwaligo gudabo ugwa au ilama, te pris dabe augwaligo te Tedali Gasagi Yai Be Habu, te be habuba pelama, te pris sę ebo sogo te ugwa muani. Tama augwaligo te Genuai Bidigo Mosesbolo wali po gilama te Arongo pris sę eyu muabo ugwa nigai dao. 2 Augwaligo te wiegi yai ugwago te tobolu bidi pris gudabo wiegi yai ugwa nigilama, tama augwaligo te gol hobigo au ilama, tama te sisi sipsip nisigo, me mama sipsip nisigo nigai. 3 Augwaligo te gol hamago haluama, tama te pepa yabe tiwai pedelai. Tama te gol te hwą gego bugagia pedama, tama hobi tiwai te golgo nigali. Tama augwaligo te ugwa hobolo dwasianu gol hobi tiwai dali, te gasa haniani hobi dabe dali gelali, tama sisi hobigo me mama hobigo badi, tama togolama hobolai, te tobage sę mu koneai bidigo ebo sę tiwai naga tama yai. 4 Tama augwaligo te nagede abebolabo kukulu si te ugwago nigilama, tama ugwago digi ma hobolai. 5 Tama augwaligo wiegi yai ugwa pedai selama, tama te sesegedu bagulabo kukulu, te haliga tiwai kukulu te ugwago nigai. Tama augwaligo te gasa haniani hobi dabe selama, tama tede au ilali, te Genuai Bidigo Mosesbolo wali po gilama te tiwai sę yai dao. 6 Tama augwaligo te masigi konilian si te sisi ela munama, tama Jekopgo ogwa 12 te augwali nogi te masigi side asęnama togwali. Tama te masigi si augwaligo te dwasianu golde kęnanio. 7 Tama augwaligo te masigi name si te nagede muani te ugwago nigali kukulude kęnani, te Genuai Bidigo Mosesbolo wali po gilama tama tiai. Tama te masigi sigo te Israel hani 12 te hani sa muai dao, te Genuai Bidigo augwalide sesemane sogo homugo kone palomainogo eyu yali.

8 Tama augwaligo te hagawiade muabo ugwa te tobolu bidi prisgo gasa ugwa te tiwaigo naga nigai, te tobage sę ebo koneai bidigo ebo tiwai naga nigai. Augwaligo te ugwa te golgo nigai hobigo me, te gasa haniani hobigo me, tama au ilama, nigalio. 9 Tama augwaligo te ugwa bobage yali me, te genuai me, te bugagia tomode sugunama, te usususi yali te nedali, 22 sentamita teba sabolai. 10 Tama augwaligo te gasa wiegi yai masigi hani me si me si kęnani. Te hasia polali hani augwaligo te masigi hani rubi, me topas, me ganet, te tama masigi bolo podolama kęnai. 11 Tama te hani side augwaligo te masigi emeral, me sapaia, me daimon, te tama masigi dabe kęnai. 12 Tama te hani me sela te masigi tekois, me aget, me ametis, te tama hani masigi augwaligo kęnani. 13 Tama te hani me si me side te augwaligo te masigi hani beril, me konilian, me jaspa, te tama masigi augwaligo kęnani. Augwaligo te deli deli masigide te dwasianu gol au ilabo dąų walobo nai muani, tama nosali augwaligo te masigi dabe te ugwa daide, kęnai dao. 14 Te tigidali masigi nogo si olama sągą me badu si, te masigi deli delide augwaligo te Jekopgo ogwa nogi deli deli asęsę pali, te tigidali Israel hani sa muyu, tiai dao.

15 Tama augwaligo te wiegi yai golgo te sen si nigali, te hagawiade muabo ugwa dąų olama, tolalumainogo tama tiwai dao. 16 Tama augwaligo te au ilibo gol si nigibadi, te ring gol si me nigai. Tama te ring si te hagawiade muabo ugwa dage si badu te nai muai. 17 Tama augwaligo te sen gol deli deligo sabi te ring sigo kęnai dao. 18 Tama augwaligo sen gol deli deligo gasa sabi te au yai gol sigo kęani, tama augwaligo te au yali nai te ugwa tolalubo kukulude kęnai dao. 19 Tama augwaligo te ring me si ma nigilama, tama te sabi si dabe aiyadu te hagawiade dąų wali, te genuai ugwa pąde te kęnai dao. 20 Tama augwaligo te ring me si ma nigali, tama te kukulugo te ugwa kęalubo madi kęniyu, te gasa wiegi yai kukulugo te tabi bagulali pąde kęai. 21 Tama augwaligo sisi yai string bono sobadi, tama te ring si te hagawiade elalubo ugwa te ring si sobadi elama, te genuai ugwaba kęai. Tama te hagawiade muani ugwa te kukulude dąų olama, tama me tulaluidali weyu dąų wai. Augwaligo te Genuai Bidigo Mosesbolo po walali gilama wali peyu, te tiwai sę yalio.

22 Tama augwaligo husugu hobi selama, tama te bobage gudubo ugwa te holobo ugwa dali daganama hobolalio. 23 Tama augwaligo te tobolu muabo madi sesege badu te dedage dąų olama hobolali, te ugwa dedage peda pelama, genuai me idali weyu. 24-26 Tama augwaligo gasa haniani hobi dabe selama, tama nai meba te ni pomigranet du tiwai hobolai. Tama augwaligo dwasianu belo te wiegi yai golgo nigai. Tama augwaligo te ni pomigranet du me, te belo me, te tobolu bidi prisgo gudabo ugwa aiyadu sabide walama hobolai. Augwaligo te deli deli gol belo te ni pomigranet du dabe tomo tomode te walalumainogo hobolama walai. Augwaligo te tiwai sę te Genuai Bidigo Mosesbolo po wali gilama tama tiai dao.

27-29 Augwaligo te Arongo holobo ugwa me, te agai ogomanigo holobo ugwa me nigibadi, tama te tobolude bagulabo ugwa pedai dabe me, tama te pęwadage belibo trausis dabe me, tama te mǫ tiwai kukulu dabe me, te tama nai nigai. Te augwaligo wiegi yai name ugwa selama, tama te nai dabe nigai. Tama augwaligo gasa haniani hobi selama, tama te mǫ tiwai nigali kukulude hobolama, wiegi yai au ilali, te Genuai Bidigo Mosesbolo po wali gilama wali peyu, te tiwai sę yai. 30 Tama augwaligo te medal te wiegi yai golgo nigali, tego te het pris bidi te Genuai Bidigo bidi da olama sa muani. Augwaligo po me deli agade asęyu te tiwai po wai, “Te Genuai Bidigo Tedali Gasagi Yai Nai da.” Te po wai. 31 Tama augwaligo husugu yai hobi bono selama, tama augwaligo te tobolude muani ugwade te medal kęnani, te Genuai Bidigo Mosesbolo wali po tiwai gilama tama tiwai sę yai dao.

32 Tama te ugwa be sę yali tigidali silai. Tama te Israel dabe augwaligo te Genuai Bidigo te Mosesbolo po wali gilama te tigidali nai nigalio. 33 Tama augwaligo te nai dabe te Moses bidiboba sela pai. Augwaligo te ugwa be dali, te aga doado bage dabe badi, tama sela pali, tama te huk dabe me, te be daga ni name dabe me, tama te ni name tuabo ni dabe me, te pos dabe me, tama te ni name dodolabo halobage dabe, te tama nai dabe sela pali, 34 tama te ugwa be haluabo genuai nai augwaligo te omai sipsip waligo nigali, tama te haluabo nai me augwaligo te tamu ąįde elalubo hasa sikau waligo nigali, tama te Tedali Gasagi Yai Mu Be Habu te geme dualabo genuai ugwa walobo nigibadi yalio. 35 Tama augwaligo te dąų walali bomai po muani halobage me, te aga sęgę sela sąbo madi te po paliabo nai dali elalubo me sela asai. Tama te halobage tolobo ni si me sela asobadi yali, 36 tama te tebol me, te tebolde mubo doado bage dali, tama te God gedude te tebolde mubo te bret me, te augwaligo sela pai dao.

37 Tama augwaligo te wiegi yai golgo nigai te lam dabe tolalubo nai me, te aga doado bage dali me, te lamde muabo wel dabe dali, sela peyu, 38 te alta gol me sela pai. Tama augwaligo te Godigo nai sa muainogo te wel sela pali, tama denami ilibo pauda me, tama te ugwa be tųde mubo ugwa me sela palio. 39 Tama augwaligo te brasgo nigai alta me, te pololai sawali bras te alta halobage tomoba muabo nai, te dali sela pai, tama te alta tolobo ni dabe me, tama te tigidali altade nai dabe badi, tama te wę paubo pou me, te aga page dali, sela pali. 40 Tama augwaligo te ugwa be bobegelabo obo ugwa dabe badi, te pos dabe dali, tama te pos dodolabo halobage me, te obo tųde muabo ugwa me, te obo dąų walabo bono dabe dali, te tǫba enabo bobobage nil dabe, te bono bomonobo nai dabe badi, tama nai dabe sela pai. Augwaligo te ugwa be tomode sę yabo nai dabe tigidali sela pai. 41 Tama te pris dabego te Tedali Gasagi Yai Be Habu tomoba pelama, te pris sę eyu, te gudabo wiegi wiegi yai ugwa dabe, te me augwaligo sela pai. Te ugwa dabe te Godigo te pris Aron aga ogomani dabe dali augwaligo naga te ugwa gudama, te pris sę emainogo sa munama, te tedali gasagi yai ugwa dabe elalumainao wali.

42 Te Israel dabe augwaligo te tigidali sę yali, te Genuai Bidigo Mosesbolo wali pode naga te tiwai gilama sę yai dao. 43 Tialima, Mosesgo augwaligo te nigali nai tigidali bugagia tonono bilama, osola sulama, tama agai koneani, te Genuai Bidigo agabolo po weyu, te nigao wali nai te tigidali te tiwai naga nigai. Agai sulama, tama agai augwalibolo te po wai, “Genuai Bidigo wiegi yai sę bugagia mu dagego te sę yalio. Tama tibaso, eno homugo agai dage dali dwagi yai sę emainao,” Mosesgo te po wai.