5
Da wiegi yai kolesaga ebo ulade bilao
1 Te God agai dage godolo mu eyu dage aga wai puluba nigaligo da, teda dagego agai ebo kolesaga tiwai wali bugagia pao. 2 Tama tiyu, dagego duga hasi godolo mu ebo kolesaga eyu, tama dagego yabo sę tigidali ebo si te kolesagago dage tonalumainogo, te Kraisgo da godolo eyu wiegi yai homu ebo tiwai gilama. Agai da godolo eyu, tama aga digi aga bidabo ula da hagede tagalama, tama augwaligo aga isilali. Tama tiyu, agai aga tigi te Godibolo olo mani, te polobadu bidali bagego Godibolo mani wiegi yai denami ebo nai mani tiwai yai dao. Tama te sęde God aga Kraisde dwagi yai homu ebo dao. * Sai 29:18; Tib 40:6
3 Te God agai dage aga hani we bidi nigaligo da, teda te penani ebo kolesaga me, te dwai dwai meda yai kolesaga me, te mena gasa bidigo nai pesa eyu godolo ebo kolesaga tigidali, te tebo dwai kolesagago ebo sę dwasianu munu me dage tomode te pedalamuo. Gasa we bidi dabe augwaligo dagego te tobage dwai kolesaga yali po waidali weyu, tama dagego doloba peyu bidiąo. 4 Dagego dwai meda yai po me, te homu kolesaga meni yai bagego wabo po me, te dwai gagali po wabo me, te po dabe dagego wagio. Te tebo kolesaga usu egobeo. Menio. God agai dage tau sobaso, tama dagego agabolo usu da wabo po weyu da, teda te po usu dao, te tobage po wao. 5 Dagego gisiga mu koneao, te penani ebo bidi me, te dwai dwai meda yai kolesaga ebo bidi me, te mena gasa bidigo nai godolo eyu pesa ebo bidi me, te tobage dwai sę ebo bidi dabe augwali Krais dali God dali sigo tonalubo we bidi hani tomoba munu me pogobeo. Tama te nai godolo eyu pesa ebo kolesaga, te kolesaga da te tibo godibolo lotu po wabo sę tiwai dao, te naiba te bidigo aga homu tigidali muani.
6 Dage bugagia dua dao. Tiyu dage te gasa bidigo agai dage te dwai kolesaga tomoba kekainogo ebaso da, agai wabo kedu meni yai po wali pelamuo. Te eno tamadi wali dwai kolesaga ebode te Godigo agai po sela sąbo bidi dabe dali sębę yaibao. 7 Tama tibaso, dage augwali dali kisa selama tama te hai namu tiwai si elamo dao. 8 Te polobadu dage dwai kolesaga ebode biliyu tama dage be hulia side bidibo tiwai yai dao. Tiali goli megi dage te Genuai Bidide wadolama, tama agai dage wiegi yai ulaba munama bidibao. Tama tibaso, dagego wiegi yai kolesaga naga eyu dage te ula yai we bidi tiwai bidiąo. 9 Tama te gide bulali nai bugagia holama, tama geninama walobo gilama tama te tiwai me te ulago agai te tigidali dwagi yai kolesaga ebo me, te doloba pai kolesaga me, te homu mu sai wiegi yai kolesaga, te tigidali hania bugagia ugwaba hanilama pedalobo dao. 10 Tama te ula yai we bidi bidiyu, dagego mena tiwai kolesaga ebaso te Genuai Bidi God aga dwagi yai homu ilabo kolesaga dagego usu sela suao. 11 Tama dagego te dwai kolesagade biliyu hulia side bidibo bidi dabe augwali dali hai namu olama augwaligo te ebo kolesaga egio. Te tiwai kolesaga ebogo te nai dwagi yai me walogobeo. Menio. Te kolesaga da te hulia sai kolesaga dao. Te egimio. Te kolesaga ebo page dagego hania bugagia ugwaba haninama pedalao, tigidali we bidi augwalibolo ola mao. 12 Me ma, eno augwaligo geme dualama ebo dwai meda yai kolesaga po pusugobeo. Menio. Eno augwaligo te tobage dwai dwai kolesaga ebode po wagi sogo da, teda eno pedauwali sęgę eyu hale naga egi dao. Magi baso meni, te dwai dwai sę ebo po pusainogo ebo te usu menio. Eno dage dali te sęde po mibo hagalabo. 13 Tiali goli, tigidali ebo kolesaga te ulaba sela mubo si, teda te kolesaga page tigidali hania haninama elaluaibao. Tama te haniani nai tigidali, te ula elalubo tiwai yaibao. 14 Tama tialigo da, te po me elalubao:
“Nage pila mubo bidi, hodaloao, tama nage te gų
pagede ma hodaloama, tama Krais agai wiegi yai
ula nage mawaibao.”
15 Tama tibaso, dagego duga bilibo bugagia tonaluyu bilao. Dage bilibo te kolesaga meni yai bidi tiwai biligio. Menio. Dage bilibo te kolesaga koneai we bidi bilibo tiwai bilao. Tama tiyu dagego wiegi yai kolesaga naga yao. 16 Tama megi da, te we bidi hauwa augwaligo dwai sę ebo sogo dao. Tialima, megi da, te dage Godigo kolesagade bilibo sogo dao. Tama tibaso, te dwagi yai sę yabo sogo dagego olo gesegeliyu tagaligimio. * Kol 4:5 17 Tama dage te kolesaga meni yai we bidi tiwai biligio. Te menio. Dagego mena tiwai kolesaga ebaso te Genuai Bidi God aga dwagi yai homu ilabo kolesaga dagego usu sela suao.
18 Te dage te bomo yai ąį hauwa tulama te polobo bidi tiwai egimio. Menio. Te tebo kolesagago dageba daganama dolainogo ebo dao. Dagego God agai wiegi yai Mobo Bidigo dageba daganama tonalumainao, te dage bugagia bidimainogo yao. 19 Tama tiyu, dagego duga hasi duga ama dedego noma bidi mobo dąų omainogo, dagego haniani dwagi yai balia po wao. Tama te lotu balia wabo buku nogi Sam, te bukude elalubo Godigo nogi ugwaba sabo po me, te Jisasgo nogi ugwaba sabo tęąbi po me, te po tama duga ama dedebolo wao. Tama tiyu, bomo eyu te dago Genuai Bidibolo me aga nogi ugwaba sabo balia po dali lotu tęąbi po dali wao. 20 Tama te tigidali sogo te dageba pedalobo tigidali sęde te dagego God Aya dali usu da po wao. Te dage te dago Genuai Bidi Jisas Kraisde wadolobaso, God dali usu da po wao. * Kol 3:16-17
Polgo te we sabo sęde da bugagia dodolobo po wali
21 Te bidi Krais agai genuai nogi mu elaluama, tama dagego duga digi aga dologoba muani obaso, duga hasi dali duga ama dede dologode bidao. 22 Tama tiyu, te we dabe sibi deli deli dagego duga bidigo po bugagia wali peyu, te dagego te Genuai Bidi Kraisgo po wali pabo tiwai gilama te duga bidigo wabo po wali pao, augwali dologode bidiąo. * Kol 3:18; 1 Pi 3:1 23 Tama Krais aga te aga po wali pabo we bidide tobolu bidi bidibo gilama, tama bidi me aga wede tobolu bidi bidibo dao. Te agai po wali pabo we bidi te agai tigi tiwai, tama Krais aga digi augwali ma dobola sabo bidi dao. 24 Tama tibaso agai po wali pabo we bidi te Krais aga dologode bidibo gilama, te tiwai dage we dabego me tama naga tiyu, sesemane sogo dagego duga bidigo po bugagia wali peyu duga bidi dologode bidao.
25 Tama bidi dabe deli deli, dagego duga we dabe dali abagi dao homu eyu, godolo mu yao, te Kraisgo aga po wali pabo we bidi godolo mu yaligia tiwai yao. Agai da godolo mu eyu, aga bidabo ula tagalama da tau siyu aga te ni pedaide elama isai dao. Tama agai da dali godolo eyu tau sabo homu tiwai dagego duga we dali tama naga tiao. * Kol 3:19; 1 Pi 3:7 26 Tama Krais agai tama tiali te aga po wali pabo we bidi hani agai augwali Godibolo mawainogo agai augwali ąį telawali te meda meni yai pedaliyu, tama agai pogo me augwali tedali gasagi yai nigilali. 27 Tama Krais agai homugo aga po wali pabo we bidi agai gedude augwali te wiegi yai mu pedalomainu yali. Tama augwali te husugwa sai me, bedogola sai me, te tiwai elaluidali weyu, tama augwaligo te magi dwai sę me esiąyu wiegi yai kolesaga naga eyu bugagia mu bidimainao. Te homu Kraisgo aga po wali pabo we bidi dali yai. 28 Tama dage bidi dabego duga we dabe augwali dali wiegi yai kolesaga eyu, augwali godolo yao, te dagego duga digi duga tigi dali wiegi yai homu eyu godolo ebogia yao. Aga we godolo ebo bidi, te aga digi aga godolo ebo dao. 29 Dago koneai, te bidi mego aga digi aga tigi dali boi bidi homu ebo meni. Te menio. Agai aga tigi nai mayu, bugagia tonalubo dao, te Kraisgo aga po wali pabo we bidi dali ebo gilama. 30 Da te nogo, sągą, gedu te nai dabe te Kraisgo tigi dagi tiwai dao. 31 Tama te Godigo po asęai bukude te po me deli wai, “Tama tibaso, te bidigo aga ida aya taga soyu, tama aga we dali dagana selama, deli tigi gagawai pedalobo dao.” * Gag 2:24 32 E po tomode te genuai geme po digi po page tede elalubo. Tama ena digi eno homugo te Krais dali aga we bidi dali po page hanilibao. 33 Tiali digi agai dage deli deli bidi dali me te po wali, “Nago naga tigi dali dwagi yai homu eyu godolo mu ebogia, nago naga we dali dwagi yai homu eyu, godolo mu yao.” Me ma, we dabe dagego duga bidigo nogi ugwaba selama augwali dologode bidao.