1 Tama Mosesgo po wadolama ma weyu, te po wali, “Tialima, niwai bidi mego we saibaso da, tama nosali agai gedude te wego te dwai sę yali homu gegebaso da, tama agai te we godolo isąma ebaso da, teda agai te webolo pas asęnama, menama, tama agai te we aga sela sąnama pomainao. * Mat 5:31; 19:7; Mak 10:4 2 Tama tiali goli, te we aga gasa bidi ma pobaso da, 3 tama nosali te bidigo me te we godolo isąma ebaso da, teda agai me te we sela sąbo pas asęnama, te webolo menama, tama te we sela sąwai dao. Ma, te wego nosali pali te bidi isibaso da, 4 teda aga hasia tagalali bidigo te we ma sogobeo. Menio. Te bidi aga digi koneao, te we te bidi aga gedude meda yai dao, te po konemainao, tama agai te ma selamo dao. Ma, te bidigo te we aga ma sobaso da, teda Genuai Bidigo te tobage kolesaga godolo me egobeo. Tama tialima, Genuai Bidigo dage mawainogo ebo te tǫba dage bidigi pabo side, dagego te tobage dwai kolesaga tede me elamo dao,” Mosesgo te po wali.

5 Tama Mosesgo po meba ma weyu, te po wali, “Tialima, bidigo we tamadi sobaso da, augwaligo aga te ami sęba o gavmanigo meba genuai sęba tagala palamo dao. Menio. Aga te bulu badu olo bidibadi, kibu be deli bolo emainao, tama aga we dwagi yai homu pemene ilimainao.”

6 “Tialima, dagego gasa bidigo dage negeli emainogo tagaliyu da, tama dage agai magi nai me momainogo homu eyu, o te negeli yali nai begelebao homu yabo nai me deli momainogo da, teda dagego agai wit bo palubo te masigi me selamo dao. Tiyu, dagego agai sę ebo nai sela sąyabuo. Tama te bidi aga tuabo nai dola muabo menia sabuo.”

7 “Tialima, te bidi mego aga abagi Israel hani bidi me deli wi selama, tama aga olo sę emainogo tola sai baso da, ma agai te gasa bidi mego te wi sali bidi abelemainu elama, tama te abagi te bidigo olo sę ebo bidi pedelemainogo ebaso da, teda dagego te tobage kolesaga ebo bidi elama, isilao. Tama tiyu da, dagego te tobage dwai kolesaga dage tomode sela sąwaibao,” wali. * Sai 21:16

8 “Tialima, te keni dwai dagego tigide olo dali pedalobaso da, teda dagego te pris, te Livai dabe, augwaligo wabo tigidali po wali piąo, te dagebolo wabo po dabe. Dagego eno augwalibolo mani te bomai po tigidali wali piąo. * Prs 13:1–14:54 9 Dagego te Genuai Bidi dago Godigo te we Miriam dali polobadu yali te kolesaga kone palao, dago te Isip taga solama, asali sogo,” wali. * Nam 12:10

10 “Dagego duga abagigo dageba negeli emainogo sula tagaliyu da, tama agai te negeli mu wei ponaibao po dąų omainogo eyu, aga doado bage nai me deli nagebolo osogo mawaibao wali. Tama tibo da, teda dagego aga be tomoba pelama, tama te nai sigi pelamo dao. Menio. 11 Dage bulu badu tonalubadi, te bidi aga digi te nai buluba sela asomainao. 12 Tialima, aga nai meni yai bidi mu yai baso da, tama agai moni name ugwa te agai negeli yali te nai osogo mabogo te mu wei ponaibao po dąų olama mobaso da, teda dagego nogo tusiąbadi do sabolao. 13 Dagego aga pageba ma giliga dega sabode sela pao. Teda aga pibo sogo banua pimainao, te pibo sogo. Tama tiyu da, te bidigo dagebolo agai buba hwi po waibao, tama me Genuai Bidi dago God agai dagego kolesaga godolo mu yaibao,” wali. * Sai 22:26-27

14 “Tialima, dagego sę bidi aga nai meni yai baso da, teda dagego aga dali dwai sę me elamo dao. Te aga duga abagi Israel hani bidi yai baso, me o gasa hani bidi dagego hanuba bidagasai me, 15 dagego aga sę yali pe te tigidali sogo pio abeliyu yao, te aga te yali sęde. Aga mone habuge ebaso, tama agai momainogo tonaluyu te ebao. Te dagego aga pe masiąma yali da, teda agai Genuai Bidiba gela obaso da, dage Godigo gedude sęgę pedelama elaluaibao,” Mosesgo te po wali. * Prs 19:13

16 “Tialima, te niwai bidi mego dwai sę yaibaso da, teda dagego aga ida ayaba te sę wei ponamo dao, tama augwali si elama, isilamo dao. Te tiwai naga, te aga ida ayago dwai kolesaga yaibaso da, dagego te augwaligo wai puluba me ela munamo dao. Dagego te dwai kolesaga yali bidi deli digi naga ela muao,” wali. * 2 Kin 14:6; 2 Sto 25:4; Ese 18:20

17 “Dagego te gasa hani bidi me, o te tiana wai puluba, te tobage bomo meni yai bage augwali dali dwai kolesaga me elamo dao, tama augwaligo nai dabe me anoma elama, selamo dao. Tialima, te we me aga bidi isai wego dage dali negeli yaibaso da, teda dagego agai nai wei ponaibao wali po dąų walabo nai siyu, aga ugwa selamo dao. 18 Magi baso meni. Dagego te dage Isip bulude te olo sę ebo bidi dabe dwai madi bidali sogo yali, te kone paliąo. Genuai Bidi dago God agai dage wiegila olo bidimainogo iliyu, dage ma dobola sali, te koneiąo. Dage me te sogo te dwagila mu bidai dao. Tama tialima, eno dagebolo te bomai po te mobao,” Mosesgo te po wali. * Sai 23:9; Prs 19:33-34; Bom 27:19

19-21 “Dagego gide wit nai togolama muai te sigi pelama, tama meba gegeda peyu, taga soai baso da, teda dage ma pelama, ma selamo dao. Dagego te oliv du me, o te wain bono du me, te hasia pelama, sisinama, saibaso da, teda dagego si sogo ma pelama, te ni du dabe te nide elaluali ma sigi pelamo dao. Dagego te wit me oliv du me wain bono du te elalumainogo sula tagalao, tama te gasa bulu bidi hani ebadi, me te wai puluba aga aya isai, me we aga bidi isai, te wilawe we, te bage augwaligo te nai tagalali dabe somainao. Tama tiyu da, Genuai Bidi dago God aga dagego ebo tigidali sę dabe tau selama, wiegi yai mu pedelemainogo yaibao. * Prs 19:9-10; 23:22 22 Dagego te dage Isip bulude olo sę bidi bidiyu, dage dwagila mu bidali, te dwai sogo bidali koneiąo. Tama tibaso, eno dagebolo te bomai po megi te mobao,” Mosesgo te po wai.