1 Nebukatnesargo te po obaso, tama augwaligo te bidi piksa noma me deli te golgo nigai, te aga bobobage usu sali, te 27 mita teba usu nani, tama aga genuai usu nama usu sali, te 3 mita. Tama augwaligo te piksa te dolo tǫ pesage augwaligo te nogi Dura nogi yai, te Babilon Provins tǫ pedaide dodolai dao. 2 Kingo te po weyu, te aga gavman ofisa tigidali te piksa noma gudainogo eyu, sisinagasao wai. Tialima, te hetman dabe me, tama te polalubo tuni bidi, me si wabo tuni bidi, me te mone tonalubo bidi dabe, me te jas bidi dabe, tama te tǫ pedaide gasa ofisa dabe me, te augwali sisinagasai. Tama kingo augwaliba weyu, augwaligo te golgo nigali piksaba lotu waiyąo po walio. 3 Tama te po obaso, te tigidali gavman genuai bidi te piksa elalubo pesageba sisinama, te lotu wainogo yalio, augwali tede dodolali.

4 Tama te gavmango po pusubo bidi me deligo te i bomo elama weyu, te tiwai wali, “Dage tigidali bulu tǫ pedai kantri we bidi me, te tigidali hani me, te po haniani wabo we bidi dabe dao. 5 Dagego te biugel bolo hasia bu wabo odaibao, tama nosali augwaligo te gasa tobage musik hauwa waibao. Tialima, dagego te musik wabo odobaso da, te dagego kidu sugunama, tama te king Nebukatnesargo dodolali piksa teba lotu waiyąo. 6 Te bidi me deligo te piksaba kidu sugunama, lotu po wasiąbaso da, teda polo tama dago aga selama, tama aga te genuai stov sia posolo mu elalubo te tomoba aiya sąwaibao,” te gavmango po pusubo bidigo te po wali.

7 Tama augwaligo te musik wabo odobo sogo, te tigidali bulu tǫ pedai kantri bidi dabe, me te tigidali hani, me te tigidali haniani po wabo we bidi dabe, augwa te kidu sugunama, tama te piksaba lotu wali, king Nebukatnesargo dodolali piksaba lotu po wai dao.

8 Kingo te tama po wai, tigidali bidigo te piksaba lotu waiyąo po wali, tialima te Babilon bidi meba te kingba aselama, tama te Juda bidi sela po tų ilagasai. 9 Augwaligo kingba te tiwai po walio, “Genuai bidi, nage sesemane sogo bugagia bidagameo. 10 King o, nago bomo yai po te tiwai ilali, te augwaligo musik wabo sogo, tigidali we bidigo te kidu sugunama, tama nago te dodolali piksaba lotu po waiyąo po wai. 11 Tama bidi me deligo te muani bomai po wali me pisąbaso da, teda nago aga te genuai sia daboba aiyaba sąwaibao po wali. 12 Tiali goli, te Juda bidi sela, Satrak, me Mesak, me Abetnego, nago augwali sa munama, te Babilon tonalumainu yali bage, augwaligo te nago po sela sąwai. Augwaligo te nago god dabeba lotu me wasiąwai, tama me nago te dodolali piksaba kidu sugunama, lotu me wabeo,” wali.

13 Kingo te tama po odolama, tama aga wado po dwai mu olama, tama te po weyu, augwaligo te bidi sela agaba odasa asao wai. 14 Te sela bidi sabalubo sogode, kingo augwaliba te tama po hanalu wai, “Satrak, me Mesak, me Abetnego, augwaligo te po weyu, dagego te eno godiba lotu po me wasiąyu, tama me dagego eno te dodolali piksaba kidu sugunubeo po wali. Te mu da, agawe? 15 Tialima, dagego te musik odobo sogo, dagego kidu sugunama, tama te piksaba lotu waiyąo. Tama dagego te tiwai isąbaso da, megi naga tama eno te bidi dabeba walama, tama augwaligo dage te genuai sia daboba sąmainogo yaibao. Tama dagego homugo te dage tau sabo god me deli elaluba homu eba, agawe?” kingo te po wai.

16 Tialima, Satrak, me Mesak, me Abetnego, te bagego te po wali, “King, te nago da selade yainu ebo sęde te dago magi po me menio. 17 Dago lotu po te God muba wabo dao. Dago te God agai da tau sabo usu elalu, te nago bomo, me te siago bomo geda mubaso da, teda te Godigo sę dao,” wali. 18 “Tiali goli, agai da tau sisąbaso da, te tagalao, dago te nago god dabeba lotu po me wagobeo, tama me dago nago te dodolali gol piksaba me kidu sugunugobeo,” augwali selago te po wai dao.

19 Nebukatnesargo haliga sębę te Satrak, me Mesak, me Abetnego, te bageba eyu, tama agai guni buyu, gedu me gesabidi me pęgo sela pali. Tama agai te aga sę bidi dabeba olama, te sia nogonama, te bogoli mu dwai pedalumainu ilao wali. Polobadu augwaligo sia nogani posolo ebo te tiwai posolo yai me pedalubeo, te genuai mu. 20 Tama agai te bomai ami bidi dabeba walama, te Satrak, me Mesak, me Abetnego te nogo sągą baklaingo dunama, te siaba sąyao po wali. 21 Tama tialima, te bidi sela te augwa gudalubo ugwa dali kęnama, tama augwali te genuai siaba sąwai dao. 22 Kingo te po obaso, tama augwaligo te sia nogani te posolo genuai mu pedelali, tama te ami bidi dabego te Juda bidi sela pelama, te siaba sągi pali sogo, te siago te ami bidi dabe delama, te augwali isai dao. 23 Tama tialima, te Satrak, me Mesak, me Abetnego te sia tomoba tulaluai, tama augwaligo te augwali kęnani bono baklain, te kęnani tiwai tama elaluai.

24 Nebukatnesargo te augwali tama tebo sulama, tama polo tama agai dwai midigi selama, dolugulali. Tama agai bolo te wiegi yai homu kolesaga ola mabo bidi dabeba hanalu wali, “Dago te bidi sela nogo sągą dųnama, te siaba sąwani, ma meniwe?” Tama augwaligo agabolo te po wai, “Awe, genuai bidi, dago te tama tiwai dao.” 25 Tialima, agai te po wali, “Magi elama tama eno suali, te bidi me si me si te sia tomode bilibowe? Tama te dago augwali kęnani baklain bono, te augwali tigide elalubo ma me subeo. Tama siago me augwali me dabeo. Tama te me si me si wali bidi te god me deli tonobo ąǫ ebao,” te po wai.

26 Tama Nebukatnesar te stov sia nogani pąba pelama, tama i wai, “Satrak, me Mesak, me Abetnego, dage te Ugwade Mu Bidibo Godigo sę bidi dabe dao, dage buluba dią soao.” Tialima, polo tama augwali buluba dią asalio. 27 Tama te kingo genuai bidi dabe, augwali te pąba pąba aselama, te siago disąwani Juda bidi sela suagasalio. Tama augwaligo te tiwai suali, te siago augwa tobolu nisi me, te augwa gudali ugwa me, te siago disąwai, tama te sia hano kugumini me te augwali tigide me elalubeo.

28 Tama kingo te po wai, “Da tigidaligo te Satrak, me Mesak, me Abetnego, te augwaligo God nogi ugwaba sinao,” wali. “Agai te aga mobo bidi ensel tagala palama, tama te agaba lotu weyu, te konealubo homu dąų wabo bidi sela tau sali. Augwaligo te eno bomo yai po sela sąyu, te augwali isabo wi me ebeo. Tama augwaligo gasa godiba lotu me wabeo. Menio. Augwaligo te augwa Godiba digi naga lotu wai dao. 29 Te niwai god me deligo te aga we bidi tau siyu, te Satrak, me Mesak, me Abetnego, te augwa Godigo yali tiwai me egobeo. Tama megi eno te po wainu ebao. Te bidi dabego te Godiba posobo po wabo te habu mu dao. Te mena bulu kantri tǫ bidi dabego, me te mena hani bidi, ma te mena tobage po wabo bidi hani, augwaligo te tama tiwai po obaso da, teda eno te augwali tigi tologolama, miminama, te augwali isaibao. Tama eno te augwaligo be me te pobele bage tiwai pedalumainu ilaibao,” wali.

30 Kingo po ola silama da, teda agai te Satrak, me Mesak, me Abetnego, te augwali sela bageba te gesi sę te Babilon bulu tǫ pedaide mawai, te augwaligo polobadu yali sę mu edelama mu yali.