1 Te Manase aga king bidi nigilama bidibo sogo, agai kibu be te nogo si olama, te sągągo si olama, te kibu be elaluama, tama te aga king bidi nigali. Tama aga te Jerusalem taunde te king bidi nigilama bidali kibu be, te 55 kibu be usu nama bidali. Aga ida nogi te dao, Hepsiba dao. 2 Tama te king Manase agai te dwagi yai kolesagadu me wali pabe. Mu meni. Tama me te agai te tǫde polobadu te bidali bidi dabego yali haniani dwai kolesagadu wali peyu, tama Genuai Bidigo augwali sela sąnama, tama agai te tǫ te Israel hani dabe augwali te tǫ mani. Tama te king Manase agai te hanigo yali kolesagadu wali pali, tama te king Manase agai te Genuai Bidigo gedude dwai kolesaga mu iduali. * Jer 15:4 3 Te king Manase agai te dwai haniani kolesaga naga tama yali. Tama agai te tibo god dolo lotu po wabo pesage ma nigibo sę yali, polobadu aga ayago, te king Hesekiago, sela sąyani pesage. Tama agai te tibo god Bal dolo lotu po wabo pesagede agai te alta sai nigibo sę yali. Tama agai te tibo god we nogi Asera noma nigibo sę yali, te polobadu te king Ahapgo yali tiwai, te Israel hanigo king bidi, te agai te sę yai, tama me te agai te dagalude elalubo hǫba lotu po wabo sę iduali. 4 Tama agai te tiwai sę yali, te Genuai Bidigo tempel be tomode te agai te tibo god dolo lotu po wabo alta sai nigibo sę yalio. Tiali goli, polobadu Genuai Bidigo te bede e tama po wai, “Te Jerusalemde elalubo be, te be te tigidali we bidi dabe augwaligo ena deli dolo naga lotu po wabo be dao,” wai dao. * 2 Sml 7:13 5 Tiali goli, te king Manase agai te me badu alta sai te Genuai Bidigo tempel be habude te tigidali we bidi sisinagasabo madigi te pesagede si te be tomode elalubo madigi, te agai te me badu alta sai nigibo sę yali, tama aga te alta saide bidiyu, te hǫ dabeba lotu po wali. 6 Tama agai te aga ogwa elama, tama agai aga te wai te siaba sese ula palali, te ofa nai ulubo tiwai gilama yali. Tama agai te polobadu isali bidi isi bidigo aga tau somainu i wali, tama agai me te sogo yesi bidi me hanalu wali, tama te bidi dabe augwaligo aga tau somainu, tama agai te haniani kolesaga umabo mu yali. Manase agai te Genuai Bidi gedude sęgę sabo kolesaga genuai mu sęgę sali. Tama agai tama tibo dwai kolesaga ebaso, tama te Genuai Bidigo te king Manase dali sębę genuai mu yali.

7 Tama te king Manasego agai te tibo god we Asera noma nigali piksa selama, tama agai te Genuai Bidigo tempel be tomode muani, tialima te polobadu te Genuai Bidigo te king Devit dali, te king Solomon dali, augwali sibolo e tama po ola mawai dao, “Te Jerusalemde elalubo tempel be, te be te ena digi te ena te Israel hani dabe augwali tomode eno dąį ilai dao,” wali, “tama tigidali sogo tama augwali eno te beba naga aselama, tama augwaligo ena deliba naga lotu po wabo be dao. 8 Tama tialima, dage tigidali eno hani we bidi dabe me, me te eno po odama wali pabo we bidi dabe, me te eno bomai po wali pabo we bidi dabe me, Moses, eno sę bidi, agai dagebolo mawai po, tama tiali tama te eno dage munu me sela sągobeo, te tǫ te polobadu te eno duga wąį nǫųbolo mawai tǫ dao, tama te megi te tǫde dage te bidibao,” wali. * 1 Kin 9:3-5; 2 Sto 7:12-18 9 Tiali goli, augwaligo te po odama, tama augwaligo wali pabe. Mu meni. Tama te king Manasego te augwali kegelama, tama augwaligo te dwai dwai kolesaga umabo mu yali. Polobadu te tǫde te bidali Israel hani isąwai we bidi dabe augwaligo te dwai dwai kolesaga ebaso, tama Genuai Bidigo augwali te tǫdu sela sąyani. Tama te Juda bagego te dwai dwai kolesagago te polobadu te tǫde bidali dwai bagego yali kolesaga aiyaba elaluali.

10 Genuai Bidigo te king Manasego te dwai kolesaga ebo sę suali, tama tibaso te Genuai Bidigo te profet bidi dabebolo e tama po augwalibolo ola mani, te profet bidi dabe augwali te aga sę ebo bidi dabe da. Te Genuai Bidigo po e tama da, 11 “Te king Manase agai te haniani dwai dwai kolesaga mu yali, te polobadu te Amor bagego yali kolesaga aiyaba elaluali. Agai te tibo god noma nigilama, tama agai teba lotu po wali. Tama agai te tibo kolesagago te Juda hani umabo mu agai kegelama, tama augwaligo me ena gedude sęgę sabuo. 12 Tama tialima, ena God dao, Israel hani duga Genuai Bidi dao, eno po obao, tama eno te Jerusalem bulu me doloyu, tama te Juda hani me mu dolaibao,” wali, “tama te gasa bulu bidi dabe augwaligo te sę yali po odobo sogo, tama augwali midigi genuai mu selama, tama augwali moni homu mu yaibao. 13 Tama te eno te Jerusalem taun dolabo kolesaga e tiwai dao, eno te Samaria bulu doloyu, te king Ahap aga hani dali doloyu yali deli kolesaga tiwai naga yaibao,” wali. “Tama eno te Jerusalem bulu taun dolama, tama te tigidali we bidi dabe mu dola silaibao, tama tilama, te Jerusalem taun te e tama tiwai elaluaibao, te plet pou wę telawai tiwai gilama, te magi nai mu me te dwasianu pobele bage me meni yai olo mu elaluaibao,” wali. 14 “Tama tialima, te me badu we bidi dabe tede me bidibaso da, teda augwali te eno munu me tau sogobeo. Mu menio. Tama augwali te eno te boi bidi nogoba muaibao. Tama te boi bidi dabe augwaligo te augwali dolama, tama augwaligo doado bage dabe me wi sela pomainao,” wali. 15 “Eno tama tiwaibao, magi baso meni, te eno hani we bidi dabe augwaligo eno gedude te dwai sęgę sabo kolesaga te augwa wąį nǫųgo te Isip bulu tagalobo side te sęgę sabo gagalalio, tama augwaligo te deli kolesaga naga me edu bidali. Tama augwaligo te dwai sęgę sabo kolesaga me edu bidibaso, te eno te haliga sębę mu yalio,” God Genuai Bidigo te po wai.

16 Te king Manasego agai te Juda hani augwali kegelama, tama augwaligo te Genuai Bidi gedude sęgę genuai mu sali. Tama me te agai aga hani we bidi dabe dali boi bidi ebo kolesaga yali. Tama te tigidali Jerusalem bulude te king Manase agai e tama kolesaga yali, te dwai kolesaga isiąwai doloba pai we bidi umabo mu agai ela muna muna pali.

17 Te king Manase agai te haniani sę yali po, te gasa bukude elalubo, te buku da augwaligo e tama nogi ebo buku dao, Te Juda Hanigo King Bidi Dabego Yali Sę Po Elalubo Buku da, wabo dao. Te e bukude me, te king Manasego sęgę sali sę po ola mabo buku dao. 18 Tama te king Manase isali, tama augwaligo te aga te kingo be sesegede te obo tomode te tǫ me deli elalubo madigi te king Manase pubulali. Te tǫ te augwaligo e tama nogi wabo, te tǫ te Usago tǫ da. Te aga ogwa, agai nogi te e dao, Emon, tama te bidi agai te bidigo sę yali silide te aga king sę yali.

19 Te bidi Emon aga te king bidi nigilibo sogo, agai kibu be te bidi sese deli olama, te ugwadu si, te 22, tama te aga Jerusalem bulude te king nigilama bidali kibu be te si digi mu tama bidai. Te aga idago nogi da, Mesulemet, te aga bulu te taun Jotba bulu bidi Harusgo wegi da. 20 Tama te king Emon agai me te Genuai Bidi gedude dwai kolesaga yali, te aga ayago yali tiwai yali, te king Manasego yali gilama tiwai kolesaga yali. 21 Tama agai te aga ayago polobadu yali gilama te tibo godiba lotu po wabo sę yali, tama agai te aga ayago yali dwai kolesagadu dolo mu wali pali. 22 Agai te God tudiba mu togolali, te aga wąį nǫųgo Genuai Bidi mu, tama agai te Genuai Bidigo godolo ebo kolesagadu wali pabe.

23 Tama me sogo deli te Emon aga sę ebo gavman ofisa bidi dabe augwali sisinama, tama augwaligo te king Emon ela muabo tų kegeyu, te po miani. Tama nosali augwaligo te aga te kingo be tomoba pelama, ela muani. 24 Tama nosali te Juda hani we bidi dabego te king Emon elali ofisa bidi dabe me te augwali me ela muanio. Tama augwaligo te bidi te Josaia sali, te king Emongo ogwa da, tama augwaligo te bidi dąį ilama, tama te bidi aga te Juda hani augwaligo king bidi nigilalio. 25 Te king Emongo te gasa haniani sę yali po da, te gasa bukude elalubo, te buku augwaligo e tama nogi wabo buku da, Te Juda Hanigo King Bidi Dabego Yali Sę Po Elalubo Buku da, wabo dao. 26 Tama augwaligo te king Emon te Usago tǫde elalubo gų pageba pubaligi pali. Tama aga ogwa Josaiago tama aga ayago king sę yali silide selama, tama king bidi nigilama, sę yali.