1 Judago ogwa hani meba nogi e tiwai elalubao, Peres, me Hesron, me Karmi, me Hur, me Sobal dao.

2 Sobal te Reaiago aya da, te Reaia te Jahatgo aya, aga te Ahumai de Lahat sigo aya. Te bidi dabe augwali te Sora taun we bidigo wąį nǫų dao.

3-4 Hur te gomunai ogwa da, Efrata, Kalepgo wego ame nani. Hurgo te Betlehem taun nigibo sę hodolali. Hurgo ogwa dabe e tiwai elalubao, Jesril, me Isma, me Itbas, me Penuel, me Eser. Jesril ma Isma me Itbas, augwaligo te taun Etam nigibo sę hodolali. Te Hasalelponi te sela bidigo abe da. Penuelgo te taun Gedor hodolobo sę yali, te Esergo te taun Husa nigibo sę hodolai dao.

5 Asur, te Tekoa taun nigali bidi da, agai we si elaluali, Hela me Nara dao. 6 Narago ogwa ene nanobo ogwa me si me si ame nani. Augwali nogi e tiwai elalubao, Ahusam, me Hefer, me Temeni, me Hahastari da. 7 Tama Helago ogwa sela ame nani. Augwali nogi e tiwai, Seret, me Ishar, me Etnan dao.

8 Kos te Anupgo aya me Sobebago aya da. Tama aga te Aharhelgo bulai wąį nǫų deli hani bage mu da, te Harumgo ogwa dao.

9 Bidi me deli bidali, aga nogi da Jabes. Agai kolesaga te wiegi yai mu eyu te aga ama dabego ebo kolesaga aiyaba elaluali. Tama we bidi augwaligo genuai nogi agabolo mawai. Te Jabes aga idago aga ame nani sogo genuai dene ebadi ame nani, tama tibaso agai aga nogi Jabes * Te Hibru pogo te nogi Jabes page te tobage pąde si tiwai elalubao, “dene,” wali. nogi yali. 10 Me sogo deli Jabesgo te Israelgo Godiba gedu haluasa po te tiwai wali, “God, eno homugo nago ena tǫ hauwa mao. Te eno homugo nage ena dali bidama ena tau sao, te nago ena bugagia tonaluao, te dwai nai dabego enabolo dene maidalio,” wali. Tialima Godigo agai gedu haluasa po wabo odama, tama Jabesgo agaba hanalu wali sę po tiwai sę yai dao.

11 Kelup, te Suhago ama da, aga te Mehirgo aya, tama Mehir te Estongo aya dao. 12 Tama Eston te Betrafa, me Pasea, me Tehina augwali selago aya da. Tehinago te taun Nahas nigibo sę hodolali. Te hani augwali te bulu Reka pedai badu bidai dao.

13 Kenasgo ogwa dabe nogi te tiwai elalubao, Otniel, me Seraia. Tama Otniel te Hatatgo aya dao.

14 Meonotai te Ofrago aya. Seraia aga te Joapgo aya da. Te bulali wąį nǫų Joap te bidali bulu augwa te tiwai nogi yali, “Te Sę Bidi Augwa Odogo Bulu Da,” wai dao. Te odogo bulugo nogi te tama telaluali, magi baso meni, tede bidali bidi dabe augwaligo te haniani nai nigibo sę mu konea pai bidi dabe dao.

15 Kalep, te Jefunego ogwa, agai ogwa sela elaluali. Augwa nogi e tiwai elalubao, Iru, me Ela, me Nam. Te Ela Kenasgo aya da. 16 Te Jehalelgo ogwa dabe nogi e tiwai, Sif, me Sifa, me Tiria me Asarel.

17-18 Te Esrago ogwa dabe nogi e tiwai elalubao, Jeter, me Meret, me Efer me Jalon. Meretgo we Bitia sali, te Isip king bidigo wegi da. Te augwali sigo wai dabe nogi e tiwai da, Miriam me Samai me Isba. Isbago te Estemoa taun nigibo sę yalio. Tama Meretgo te Juda hanigo we me deli salio. Augwali sigo wai dabe nogi e tiwai da, Jeret me Heber me Jekutiel. Jeretgo te taun Gedor nigibo sę yali, te Hebergo te taun Sogo nigibo sę hodolali, te Jekutielgo te taun Sanoa nigibo sę hodolalio.

19 Hodiago te Nahamgo abe sali. Augwali si te Gerem hanigo wąį nǫų te taun Keilade bidali, me te Maka hani te taun Estemoade bidalio.

20 Te Simongo ogwa dabe nogi e dao, Amnon, me Rina, me Benhanan, me Tilon da.

Te bidi Isigo ogwa nogi dabe e tama, Sohet me Bensohet dao.

21-23 Sela te Judago ogwa me deli da. Selago ogwa dabe meba nogi e tiwai, Er, me Lada, me Jokim, me Joas, me Sarap da, te Koseba taunde me Betasbea te taun side bidali bidi hani dabe da. Te Betasbea hani bidi dabego te wiegi yai nami ugwa dabe nigibo sę yai. Ergo te taun Leka nigibo sę yali, te Ladago te taun Maresa nigibo sę yai. Tama Joas me Sarap sigo te Moap tǫ me Jasubi Lahem tǫ tonalualio. Te bidi dabe augwali te taun Netaim me taun Gederade bidaluai, tama augwaligo te augwali tonaluali king bidigo sę eyu tama te tǫgo sospen nigibo sę agabolo yai. Te augwalide asęai po dage te bidi dabego polobadu mu asęai dao.

24 Te Simeongo ogwa dabe nogi e dao, Nemuel, me Jamin, me Jarip, me Sera, me Saul dao. 25 Saul te Salumgo aya, te Salum Mipsamgo aya, tama Mipsam te Mismago aya da. 26 Te Mismago hani dabe nogi e dao. Misma te Hamuelgo aya, te Hamuel Sakurgo aya, te Sakur Simeigo aya da.

27 Simeigo ogwa te 16 ogwa, te wegi 6 tama elaluai. Tialima aga ama dedego wai hauwa me ame nabeo. Tama tialigo, te Simeongo hani genuai pedalisiąyu te Judago hani tiwai me ebeo. 28 Te Simeon hani dabe te tama taunde bidali, Berseba, me Molada, me Hasarsual, 29 me Bilha, me Esem, me Tolat, 30 me Betuel, me Horma, me Siklak, 31 me Bet Markabot, me Hasarsusim, me Betbir, me Saraim. Te Simeongo hani dabe te taun dabede bidalubadi te king Devit bidali sogoba usu nai dao. 32 Tama me augwali te a naga taunde bidali, Etam, me Ain, me Rimon, me Token, me Asan, 33 tama te taun dabe pąde elalubo dwasianu bulu dabede me bidada pelama, te taun Balatba usu nigi palio. Te taun dabe te Simeongo hanigo taun dabe elaluali. Tama te Simeongo hanigo te augwa wąį nǫų hanidu gagalasa te augwa deli hani tigidali nogi asęai elaluai dao. * Jos 19:2-8

34-38 Te Simeongo tobolu bidi dabego nogi dabe te e dao, Mesobap, me Jamlek, me Josa, te Amasiago ogwa, me Joel, me Elioenai, me Jakoba, me Jesohaia, me Asaia, me Adiel, me Jesimiel, me Benaia, me Jehu, me Sisa da. Jehu te Josibiago ogwa, Josibia te Seraiago ogwa, tama Seraia te Asielgo ogwa da. Tama Sisa te Sifigo wai, te Sifi te Alongo ogwa, te Alon Jedaiago wai, tama Jedaia te Simrigo wai, tama Simri te Semaiago ogwa dao.

Te tobolu bidi dabego ame nani ogwago bulali wai dabe hani te umabo genuai mu pedelama, 39 tama augwa te bulmakau me sipsip tuabo wiegi yai nosai gegabo homu yai. Tibaso, augwali te Gedor taun pąba bidigi pali, te giliga pedalubo badu te odogo bulu badu dao. 40 Augwaligo te bulu odogo malu tǫ genuai mu elalu, te wiegi yai nosai elalubo sualio. Te augwali bugagia tegaluama bidiyu, te magi nai me deligo augwaliba sęgę me mabeo. Te Ham hani augwali polobadu tede bidai dao.

41 Te Juda king bidi Hesekia bidali sogo, te Simeon hani tobolu bidi dabego te badu te wiegi yai nosai dabe elalubo suali. Tama tialima, augwali pelama, te Ham dabe dali me Meun dabeba me boi hwįgi palio. Tama augwaligo te hani dabego sel ugwa be dolama, te tigidali we bidi mu ela silai. Te delinu me bidibeo. Tama nosali te Simeon hani augwali te tǫba bidigi palio.

42 Tama te bidi sese hauwa 500 bidi te Simeongo hani hogodama, te Seir bulu du te Idom pedai badu pali. Te augwa polalubo bidi dabe te Isigo ogwa dabe da. Augwa nogi da e tama da, Pelatia, me Nearia, me Refaia, me Usiel dao. 43 Polobadu te Amalek dwasianu hani te Israel dabede wi solama te badu bidigi soai. Tialima te Simeongo hanigo te Amalek hani tigidali ela munama, tama te Simeon hani te tǫba bidigi pali, te bidada pali te buku asęani bidi bidali sogoba usu nai dao.