1 Te Devit te bomai king pedelai madi, tama nosali Nahas te Amon dabego king isama, te aga ogwa Hanun, te king pedelai dao. 2 Tama Devitgo te tiwai po wali, “Eno te Hanunba wiegi yai kolesaga yaibao, magi baso meni, aga aya Nahasgo te ena dali wiegi yai kolesaga yalio,” wali. Tibaso Devitgo te bidi meba tagala palama, te Hanunba wiegi yai homu yabo po wagi pabo bidi tagala palai. Tialima augwali te Hanunba sabaligi pabo side, 3 te tǫ kantri Amon tobolu bidi dabego te tiwai po Hanunba walali, “Nago homugo Devitgo te bidi dabe tagala palali te nago ayade wiegi yai po wagasu te genuai nogi magasu yali da homu eba, agawe? Mu menio. Te agai augwali tagala palali te dago tǫ pedai kantri bugagia susa bilimainu yali, tama nosali aga dali, te aga ami bidi dabe dali aselama, da dolainu yali dao,” wali.

4 Hanungo te po odama tama agai po obaso agai sę ebo bidi dabego te Devitgo tagala palali te hani bidi dabe pageabi elama, te augwaligo penane nisi me badu poa yalio. Tama me augwaligo gudali bobobage ugwa te togolama pęwadage ilali, te gasa bidi dabego augwaligo habu mi sulama hale yabo sę ilalio, tama tilama agai te bidi dabe tagala palalio. 5 Tialima te bidi dabe augwali hale mu ebaso, te augwa buluba ma begasa pabo hagela homu yalio. Hanungo te tama kolesaga Devit agai hani bidi dabeba yali po odali sogo, agai te tiwai po te bidi dabeba ola tolalio, “Dage te Jerusalemba polo asabo te moni homu igio. Menio. Dage te Jerikode bidalu, te dagego penane nisi ma holobo sogoba usu nao, tama nosali dage ma asiagameo,” te po wai dao.

6 Te Amon dabe augwaligo koneani, augwaligo te yali kolesagago Devitgo haliga dwai posolo mu ilali homu yai. Tama tibaso Hanun dali aga hani dabego te Mesopotemia dabeba, me te Siria dabe te tǫ kantri Makade bidali bidi haniba, me te tǫ pedai Soba te augwaliba te boi hwįbo karis dabe meba me ami bidi meba badi te aga tau somainu hanalu wali, te hos dabede dualama hwįbo ami bidi dabe me, te aga tau sao wali. Tama Hanungo te silva hauwa tolali, te aga sęgę te bidi sese umabo 35,000 kilogram usu dao, te kantriba tolali, te ami bidi dabe me te karis dabe dali abeliyu yalio. 7 Augwaligo Hanunba te boi hwįbo nai karis te bidi sese hauwa 32,000 manio. Tama me, te Maka taun king bidi aga ami dali asu, te Hanun tau sagasainu yali, tama augwa bidabo pesage te taun Medeba pąba sili nigilama bidagasalio. Te Amon ami bidi dabe me augwa te taun dabe tagalama, te augwali asama, te Israel dabe dali boi hwįainu sisi elaluai dao.

8 Devitgo odali, te Amon dabe augwaligo te ami bidi dabe sisinibo po odama, tama agai Joap dali, te Israel ami bidi dabe dali, te boi hwįgi pomainu tagala palalio. 9 Tialima te Amon dabe te taun Raba bagulali genuai obo sunumi pąde dolaluali, te augwaligo genuai taun da. Te Siria king ami bidi dabe aselama, te Amon dabe tau sagasali, te augwali te kala bulu badu dolaluali. Tama tigidaligo te Israel dabe dali boi hwįainu sisi elaluai dao.

10 Joapgo te boi bidi dabe sulama agai koneani, augwaligo te Israel dabeba si badu hwįainu elalubo koneanio. Tama agai te wiegi yai bomai ami dabe meba dąį ilama, tama augwali te kala bulu pesage badu dolalubo bage pąbadu wasilali. Tama aga digi augwali tonaluai dao. 11 Tama agai aga ama Abisai dąį ilali, te agai gasa ami bidi dabe tonalumainu yali, tama Abisaigo augwali te Amon dabe pąbadu wasilalio. 12 Tialima Joapgo Abisaibolo te tiwai po wali, “Te boi hwįbo hodolobo sogo nago suali te Siria dabego da aiyaba elaluabo homu ebaso da, teda dagego da tau sagasao. Me ma, te Amon dabego dage aiyaba elalueinu ebaso da, teda dago dage tau sagasaibao. 13 Dage wi me elamuo. Dago dena we bidi dabede me Godigo dabolo mani taun dabe homu kone palama, tama dago hwįbo bomo yao. Te mena sę Genuai Bidigo dabolo yabo sę te wiegi yai da homu ebaso da, teda agai te tama sę naga emainao,” Joapgo aga ama Abisaibolo te po wali.

14 Tialima Joap te aga ami dabe daligo boi hwįgi palima, te Siria dabe wi palio. 15 Te Amon dabego te Siria dabe wi pabo sulama, augwali me te Abisaigo hanide wi pelama, tama augwa taun genuai obo tomoba geme duala sigi pali. Tialima Joapgo aga ami bidi dabe selama, te Jerusalemba ma palio.

16 Te Siria dabe augwaligo te tiwai suali, augwaligo te boi hwįabo usu meni baso, te augwaligo bidi meba tagala palama, te Siria hani bidi dabe augwali te sia ge asobo badu te wę Yufretis elalubo madi teba sigi pelama, tama te Siria dabe aselama, augwali tau sagasomainu yalio. Tama Sobak te king Hadatesergo polalubo ofisa bidigo augwali tonaluali. 17 Devitgo te Siria dabe deliba sisinibo po odobaso, tama aga hogodama, te Israel ami dabe tigidali sisinama, tama augwali pelama, te wę Jordan nogelama, tama te Siria dabe bidibo pesage pąba sabolali. Te Israel dabe nani wasilama dolalu, tama Devitgo te Siria dabe dali hwįani. Te Siria dabego Israel dabe dali boi hwįanio. 18 Tialima te Israel dabego hwįbo bomo mu eyu, te Siria dabe pogasa palio. Tama Devit aga ami bidi dabego dali te bidi sese umabo bidi 7,000 ami bidi te karis dabede dolalu hwįbo bidi dabe elali, te meba ami bidi dabe te bidi sese umabo mu te 40,000 bidi ela muani. Tama augwaligo te Sobak me elalio, te Siria dabe augwa polalubo ofisa bidi dao. 19 Te Siria dabe te king Hadateser dologode bidali sogo, te suali, te tiwai te Israel dabego augwali aiyaba elaluai baso, augwaligo Devitba walama, te augwaligo Israel dabe augwali dali munu ma boi hwįgobeo po walio, tialima augwali te Devit dologode bidali. Te tudi badu nosali, te Siria dabego te Amon dabe tau selama, te Israel dabe augwaliba ma hwįbo hagela yai dao.