1 Eman mi efich kapasen emirit a efich silelap, nge ätewe mi oput kapasen apwüng a tiparoch. 2 Ewe Samol mi Lapalap a echeni eman mi aramasöch, nge a apwüngü eman aramas mi ekiekietä mine a ngau. 3 Esap wor eman a tongeni nüküchar ren an föföringau, nge eman chon pwüng esap fokun mwökütüküt. 4 Eman fefin mi mürina a usun chök epa mwärämwär fän iten pwülüan, nge neminewe a atoto säw won pwülüan a usun chök kanser lon chün ätewe. 5 Ekewe chon pwüng ra ekiekietä mine a pwüng, nge än ekewe aramasangau öüröür a atuputup. 6 Än ekewe aramasangau kapas ra ni aramas, nge än ekewe chon pwüng kapas ra angasa aramas. 7 Ekewe aramasangau ra kuf o rosola, nge chon leimwen ekewe chon pwüng repwe nonometiu. 8 Aramas repwe mwareiti eman mi mirit aükük ngeni an mirit, nge repwe oput eman mi tiparoch. 9 Eman aramas tekison mi angang pwe epwe wor anan a mürina seni eman mi pwomweni pwomwen eman aramas tekia, nge esap wor anan. 10 Eman chon pwüng a tümwünüöchü nöün man, nge ekewe aramasangau ra chök ariaföüü nöür man. 11 Eman mi angang won fanüan epwe wor chomong anan mongö, nge eman mi föri sokopaten angang mi lomotongau esap wor an mirit. 12 Ekewe aramasangau ra chök tipeni föför mi ngau, nge ekewe chon pwüng ra nüküchar. 13 Eman aramas mi ngau a tup ren püsin kapasen awan, nge eman chon pwüng esap tolong lon osukosuk. 14 Eman aramas epwe angei liwinin alongolong won mine a apasa ika föri, epwe chök angei mine a fichiti. 15 Eman mi tiparoch a ekieki pwe a pwüng lon an föför, nge eman mi tipachem a aüseling ngeni kapasen öüröür. 16 Eman mi tiparoch a müttir pwärätä an song, nge eman mi mirit a asarongorongala seni kapasen esit. 17 Eman chon pwärätä mi wenechar a pwärätä mine a let, nge eman chon pwärätä mi mwäl a eäni kapas chofana. 18 Mi wor aramas ra fos, nge resap ekieki och. Ekei sokun fos ra akinasa aramas, usun efoch ketilas a akinasa eman. Nge än ekewe chon tipachem kapas ra atoto pöchökül. 19 Kapas mi let repwe nonom tori feilfeilachök, nge kapas chofana repwe chök nonom lon fansoun mochomoch. 20 Ekiekin atuputup a nonom lon leluken chokewe mi ekiekietä mine a ngau, nge chokewe mi alapala kinamwe ra pwapwa. 21 Esor feiengau epwe tori ekewe chon pwüng, nge chomong osukosuk epwe tori ekewe aramasangau. 22 Ewe Samol mi Lapalap a oput ekewe aramas mi chofana, nge a pwapwa ren chokewe mi apasa mine a let. 23 Ekewe aramas mi mirit resap pwärala ar silelap, nge ekewe mi tiparoch ra asilefeili ar umwes. 24 Eman mi achocho le angang epwe nemenem, nge eman mi chipwang epwe wisen föri angangen kinroosi. 25 Än eman aramas öürek lon lelukan a afisätä lolilen, nge eu kapas pwetete a apwapwai i. 26 Eman chon pwüng a kul seni mine a ngau, nge ekewe aramasangau ra fetal won ewe alen mwälechela. 27 Eman aramas mi chipwang esap wor liapan man, nge eman mi achocho le angang epwe angei wöü mi aüchea. 28 Ewe alen pwüng a alelong lon manau, nge ewe alen föföringau a alelong lon mäla.