1 Iei alon ewe Samol mi Unusen Manaman, “Ämi souasor kana, iei ai allük ngenikemi: 2 Oupwe asamoluei. Nge are ousap mochen aüselinga mine üa ürenikemi, mürin üpwe awarato anümamau womi o anümamaua feiöchümi kewe. Ellet, üa fen anümamaueer pokiten ousap ekieki ai kewe kapas lon lelukemi. 3 Nengeni, üpwe apwüngü mwirimwirimi kewe, üpwe tofi ngeni won mesemi kiten enen ämi kewe mönün asor o atowukemi seni fän mesei. 4 Ren ei oupwe silei pwe üa tinala ei allük ngenikemi, pwe ai we pwon ngeni ekewe mwirimwirin Lefi epwe nüküchar. ✡ Num 3.11-13 5 Ai we pwon ngeniir eu pwonen manau me kinamwe. Üa ngeniir manau me kinamwe pwe repwe eäni menin. Iwe, ra meninitiei o niuokusitiei. ✡ Num 25.12 6 Ra aiti ngeni aramas mine a let, nge resap apasa och mi mwäl. Ra etiei le fetal fän kinamwe me wenechar, nge ra akulu letipen chomong aramas pwe resap föri tipis. 7 Pun wisen eman souasor, epwe aiti ngeni aramas mine repwe silei Kot ren. Repwe feito ren pwe repwe kaiö seni, pun i eman chon künö nöün ewe Samol mi Unusen Manaman. 8 Nge ämi oua kul seni ewe al mi pwüng. Chomong aramas ra chepetek ren lapalapen ämi aiti ngeniir ekewe allük. Oua pwal atai ewe pwon üa eäni ngenikemi. 9 Iei mine üpwe föri pwe ekewe aramas meinisin repwe turunufaseekemi o aücheangauakemi, pokiten ousap föri letipei, nge oua pwal lifilifil lon ämi aiti ngeni aramas ekewe allük.”

10 Ifa usun, kich meinisin sisap semeni eman chök Sam? Ifa usun, sap eman chök Kot a förikich? Pwota chök sisap allükülük, eman ngeni eman, nge sia aücheangauei ewe pwon Kot a föri ngeni semelapach kewe? 11 Ekewe chon Juta ra atai ar pwon ngeni Kot o föri föför mi anioput lon Israel me Jerusalem. Ra apiningaua pinin än ewe Samol mi Lapalap leni mi pin a aücheani. Ra pwüpwülü ngeni föpwül mi fel ngeni ekewe koten ekis. 12 Amwo ewe Samol mi Lapalap epwe ärala seni chon Israel iteiten mwän mi föri ei sokun föför fiti aramasan meinisin, inamwo ika epwe uwato asor ngeni ewe Samol mi Unusen Manaman. 13 Iwe, mi pwal wor och oua föri: Oua achöchönü än ewe Samol mi Lapalap rongen asor ren chönün mesemi, ren kechü me ngüngüres, pun i esap chüen ekieki ekewe asor ika etiweer seni lepöümi. 14 Eman a ais, “Pwota esap chüen etiwa ekewe asor?” Pun ewe Samol mi Lapalap a silei pwe ka atai ewe pwon mi fis lefilemi me pwülüom we, lupwen ka alüal. Iwe, en ka kirikiringau ngeni, nge i fen chiechiom me pwülüom fän ewe pwon. 15 Ifa usun, Kot esap förifengenikemi me pwülüom we, pwe oupwe iniseu me ngüneu? Met popun pwe a föri iei usun? Popun pwe epwe wor nöümi mi wesewesen nöün Kot aramas. Iei mine oupwe föröchü pwe esap wor eman leimi epwe atai an pwon ngeni pwülüan. 16 Iei alon ewe Samol mi Lapalap ewe Koten Israel, “Üa oput mwüfesen. Üa oput, are oua föri ei sokun föför mi ngau ngeni pwülüemi. Iei mine oupwe föröchü pwe ousap atai ämi pwon ngeni pwülüemi, nge oupwe allükülük.”

17 Oua aweiresi ewe Samol mi Lapalap ren ämi kapas. Nge oua ais, “Ifa usun äm aweiresi?” Ren ämi apasa, “Aramas meinisin mi föri mine a ngau ra mürina me fän mesen ewe Samol mi Lapalap, i a pwapwaitiir.” Ika ren ämi ais, “Ia a nom ie ewe Kot mi eäni kapwüng fän pwüng?”