14
Eu pworaus usun eu fansoun pwasapwas
14.1-22
1 Iei alon ewe Samol mi Lapalap ngeni Jeremaia usun eu fansoun pwasapwas,
2 “Juta a letipeta, an kewe telinimw ra mwatötö.
Ekewe aramasen Juta ra kechü lepwül,
nge chon Jerusalem ra siö.
3 Ekewe aramas tekia ra akünööla nöür chon angang pwe repwe üfüf koluk.
Ra feila ren ekewe chönüttu,
nge resap künakün koluk.
Ra liwinsefäl fän ar kewe pör mi pöön.
Ra pwölüela mökürer
ren ar apilükingau me rükö.
4 Ewe pwül a sangang,
pun esap püng üt won ewe fanü.
Ekewe chon tanipi ra letipeta
o pwölüela mökürer.
5 Pwal ewe chian lemäl a likitala apanan,
pun esap wor fetil.
6 Ekewe aas mi mwacho ra ütä won ungen ekewe chuk,
ra mwiengas usun ekewe kolak mi mwacho.
Meser a ton,
pun esap wor ener fetil.
7 Nei aramas ra siö ngeniei o apasa,
‘Äm Samol mi Lapalap, kopwe alisikem usun ka pwon ngenikem,
inamwo ika äm föföringau ra atipisikem.
Ellet, äm aia tokola fän chomong o tipis ngonuk.
8 En chök än chon Israel apilükülük,
en chök chon amanauakem lon fansoun riaföü.
Pwota ka usun chök eman chon ekis lon ei fanü,
pwota ka usun chök eman chon siamü mi chök pwini epwin?
9 Pwota ka usun chök eman aramas mi rükö,
ika usun chök eman sounfiu esap wor an tufichin amanaua aramas.
Nge en äm Samol mi Lapalap ka nom rem,
itom a föü wom.
Kosap likitikeemila.’ ”
10 Iei alon ewe Samol mi Lapalap fänäsengesin ekei aramas, “Ra fokun sani ar repwe feil seniei, resap tongeni nemeni pecher. Iei mine ngang üsap etiweer. Üpwe chechemeni ar föföringau o apwüngüür pokiten ar kewe tipis.”
11 Iwe, ewe Samol mi Lapalap a üreniei, “Kosap tüngorei pwe üpwe afeiöchü ekei aramas. 12 Inamwo ika ra echikefel, nge üsap rongorong ar siö. Inamwo ika ra eäni asoren kek me asoren mongö, nge üsap etiweer. Nge üpwe nirela ren maun, ren lengita me mätter.”
13 Mürin üa üra, “Ai Kot Samol mi Lapalap, ka silei pwe ekewe soufos ra üreni ekewe aramas pwe esap wor maun, esap pwal wor lengita, pun en kopwe ngeniir kinamwe esap müchüla me lon ei fanü.” 14 Iwe, ewe Samol mi Lapalap a üreniei, “Ekewe soufos ra eäni itei lon ar osuni mine a chofana. Üsap akünöör, üsap allük ngeniir, üsap pwal kapas ngeniir. Ra kapas ngenikemi usun künaer mi chofana, ar pwee a lomotongau, pun ra püsin ekiekietä.
15 Iei mine ngang ewe Samol mi Lapalap üa apasa fänäsengesin ekewe soufos mi eäni wowo itei lon ar osuni, nge üsap akünöör, ir chokewe mi apasa pwe esap wor maun me lengita epwe tori ei fanü: Üpwe niela ekei soufos ren maun me lengita. 16 Nge ekewe aramas ir ra osuni ngeniir repwe ninnila usun chök ekewe soufos. Somär repwe koturulong lon ekewe alen Jerusalem, nge esap wor eman epwe peiaseniir. Ei epwe fis ngeniir meinisin fiti pwülüer me nöür mwän me fefin. Pun üpwe awarato wor liwinin püsin ar föföringau.
17 Nge en, Jeremaia, kopwe üreni ekei aramas usun om lolilen o apasa,
‘Amwo chönün mesei epwe suputiu lepwin me lerän,
nge esap ükütiu,
pun nei aramas ra feiengau ren eu kinas mi alolol,
ren eu kawet mi fokun watte.
18 Are üa feila ren ekewe mälämäl,
üa küna chokewe mi mäla lon maun.
Nge are üa tolong lon ewe telinimw,
üa küna ekewe mi arap ngeni mäla ren lengita.
Ekewe soufos me souasor ra feila
lon eu fanü resap silei.’ ”
19 Äm Samol mi Lapalap, ifa usun, ka wesewesen likitala Juta?
Ifa usun, ka oput ekewe aramasen Sion?
Pwota ka awatakem
pwe aisap chüen tongeni pöchökülsefäl?
Äm aia ösüküsükü kinamwe, nge esor och mi mürina a torikem.
Aia ösüküsükü eu fansoun aipwe pöchökülsefäl, nge a chök fis niuokus watte.
20 Äm Samol mi Lapalap, äm aia tipis ngonuk.
Aia pwärätä äm föföringau
me än äm kewe lewo föföringau.
21 Kosap oput äm pokiten itom.
Kosap awarato itengau won Jerusalem,
ewe leni ia om lenien mot mi fokun ling a nom ie.
Kopwe chechemeni om pwon ngenikem, nge kosap atai.
22 Ifa usun, a wor eman me lein än chon ekewe mwü kewe anümwäl a tongeni apüngätiu üt?
Ifa usun, ekewe läng ra tongeni püsin apüngätiu üt?
Äm Kot Samol mi Lapalap, äm aia anomu äm apilükülük womw,
pun en ewe mi föri ekei mettoch meinisin.