1 Ou etto, ousipwe köl ngeni ewe Samol mi Lapalap.

Ousipwe mweireir fän pwapwa ngeni Kot ewe mi tümwünükich.

2 Ousipwe feito fän mesan fän kilisou,

ousipwe mweireir fän pwapwa ngeni Kot ren kölün mwareiti i.

3 Pun ewe Samol mi Lapalap eman Kot mi tekia,

eman king mi tekia seni ekewe kot meinisin.

4 Ekewe leni mi alolol won fanüfan ra nom lepöün,

pwal ungen ekewe chuk an.

5 An ewe matau, pun förian,

pwal an ewe fanüpwas, pun afisian.

6 Ou etto, ousipwe chapetiu o fel ngeni,

ousipwe fotopwäsuk fän mesen ewe Samol mi Lapalap ewe chon förikich.

7 Pun i ach Kot,

nge kich nöün aramas i a tümwünü,

kich nöün mwichen sip i a foleni. ✡ Ipr 3.7-11

8 ousap apöchöküla lelukemi usun a fis me lon Meripa,

usun a fis lon ewe rän me lon ewe fanüapö lon Masa, ✡ Ipr 3.15; 4.7

9 lupwen ämi kewe lewo ra sotuniei, ra aleletaei,

nge ra fen küna ai kewe föför üa föri fän iter. ✡ Eks 17.1-7; Num 20.2-13

10 Lon ükükün faik ier üa song ngeni ei täppin aramas o üra,

“Ir eu mwichen aramas mi tokola leluker.

Resap fokun mochen aleasochisi ai kewe allük.”

11 Iei mine üa pwon fän akapel lon ai song

pwe resap tongeni tolong lon ewe fanü

ia üpwe asösöör ie. ✡ Num 14.20-23; Tut 1.34-36; Ipr 4.3,5; Tut 12.9-10