1 Wesin ewe ränin sapat Maria Maktalene, Maria inen James me Salome ra kamö lö pwokus, pwe repwe feila o epiti somän Jesus we. 2 Iwe, lesosorusichin ewe aeuin ränin wiik, lupwen akkar a tötä, ra feila ren ewe peias. 3 Iwe, ra kapasfengen lefiler, “Iö epwe pünüüw ngeni kich ewe fau seni mesen ewe peias?” 4 Nge lupwen ar neneloi ewe peias, ra küna pwe ewe fau mi fokun watte a fen mwöküt seni mesen ewe peias. 5 Iwe, lupwen ar tolong lon ewe peias, ra küna eman alüal mi üföüf echö üf mi pwechepwech, a mot lepelifichin ewe peias me epek. Iwe, ra fokun rükö. 6 Ewe alüal a üreniir, “Ousap rükö, üa silei pwe oua kütta Jesus ewe re Nasaret, ewe mi iräpenges. Esap nom ikei, pwe a manausefälitä. Oupwe katol ewe leni ia ra peiaseni ie. 7 Iei oupwele feila o üreni nöün kewe chon kaiö pwal Petrus, pwe epwe akomwola mwer Kalilea. Ikenan repwe küna i, usun a fen üreniir.” ✡ Mat 26.32; Mark 14.28

8 Iwe, ekewe fefin ra towu seni ewe peias o süla fän ar chechech me rükö. Nge resap apasa och ngeni eman, pun ra niuokus. * Lon ekoch Toropwe mi Pin minen lomlom iei sopolan ewe Pworausen Manau makkeen Markus.

9  † Pwal eu kapasen sopolan minen lomlom 9 [Iwe, ekewe fefin ra feila ren Petrus me chiechian kewe o apworausa ngeniir lon kapas mochomoch meinisin mine ewe alüal a fen kapas ngeniir usun. 10 Mürin ei, püsin Jesus a nöünöü nöün kewe chon kaiö pwe repwe arongafeili seni ötiu tori lotou fisilan ewe kapas mi pin, iei ewe Porausen Manau esemüch.][Mürin än Jesus manausefäl, lesosorusichin aeuin ränin wiik, a akomwen pwä ngeni Maria Maktalene, i neminewe Jesus a atowu ekewe füman anün rochopwak seni. 10 Iei mine a feila o asile ngeni chiechian kewe mi letipeta o kechü usun mine a küna. 11 Nge lupwen ar rongorong pwe Jesus a manau o neminewe a küna, resap lükü i.

12 Mürin ei, Jesus a pwä lon pwal eu sokun lapalap ngeni ruoman me lein ekewe chon kaiö, lupwen ra fetal lemälen ewe fanü. 13 Ekei ruoman ra liwiniti ekewe ekoch chon kaiö o apworausa ngeniir usun mine ra küna. Nge ir resap lüküür.

14 Mürilan meinisin Jesus a pwä ngeni ekewe engol me eman chon kaiö lupwen ra mongöfengen. Iwe, a fönöör pokiten esap wor ar lükülük, ra pwal tipeförea, pun resap lükü alon chokewe ra küna pwe Jesus a manausefäl. 15 Iwe, a üreniir, “Oupwe feila lon unusen fanüfan o afalafala ewe Pworausen Manau ngeni aramas meinisin. ✡ Föf 1.8 16 Iö a lükülük o papatais epwe küna manau, nge iö esap lükülük epwe angei liwinin an tipis. ✡ Föf 1.9-11 17 Iwe, chokewe mi lükülük repwe angei tufich pwe repwe föri ekei manaman: Repwe asüela anün rochopwak fän itei, repwe fos lon kapasen ekis. 18 Are repwe amwöchü serepenit ika ünümi poison, resap feiengau ren. Repwe pwal iseis pöün won chon samau, iwe, repwe pöchökületä.”

19 Mürin än Jesus fos ngeni nöün kewe chon kaiö a feitä läng o mottiu lepelifichin Kot. 20 Iwe, ekewe chon kaiö ra feila o afalafal ekis meinisin. Nge ewe Samol a etiir lon ar angang o anüküchara ar afalafal pwe a let ren ekewe manaman ra föri.]