1 Me lom, lupwen chon ewe ainangen Efraim ra kapas, chon ekewe lusun ainang ra niuokus, pun chon ewe ainangen Efraim ra fokun tekia me lon Israel. Nge ra tipis ren ar fel ngeni ewe anü Paal, iei mine repwe mäla. 2 Iwe, iei ra chök alapala ar tipis o föri fän iter uluulun anümwäl seni mächä, uluulun anümwäl seni ar silifer, meinisin förien ekewe souangang mi sipeöch. Mürin ra apasa, “Oupwe asor ngeni ekei uluulun anümwäl.” Pwota aramas ra tongeni mitiri ekewe uluulun nienifön kow? 3 Iei mine repwe müttir morola usun toputopun lesosor ika amurenipwin. Repwe pwal wewe ngeni pön wiich asepwäl a ässala seni ewe lenien wichiwich umwun wiich, ika usun ötüöt mi ötüwu seni eu asammwacho.

4 Iwe, ewe Samol mi Lapalap a apasa, “Ngang ewe Samol mi Lapalap ämi we Kot mi emwenikemiiwu seni ewe fanü Isip. Ousap silei eman Kot lüki, ngang echök ämi Chon Amanau. 5 Ngang ewe mi tümwünükemi lon ewe fanüapö, lon ewe fanü mi pwasapwas. 6 Nge lupwen oua tolong lon ewe fanü mi mürina, oua momongö o mötüla. Nge lupwen oua mötüla, oua lamalamtekia o manlükieila. ✡ Tut 8.11-17 7 Iei mine üpwe mweterikemi usun eman laion, üpwe operikemi ünükün alemi kewe usun ewe man itan lepart. 8 Üpwe fiu ngenikemi o atatakisikemi usun mine eman pear a föri, lupwen aramas ra angei seni apanan kana. Ikenan üpwe oromikemiila usun eman laion a oromala liapan, üpwe atatakisikemi usun eman manmwacho a atatakisi liapan.

9 Üpwe afeiengauakemi, ämi chon Israel, pun oua ü ngeniei ngang ewe chon alisikemi. 10 Ifa i ämi we king epwe amanauakemi? Ikafa ir nöümi kewe souemwen lon ämi kewe telinimw, chokewe oua tüngor pwe repwe nöümi king me samol? ✡ 1.Sam 8.5-6 11 Ngang üa ngenikemi eman king fän ai song, nge üa angeesefäli fän ai lingeringer. ✡ 1.Sam 10.17-24; 15.26

12 Än Israel föföringau me tipis a makeetiu lon toropwe o iseisela. 13 Israel a tongeni manau, nge a fokun tiparoch, pun esap mochen angei ewe manau. A wewe ngeni eman mönükol mi tori fansoun an epwe towu seni letipen inan, nge esap mochen. 14 Üpwe fokun amanaueer seni ewe lenien sotup. Üpwe angaseer seni ewe manamanen mäla. En mäla, ifa om kewe mätter? En lenien sotup, ifa om afeiengau?

Usap chüen tongei ekei aramas. ✡ 1.Kor 15.55 15 Inamwo ika Israel epwe mämäritä usun ekewe wowo, üpwe tinato eu asepwälin ötiu, epwe enito seni ewe fanüapö. Epwe amorätä an kewe puächen koluk me an kewe chönüttu. Aramas repwe angei fän pöchökül an kewe pisek aüchea meinisin seni an we lenien iseis. 16 Ekewe aramasen Samaria repwe angei liwinin ar kewe tipis, pun ra ü ngeniei. Repwe mäla lon maun, nöür kewe semirit repwe tatakis, nge ekewe fefin mi pwopwo epwe tiletil luker.”