1 Ai Kot, kopwe aüselinga ai iotek,

kosap asorongorongola seni ai tüngor.

2 Kopwe rongorong ngeniei o palüeniei.

Ai osukosuk a fokun aweiresiei.

3 Üa fokun niuokus ren än chon oputaei eniwaei,

pwal ren än ekewe aramasangau ariaföüüei.

Ra aweiresiei,

nge lon ar song ra fokun oputaei.

4 Lelukei a fokun riaföü, niuokusun mäla a toriei.

5 Niuokus me chechech ra feitiu woi,

nge niuokus watte a pwölüeila.

6 Iwe, üa apasa, “Amwo epwe wor pöükässi usun pöükässin eman lisom.

Üpwe ässila o kütta ai lenien asösö.

7 Ewer, üpwe ässila toau o nonom lon ewe fanüapö.

8 Üpwe müttir le kütta ana ie üpwe op ie

seni ewe asepwäl watte me ewe mölümöl.”

9 Ai Samol, kopwe afitikokoi än ekewe aramasangau kapas.

Pun üa küna ar föförün mwäneson me ar aninifengen lon ewe telinimw.

10 Lerän me lepwin ra pwelifetalei me won tittin ewe telinimw.

Pwüngingau me weires ra nonom lon,

11 feiengau a nom ekis meinisin,

nge angangen ariaföü me atuputup ra chök fifis lon ekewe al.

12 Are eman chon oputaei epwe ämängauaei,

üpwe tongeni engila fan.

Are eman chon ü ngeniei epwe turunufaseei,

üpwe tongeni op seni.

13 Nge en, chienei, pwal pwii mi achengicheng,

en ätewe mi föri iei usun ngeniei.

14 Kich sa pwapwa le akapworausfengen,

sa pwal fetalepök ngeni imwen Kot pwe sipwe fel ngeni.

15 Amwo mäla epwe müttir tori ekewe chon oputaei,

amwo repwe feilmanauetiu lon lenien sotup.

Pun ngau a nom lon lenier pwal lon leluker.

16 Nge ngang üa siö ngeni Kot.

Iwe, ewe Samol mi Lapalap epwe amanauaei.

17 Lekuniol me lesosor pwal leoloas

üa apasätä ai kewe weires o ngüngü.

Iwe, Kot epwe rongorong mweliei.

18 Epwe angasa manauei,

pwe üpwe tongeni liwiniti fän kinamwe seni ewe maun üa eäni,

inamwo ika chomong aramas ra ü ngeniei.

19 Kot ewe mi mot won an lenien motun king seni me lomlom

epwe aüselingaei o akufuur,

pun resap mochen siwili ar föför,

resap pwal niuokusiti Kot.

20 Chienei we me lom a fiu ngeni chiechian

o ataela an we pwon.

21 An fos a mwotoutou seni pwötö,

nge ekiekin maun a nom lon lelukan.

An kewe kapas ra pwetete seni lö,

nge ra ken usun chök kenin ekewe ketilas.

22 Kopwe monätä won ewe Samol mi Lapalap om weires,

pwe i epwe tümwünuk.

Esap fokun mwütätä pwe ewe chon pwüng epwe kuf.

23 Nge en, ai Kot, kopwe aturätiu lon ewe lenien sotup ekewe chon nimanauei aramas me ekewe chon atuputup

mwen esamwo tori esopun manauer.

Nge ngang üpwe anomu ai apilükülük womw.