1 Iwe, ewe Samol mi Lapalap a üreni Josua, “Kosap niuokus ika rükö. Kopwe feila o maun ngeni Ai, nge ekewe sounfiu meinisin repwe etuk. Nengeni, üa atolonga fän nemeniom ewe kingen Ai me nöün aramas, an telinimw me fanüan. 2 Iwe, kopwe föri ngeni Ai me an king usun mine ka fen föri ngeni Jeriko me an king. Nge liapemi me ekewe manfetal oupwe püsin angei pwe choon wokumi. Oupwe operi ewe telinimw me pelilotoun.”

3 Iei mine Josua me ekewe sounfiu meinisin ra feitä Ai. Iwe, Josua a filätä ükükün ilik ngeröü sounfiu mi pöchökül me pwora o tinirela lepwin. 4 Nge a allük ngeniir, “Oupwe operi ewe telinimw me lepelilotoun. Ousap toau seni, nge ämi meinisin oupwe chök molotä. 5 Iwe, äm me ekewe aramas meinisin mi nom rei aipwe fetaliti ewe telinimw. Nge lupwen chon ewe telinimw repwe towu pwe repwe fiu ngenikem usun me mwan, äm aipwe sü me mwer. 6 Iwe, repwe towu o cherikem tori aipwe panirela toau seni ewe telinimw. Repwe ekieki pwe aia sü me mwer usun me mwan. 7 Mürin ämi oupwe ütä seni ämi lenien op o tolong lon ewe telinimw, pun ewe Samol mi Lapalap ämi we Kot epwe atolonga lepöümi. 8 Iwe, lupwen oupwe liapeni ewe telinimw, oupwe kenala, pun iei usun ewe Samol mi Lapalap a allük. Oupwe pii pwe oupwe föri mine üa allük ngenikemi.” 9 Mürin, Josua a tinirela. Iwe, ra feila ren ewe lenien op o witiwit pelilotoun Ai lefilen Petel me Ai. Nge Josua a nom ren ekewe aramas lon ewe pwinin.

10 Iwe, Josua a pwätä lesosorusich o körifengeni ekewe sounfiu. Mürin a akomwola mwer, nge ekewe souakomwen Israel ra eti. 11 Iwe, ekewe sounfiu meinisin mi eti ra kan ngeni mwen ewe telinimw o asösö peliefengin Ai, nge eu lemol a nom lefiler me Ai. 12 Iwe, Josua a angei ina epwe ükükün limungeröü mwän o anomuur lon eu lenien op pelilotoun ewe telinimw lefilen Petel me Ai. 13 Iei usun ra alenia ekewe sounfiu: Ewe mwich mi watte a nom peliefengin ewe telinimw, nge ewe mwich mi op a nom pelilotoun. Nge Josua a nom lon ewe lemol lon ewe pwinin. 14 Iwe, lupwen ewe kingen Ai a küna ekewe re Israel, ir me mwänin ewe telinimw meinisin ra müttir towu lesosor o feila ren ewe lemolun Jortan, pwe repwe maun ngeniir. Nge ewe king esap silei pwe mi wor chon op lükisökürün ewe telinimw. 15 Mürin, Josua me ekewe re Israel meinisin ra tipin timär o sü ngeni ewe fanüapö. 16 Iei mine ekewe meilapen ewe telinimw ra körifengeni ekewe aramas meinisin mi nom lon, pwe repwe tapweri ekewe re Israel. Nge lupwen ra tapweri Josua, ra toauala seni ewe telinimw. 17 Esap wor eman mwän mi chüen nom lon Ai ika Petel, pwe meinisin ra tapweri chon Israel. Ra sukala chök asamalapen ewe telinimw o likitala, nge esap wor eman a mamasa.

18 Iwe, ewe Samol mi Lapalap a üreni Josua, “Kopwe aitietä wokum siles ngeni Ai, pun üpwe atolonga ewe telinimw lepoum.” Iwe, Josua a aitietä wokun siles ngeni ewe telinimw. 19 Lon ewe otun ewe mwichen chon op a müttir ütä seni lon lenier, ra sälong lon ewe telinimw o liapeni. Iwe, ra müttir kenala ewe telinimw. 20 Nge lupwen ekewe re Ai ra nenesökür, ra küna ötüötün ekkei seni ewe telinimw mi ötütä läng. Iwe, esap chüen wor ia repwe süla ie, pun ekewe re Israel mi sü ngeni ewe fanüapö ra kul o fiu ngeni ekewe re Ai mi tapweriir. 21 Pun lupwen Josua me ekewe re Israel meinisin ra küna ötütän ekkei seni ewe telinimw pokiten ekewe chon op ra liapeni o kenala, ra kul o niela ekewe re Ai. 22 Mürin, ekewe re Israel mi nom lon ewe telinimw Ai ra towu pwe repwe maun ngeni ekewe re Ai. Iei usun ekewe re Israel ra pweliela ekewe re Ai ekoch me epek, nge pwal ekoch me ewe epek. Iwe, ekewe re Israel ra nirela tori esap chüen wor eman mi manau, esap pwal wor eman a tongeni süla. 23 Nge ewe kingen Ai ra amanaua o emwenato ren Josua.

24 Iwe, ekewe re Israel ra niela ekewe re Ai meinisin me lon ewe fanü mi amassawa ia ra tapwerirela ie. Mürin, ra liwinsefäl ngeni Ai o niela chon meinisin. 25 Iwe, unusen aramasen Ai meinisin ra mäla lon ewe ränin ükükün engol me ruungeröü. 26 Pun Josua esap aitietiu pöün mi amwöchü wokun siles, tori chon Ai meinisin ra rosola. 27 Nge ekewe chon Israel ra angei ekewe man me ekewe pisek seni ewe telinimw pwe choon wokur, pun iei usun ewe Samol mi Lapalap a allük ngeni Josua. 28 Iwe, Josua a kenala Ai o awili ngeni eu ioien mettoch mi tatakis, usun a nom tori ikenai. 29 A pwal forusi ewe kingen Ai won efoch irä tori lekuniol. Nge lupwen akkar a tuputiu, Josua a allük pwe repwe apichätiu inisin me won ewe irä. Iwe, ra moneetiu leasamalapen ewe telinimw o achukuchukätä won eu ioien fau mi watte a nom tori ikenai.

30 Iwe mürin, Josua a senätä eu rongen asor ngeni ewe Samol mi Lapalap ewe Koten Israel me won ewe chuk Epal. ✡ Eks 20.25 31 Ewe rongen asor a för seni fau resap fal, esap wor eman a aea pisekin angang seni mächä wor, usun mine Moses nöün ewe Samol mi Lapalap we chon angang a allük ngeni chon Israel, pwal usun a mak lon ewe puken allük me ren Moses. Iwe, ra eäni asoren kek ngeni ewe Samol mi Lapalap won, pwal asoren kinamwe. 32 Iwe, ikenan me fän mesen ekewe aramasen Israel, Josua a makei won ekewe fau ekewe allük Moses a fen makei me mwan. ✡ Tut 27.2-8 33 Iwe, ekewe chon Israel meinisin, ekewe souakom, ekewe meilap pwal ekewe soukapwüng fiti ekewe chon ekis mi nom rer ra ütä lepekin ewe pworofel me rüepek fän mesen ekewe souaso ir mwirimwirin Lefi mi mwärei än ewe Samol mi Lapalap we pworun pwon. Esopun ar mwich a ütä o sap ngeni ewe chuk Keresim, nge esop a ütä o sap ngeni ewe chuk Epal. Moses nöün ewe Samol mi Lapalap we chon angang a allük me lepoputän pwe repwe föri iei usun, lupwen repwe angei ewe feiöch. 34 Mürin, Josua a aleani kapasen ewe allük meinisin, kapasen ewe feiöch me kapasen ewe anümamau, usun meinisin mine a mak lon ewe puken allük. 35 Iwe, esap wor eu kapas Josua a likiti seni ekewe kapas meinisin Moses a allük, pwe a aleaniir meinisin me fän mesen unusen ewe mwichen chon Israel, me fän mesen ekewe fefin, ekewe semirit me ekewe chon ekis mi nom rer. ✡ Tut 11.29; 27.11-14