1 Ikkei iteiten ekewe mwänirelan än semer kewe cho me chokewe mi makelong iter lon ewe iteit ra etiei le feila seni Papilon o liwinla Jerusalem lon mwün ewe king Artaksasta: 2 Seni ekewe mwirimwirin Pinehas: Kersom, seni ekewe mwirimwirin Itamar: Taniel, seni ekewe mwirimwirin Tafit: Hatus nöün Sekania. 3 Seni ekewe mwirimwirin Paros: Sekaraia fiti ükükün ipükü lime mwän mi makelong iter lon ewe iteit. 4 Seni ekewe mwirimwirin Pahat-moap: Eliehonai nöün Seraia, nge ruupükü mwän ra eti. 5 Seni ekewe mwirimwirin Satu: Sekania nöün Jahasiel, nge ülüpükü mwän ra eti. 6 Seni ekewe mwirimwirin Atin: Epet nöün Jonatan, nge lime mwän ra eti. 7 Seni ekewe mwirimwirin Elam: Jesaia nöün Atalia, nge fik mwän ra eti. 8 Seni ekewe mwirimwirin Sefatia: Sepatia nöün Mikael, nge walik mwän ra eti. 9 Seni ekewe mwirimwirin Joap: Opatia nöün Jehiel, nge ruupükü engol me waluman mwän ra eti. 10 Seni ekewe mwirimwirin Pani: Selomit nöün Josifia, nge ipükü wone mwän ra eti. 11 Seni ekewe mwirimwirin Pepai: Sekaria nöün Pepai, nge rüe me waluman mwän ra eti. 12 Seni ekewe mwirimwirin Askat: Johanan nöün Hakatan, nge ipükü engol mwän ra eti. 13 Seni ekewe mwirimwirin Atonikam, ir chokewe mi liwinla Jerusalem lon eu fansoun mürin, iter: Elifelet, Jeuel me Semaia, nge wone mwän ra etiir. 14 Seni ekewe mwirimwirin Pikwai: Utai me Sakur, nge fik mwän ra etiir.

15 Iwe, üa amwichafengeni ekei aramas arun ewe chanpupu mi pupu ngeni ewe telinimw Ahawa. Ikenan aia nonom lon ükükün ülüngat rän. Iwe, lupwen üa nenengeni ewe mwichen aramas, üa küna pwe mi wor souasor leir, nge esap wor eman chon ewe ainangen Lefi. 16 Mürin üa titi ekewe souemwen Elieser, Ariel, Semaia, Elnatan, Jarip, Elnatan, Natan, Sekaria me Mesulam, üa pwal titi Joiarip me Elnatan, ir mwän mi silelap. 17 Iwe, üa tinirela ren Ito ewe souemwen lon ewe leni Kasifia o üreniir, pwe repwe tüngor ngeni Ito me pwin kewe ekewe chon angang ngeni ewe imwenfel, pwe repwe tinato rem chon angang ngeni Kot lon ewe imwenfel. 18 Iwe, pokiten äm we Kot a ümöümöch ngenikem, ra tinato rem eman mwän mi sipeöch le angang itan Serepia fiti nöün kewe mwän me aramasan ükükün engol me waluman. Iwe, Serepia eman mwirimwirin Mali, nge Mali nöün Lefi, nge Lefi nöün Israel. 19 Ra pwal tinato Hasapia me Jesaia, ir mwirimwirin Merari, fiti pwiir me nöür kewe ükükün rüe. 20 Iwe, ruupükü rüe chon angang ngeni ewe imwenfel ra pwal chu ngeniir, ir mwirimwirin chokewe Tafit me nöün kewe nöüwis ra awisa pwe repwe alisi ekewe mwän seni ewe ainangen Lefi. Ir meinisin a makelong iter lon ewe iteit.

21 Mürin üa asilefeili me arun ewe chanpupu Ahawa pwe epwe fis eu ränin echikefel, pwe aipwe atekisonakem me fän mesen äm we Kot o tüngor ngeni pwe epwe emwenikem lon äm sai o tümwünükem me nöüm pwal pisekim meinisin. 22 Pun üa säw le tüngorei ewe king eu mwichen sounfiu me chon wawa oris repwe tümwünükem won alem seni chon oputakem, pokiten üa üreni ewe king pwe äm Kot a afeiöchü meinisin mi lükü i, nge an song mi watte a tori meinisin mi likitala i. 23 Iei mine aia echikefel o tüngormau ngeni äm Kot pwe epwe tümwünükem. Iwe, a aüselinga äm iotek.

24 Mürin üa filätä me lein ekewe souemwenin souasor engol me ruoman: Serepia me Hasapia me engol pwiir. 25 Iwe, üa kiloni ewe silifer, ewe kolt me ekewe pisek o ngeniir. Ekei mettoch ewe king me nöün kewe chon öüröür pwal nöün kewe samol me chon Israel meinisin mi nonom ikenan ra fang ngenikem pwe ar asor ngeni imwen äm we Kot. 26 Iei ükükün mine üa ngeniir: ina epwe ükükün rüe me limu ton silifer, ina epwe ükükün ülüngat esop ton pisek seni silifer, pwal ina epwe ükükün ülüngat esop ton kolt, 27 rüe sepi seni kolt choun ina epwe ükükün engol me tiu paun me ruu sepi seni piras mi mürina o ling, ra aüchea usun sepi seni kolt. 28 Iwe, üa üreniir, “Ämi oua pin fän iten ewe Samol mi Lapalap, pwal ekei pisek ra pin. Ewe silifer me kolt eu asor mi fis seni mochenin letipen aramas ngeni ewe Samol mi Lapalap än ämi kewe lewo we Kot. 29 Oupwe tümwünüöchü ekei pisek tori oua kiloniir lon rumwen imwen ewe Samol mi Lapalap me mwen ekewe souemwenin ekewe souasor me ekewe mwän seni ewe ainangen Lefi, pwal me mwen mwänirelan än semer kewe cho lon Israel mi nom lon Jerusalem.” 30 Iei mine ekewe souasor me ekewe mwän seni ewe ainangen Lefi ra angei ewe silifer me ewe kolt pwal ekewe pisek mi kilo, pwe repwe uwala Jerusalem lon imwen äm we Kot.

31 Iwe, lon engol me ruuen ränin ewe aeuin maram aia feil seni ewe chanpupu Ahawa pwe aipwe feila Jerusalem. Iwe, äm we Kot a etikem o tümwünükem seni ekewe chon oputakem, pwal seni ekewe chon solä mi nom won ewe al. 32 Iwe, lupwen äm aia tori Jerusalem, aia asösö lon ükükün ülüngat rän. 33 Nge lon ewe arüanün rän aia feila lon imwen äm we Kot o kiloni ewe silifer me ewe kolt pwal ekewe pisek, o ngeni ewe souasor Meremot nöün Uria, nge Eleasar nöün Pinehas a nom ren, pwal ekewe mwän seni ewe ainangen Lefi iter Josapat nöün Jesua me Noatia nöün Pinui. 34 Iwe, ekewe pisek meinisin ra lea o kilo, nge chour a makelong lon eu puk.

35 Lon ewe fansoun chokewe mi liwinto seni ar oola ra eäni asoren kek ngeni ewe Koten Israel ükükün engol me ruoman ätemwänin kow fän iten chon Israel meinisin, tiwe me wonoman ätemwänin sip me fik me füman nienifön sip, pwal engol me ruoman ätemwänin kuuch fän iten asoren tipis. Ekei mönün asor meinisin ra eäni asoren kek ngeni ewe Samol mi Lapalap. 36 Iwe, ra pwal angei ewe toropwe seni ewe king o ngeni nöün ewe king kewe sounemenem me ekewe kepinan ewe fanü lotoun ewe chanpupu Oifrat. Mürin ir ra atowu ar alilis ngeni ekewe aramas pwal ngeni ewe imwen Kot.