22
Än Tafit kölün kilisou ren an ngasala
22.1-51
(Kölf 18)
1 Iwe, Tafit a eäni ei köl ngeni ewe Samol mi Lapalap lon ewe rän ewe Samol mi Lapalap a angasa i seni chokewe meinisin mi oput, pwal seni Saul.
2 A apasa, “Ewe Samol mi Lapalap ai achau,
i imwei imwen maun pwal i chon angasaei,
3 ai Kot ai achau ewe ia üa op ie.
A epeti seniei feiengau usun eu tittin maun,
a peniei o tümwünüei.
I ai chon amanau,
a tümwünüei o amanauaei seni föförün mwäneson.
4 Üa kökköri ewe Samol mi Lapalap,
ewe mi fich ngeni ach sipwe mwareiti.
A amanauaei seni chokewe mi oputaei.
5 Ekewe nonoon mäla ra pwelifeiliei,
ekewe öütöüten feiengau ra puitiei,
6 ekewe feiengauen lenien sotup ra pwelifeiliei,
ekewe likatupun mäla ra mochen säräei.
7 Üa kökköri ewe Samol mi Lapalap lon ai riaföü,
üa siö ngeni ai Kot pwe epwe alisiei.
A rongorong mweliei seni lon imwan imwenfel
o aüselinga ai siö ngeni.
8 Iwe, fanüfan a chechech o mwöükük,
nge longolongun läng a chechech o chüngüchüng
pokiten än Kot song.
9 Ötüöt a ötüwu seni lon pwötün,
nge ekkei lapalap a ngetewu seni lon awan,
pwal moch mi sarara a küwu seni.
10 A tinenifeseni läng o feitiu.
Kuchuchol ra nom fän pechen.
11 A wawa eman kerop o äs,
a müttir feito won pöükässin asepwäl.
12 A pwölüela ngeni inisin rochopwak,
kuchu mi malul o uren koluk ra pwelifeili.
13 Moochen ekkei a küwu seni lon ewe saramaram mi nom mwan.
14 Ewe Samol mi Lapalap a apüngü chopulap seni läng,
ewe mi Unusen Tekia a aronga mwelian.
15 A esefichala wokun kewe föün esefich o atoropasa chon oputan,
a afifi ngeniir inefi o asürela.
16 Mürin, epin matau a pwä,
longolongun fanüfan a lingetä,
lupwen ewe Samol mi Lapalap a apwüngü chon oputan
o leüömong ngeniir fän an song.
17 Iwe, ewe Samol mi Lapalap a angetiu seni won ewe leni mi tekia o amwöchüei,
a efieitä seni lon ekewe koluk mi alolol.
18 A angasaei seni chon pälüeniei mi pöchökül,
seni chokewe mi oputaei,
pun ra kon pöchökül ngeniei.
19 Iwe, ra münitiei lon ränin ai feiengau,
nge ewe Samol mi Lapalap a tümwünüei.
20 A emwenieiwu lon eu leni mi chölap,
a angasaei, pun a pwapwa rei.
21 Ewe Samol mi Laplap a liwiniöchüei, pun üa föri mine a pwüng,
a afeiöchüei, pun esap wor ai tipis.
22 Üa aleasochisi än ewe Samol mi Lapalap kewe allük,
nge üsap rik seni ai Kot ren och föför mi ngau.
23 Üa apwönüetä an kewe allük meinisin,
nge üsap aleasolap ngeni an kewe pwüüng.
24 A silei pwe esap wor ai mwäl,
pwe üa püsin tümwünüei seni tipis.
25 Iei mine ewe Samol mi Lapalap a liwiniöchüei, pokiten üa föri mine a pwüng.
Pun a silei pwe esap wor ai tipis.
26 Ai Samol mi Lapalap, ka allükülük ngeni ir mi allükülük,
ka pwal pwärätä om unusen pwüng ngeni ir mi unusen pwüng.
27 Ka pwärätä om limelimöch ngeni ir mi limelimöch,
nge ekewe mi por manauer ka pwärätä om pöchökül ngeniir.
28 Ka angasa aramas mi tipetekison,
nge chokewe mi lamalamtekia ka atekisoneretiu.
29 Ewer, ai Samol mi Lapalap, en ai saram,
en ai Kot ka awili ai rochopwak ngeni saram.
30 Ewer, ren om alisiei üa tongeni fiu ngeni ekewe chon oputaei,
ren en, ai Kot, üa tongeni mwet won eu tit.
31 Än Kot kewe föför ra unusen pwüng,
Än ewe Samol mi Lapalap kapasen pwon ra let,
i a usun chök eu tittin maun
fän iten chokewe meinisin mi op ren.
32 Ewe Samol mi Lapalap i chök Kot.
Kot echök ach achau.
33 Ei Kot ai lenien op mi pöchökül,
i ewe mi anükünüköchü ai al.
34 A amüttiriei usun müttirin chia,
a pwal aleniöchüei won ekewe leni mi tekia. ✡ Ipr 3.19
35 A asipaei ngeni maun,
pwe üa tongeni pworefengeni efoch esefich seni piras.
36 Ai Samol mi Lapalap, ka amanauaei o epeti seniei feiengau,
om alilis a atekiaeitä.
37 Ka achölapa ewe al üa fetal won,
pwe pechei esap mit.
38 Üa tapweri chon oputaei o akufuur.
Üsap kulsefäl seniir tori ra rosola.
39 Üa atururela pwe resap chüen tongeni ütä.
Ra turula arun pechei.
40 Ka ngeniei pöchökül pwe üa tongeni maun,
ka pwal akufu me mwei ekewe chon ü ngeniei.
41 Ka föri pwe ekewe chon pälüeniei ra sü seniei,
üa arosala chokewe mi oputaei.
42 Ra nenefetalei iö epwe alisiir, nge esap wor eman a amanaueer.
Ra siö ngeni ewe Samol mi Lapalap, nge esap pälüeniir.
43 Üa üsiir pwe ra usun chök pipisüsü,
üa atatakisiir o ipweriretiu usun pwakaken lon ekewe al.
44 En ka angasaei seni ekewe aramas mi ü ngeniei,
ka seikieitä pwe üpwe samolun ekewe mwü.
Ekewe aramas üsap sileer me mwan ra nom fän nemeniei.
45 Chon ekis ra feito o chapetiu mwei,
ra aleasochisiei lon ewe otun ra rong mweliei.
46 Chon ekis ra apilükingau,
ra towu seni ar kewe lenien maun mi pöchökül fän chechech.
47 Ewe Samol mi Lapalap a manau. Üa mwareiti ai achau,
üa ingeiti ai Kot mi amanauaei.
48 Kot a atufichiei pwe üpwe ngeni chon oputaei chappen ar föför,
a anomu fai aramasen ekewe mwü.
49 A amanauaei seni ekewe chon pälüeniei.
En ai Samol mi Lapalap ka atekiaeitä asen ekewe chon ü ngeniei
o angasaei seni ekewe aramas mi mwäneson.
50 Iei mine üpwe ingemwareituk me lein chon ekewe mwü.
Ai Samol mi Lapalap, üpwe kölün mwareituk. ✡ Rom 15.9
51 Kot a awinna nöün we king ngeni eu win mi lapalap
o pwäri an tong ellet ngeni nöün we mi kepit,
ngeni Tafit me mwirimwirin kewe tori feilfeilachök.”