JOEL
THEMGAO LEKHABU
Joel Lekhabu Sung Thu Umdan
Israelte thusim’a muthim phat kahlah khat sung chun, Joel in hahsa tah in Pathen henga thu alhut in, amitetoh akah’a kiguijopna aum theina ding ana ngaiton ahi. Umchan phalou milim hou chonsetna’a ko thutanna lhung tei ding ahiti ahen, ahivang in Joel chun gihsalna le manthahna chule gotna khel lam’a Pathen thutep mukit ding in achen ahi. Hichea chu Pathen in amite chunga Lhagao ahin buhlhah theina ding ahi. Numei le pasal hihen, khangthah le khanglui hijongleh (2:28-29), Pathen thahatna jouse toh giltah’a kitimat naleh kiloikhomna aumdoh kittheina din ataovin ahi.
Hiche lekhabua thu kisei ho nasimdoh’a kon Pathen in nangma hinkhoa jong nahin kou teng kiging phan. Ajeh chu Joel lekhabu hin Pathen in nakouna nageldoh sah kit nom ahi. Aman na ngailut ding adeijin, Aman na hinkho adeijin, Aman kiloikhompi ding in na gelkhoh lheh jeng’e. Chonset bolna ding in mun a-ongpoi, ahinlah kicha hih in. Thu kiseiho, achesa leh ahung lhung ding ho akicheh’e. “Na Pakai na Pathen henga hung kile kit in, ajeh chu Ama mihepi them, lunghang vahlou ahi,” (2:13).
Lekhabu Jihpa Chule Itih Kum’a Ana Jih Ham?
Hiche lekhabu hi Pathen Themgao Joel in ana jih ahi. Mi abangkhat seidan in, Israel chate Babylon mun’a soh-a akaimong’u 538 BC ahung kile kit jou-uva kisun hinte atiuvin ahi, hinlah Joel in Leng ho minphah louva, upa hon alamkai banga asei jeh in (1:2), abangkhat chun 835 BC masang vel-a Joash Judate lengpa chapang cha ahilai hinte atiuve,”(2 Kings 11:21).
1
Khaokho Ten Gamsung Anehchai
1 Pakaiyin hiche thuhi Pethuel chapa Joel henga anasei ahi. 2 Hiche thuhi ngaijun, nangho mipite chunga lamkaihon ngaijun, gamsung’a cheng jousen, Na thusimuva hitobang hi sohkha mong nam? 3 Hitobang thu hunglhung ding hi nachateu henga seipeh’un, chule nachateuvin jong achateu heng’a aseipeh son dingu ahi. Thusim hi akhang akhanga kiseipeh son peh ding ahi. 4 Khaokhopin anche louhing aneh jouvin, amoh cheng Khaokhopi chom dangin anekit in, abankit in jong khaokho danghon anen akichainan jong khaokhopi chom khat in anekit in ahi. 5 Khangun, nangho jukham ho, chuleh kapun, na kamsunguva ju lhumkei akisuh mong jeh'in, judon hat jouse kap sohkeijun. 6 Ka galmite simsen lou gal sat dingin kagam sunga ahung kitollut tan ahi, hattah ahiuvin, atam dan ajat jong simsenlou ahiuvin, aha-ujong ahemdan keipi bahkai ha abangin ahi. ✡ Rev 9:8 7 Ka lengpi lei le ka theichang phung jouse jong eisuh gampeh tauvin ahi, abahgeijin amalngimun agolhasoh heltan tai. 8 Avoma kijem nungah jinei joutil kabangin, 9 Pakai Houin sunga lhosoh leh Lengpiga thilto hojong abeisohtan, hijeh chun Pakai Thempu kin bolla pang lhacha ho jong alunghem gamtauvin ahi, chuleh Pakai Thempuho jong akaptauve. 10 Loulai jouse jong aki sugamsohin, gamsung jong abeitai, gasoh jouse jong aki sumong sohtan, lengpithei jong aga tapon chuleh olive thao jong akichai gam tai. 11 Vo loulhouho kinepna beijin lunglhauvin, Vo lengpilei lhouho, puldouvun Kapun, ajeh chu loulaija gasoh suhlouchang leh sakol chang abeitah jeh'in, 12 Lengpigui agop tan chuleh theichang phung agop lhatan, kolbuthei phung, tum phung chuleh theithup phung, chule thingga phung jouse agop lhasoh tan, mijouse kipana jong agop lhasohtan ahi.
Gamsung Lunghemna
13 Nangho thempuho jousen khaodip pon sillin kivonun lang, Pakai kinbol Jousen jan teng maicham phunga hungun, kap’un, ajeh chu na Pathen Hou-in a na lhosoh thilto ding leh lengpitwi thilto ding abeisohtan ahi. 14 An ngolding phongdoh un, Pakai Hou-in sung leh gamsung a mipite lultahin kou khomun, gamsunga lamkaiho jouse koukhomun, chuleh hichea chun kap jahuvin. 15 Pakai nikho ahung naitai, Pakai hatchungnunga konin manthahna nikho chu ahung lhung’e. ✡ Isa 13:6 16 Eima ho mitmu taha inehdiu kisumong hilou hija, I-Pathen’u hou-in a kona kipa leh thanopna jouse beisoh hilou ham? 17 Leinoiya muchi kituho akihul gosoh tan, thil kikholna in jouse jong akeovin aum soh tai. 18 Gam laha gamsa jousen jong itobang taha kel athoh’u hitam! In'a kivah gancha ho jong alung dong gam tauve. Anehdiu abeisoh phatin, kelcha leh kelngoite ho jong alungdong gamtauve. 19 Pakai nei kithopiuvin! Gamsunga hamdon jouse jong meiyin akagop sohtan, Thingphung jouse jong meikongin aleogop soh tai. 20 Gamlaha gamsa ho jeng jong na henga apeng tauve, ajeh chu vadung jouse jong akang gamtan, gamlah-a hamdon jouse jong meiyin akagop gam tai.
DRAFT COPY