1 དམ་པའི་ཐུགས་ཉིད་ཀྱིས་གསལ་པོར་གསུངས་པ་ལྟར། དུས་ཕྱི་མར་མི་ཁ་ཤས་དད་པ་སྤངས་ནས་སེམས་ཉིད་གཡོ་སྒྱུ་ཅན་དང་གདོན་འདྲེ་རྣམས་ཀྱི་ལོག་ལྟ་ལ་དོ་སྣང་བྱེད་པར་འགྱུར། 2 དེ་ནི་བཟང་ངན་ཤེས་མི་ཐུབ་པའི་རྫུན་ཤོད་མཁན་གྱི་ཁ་བཤད་དོན་ལ་མི་གནས་པའི་སྒོ་ནས་འབྱུང་འོང༌། ཁོ་ཚོའི་སེམས་ནི་ལྕགས་སྲེག་གིས་ཚིག་པ་ལྟར་ཡིན་པས་སོ། 3 ཁོ་ཚོས་གཉེན་སྒྲིག་མ་བྱེད་ཅེས་པ་དང༌། ཟས་རིགས་ཁ་ཤས་ཟ་མི་ཆོག་ཅེས་ཟེར། བདེན་པ་ཤེས་ནས་དད་ལྡན་རྣམས་ཀྱིས་བཀའ་དྲིན་ཆེ་ཞུ་ཞིང་ཟ་བའི་ཕྱིར་དཀོན་མཆོག་གིས་ཟས་དེ་ཚོ་བཟོས་པ་གནང༌། 4 གང་ལགས་ཟེར་ན། དཀོན་མཆོག་གིས་བཀོད་པར་མཛད་པ་ཐམས་ཅད་ལེགས་པོ་ཡིན་ཏེ། བཀའ་དྲིན་ཆེ་ཞུས་ནས་ཐོབ་ན་གང་ཡང་འདོར་མི་དགོས། 5 དཀོན་མཆོག་གི་བཀའ་དང་སྨོན་ལམ་གྱི་སྒོ་ནས་དག་པར་འགྱུར་བས་སོ། །

6 གལ་ཏེ་ཁྱེད་ཀྱིས་དོན་འདི་ཚོ་སྤུན་ཟླ་རྣམས་ལ་བསྟན་ན། དད་པའི་བཀའ་དང་ཁྱེད་ཀྱིས་སྔར་ནས་བསྲུངས་ཏེ་བདེན་པའི་བསྟན་པ་ལ་བརྟེན་ནས་ཁྱེད་ནི་མཱ་ཤི་ཀ་ཡེ་ཤུའི་ཞབས་ཕྱི་བཟང་པོ་ཡིན་པར་འགྱུར། 7 འཇིག་རྟེན་པའི་སྙིང་པོ་མེད་པའི་སྒྲུང་དང་རྒན་མོའི་འཆོལ་གཏམ་དོར་ནས། ཆོས་སེམས་དང་ལྡན་པའི་ཕྱིར་རང་གིས་རང་ལ་སྦྱོང་བརྡར་གྱིས་དང༌། 8 གང་ཡིན་ཞེ་ན། ལུས་ཀྱི་རྩལ་སྦྱོང་ལ་ཕན་ཐོགས་ཅུང་ཟད་ཡོད་ཀྱང༌། མི་ཚེ་འདི་དང་ཕྱི་མ་གཉིས་ལ་ཕན་པས་ཆོས་སེམས་ནི་རྣམ་པ་ཐམས་ཅད་ལ་ཕན་ཐོགས་ཆེའོ། 9 གཏམ་འདི་ནི་བདེན་ཞིང་ཧ་ཅང་ཁས་ལེན་བྱེད་འོས་པ་ཞིག་ཡིན། 10 དོན་དེའི་ཕྱིར་ང་ཚོས་འབད་བརྩོན་བྱེད། གང་ལགས་ཤེ་ན། མི་ཐམས་ཅད་དང་ཁྱད་པར་ཏུ་དད་ལྡན་རྣམས་ཀྱི་སྐྱབས་མགོན་གཏན་དུ་གནས་པའི་དཀོན་མཆོག་ལ་ང་ཚོས་ཡིད་རྟོན་ངང་རེ་བ་བཅངས། 11 དོན་འདི་ཚོ་མི་རྣམས་ལ་སྐུལ་ཞིང་སྟོན། 12 ཁྱེད་རང་ལོ་ན་གཞོན་པར་མི་སུས་ཀྱང་མཐོང་ཆུང་བྱེད་དུ་མ་ཆུག དེ་ལས་ལྡོག་སྟེ་ངག་དང༌། སྤྱོད་ལམ། བྱམས་སེམས། དད་སེམས། བཅོས་མིན་གྱི་སྒོ་ནས་དད་ལྡན་རྣམས་ལ་མིག་དཔེ་སྟོན། 13 ང་མ་སླེབས་པའི་བར་དུ་མི་རྣམས་ལ་གསུང་རབ་ཀློག་པ་དང༌། སྐུལ་མ། ཆོས་སྟོན་པ་བཅས་ལ་བརྩོན་པར་བྱེད་ཅིག 14 ཁྱེད་ཀྱི་ནང་ན་ཡོད་པའི་ཆོས་ཀྱི་གནང་སྦྱིན་ལ་སྣང་མེད་མ་བྱེད།* 4:14 ཆོས་ཀྱི་གནང་སྦྱིན་ནི་དཀོན་མཆོག་གིས་དད་ལྡན་རྣམས་ལ་གནང་བའི་དམིགས་བསལ་གྱི་འཇོན་ཐང་ཞིག་ཡིན། དེ་ནི་ཆོས་ཚོགས་ཀྱི་འགན་འཁུར་བ་རྣམས་ཀྱིས་ཁྱེད་ལ་ཕྱག་བཞག་ནས་ལུང་བསྟན་པའི་སྒོ་ནས་གནང་བ་ཡིན། † 4:14 ཕྱག་བཞག་པ་ནི་ལས་འགན་བསྐོས་པ་དང་དད་ལྡན་རྣམས་ཀྱི་མོས་མཐུན་ཡོད་པའི་རྟགས་ཡིན། 15 མི་ཐམས་ཅད་ཀྱིས་ཁྱེད་ཀྱི་ཡར་སྐྱེད་མཐོང་བའི་ཕྱིར་དོན་འདི་རྣམས་ལ་དམ་འཛིན་བྱེད་ཅིང་ཉམས་སུ་ལོངས་ཤིག 16 ཁྱེད་ཀྱིས་རང་ཉིད་དང་རང་གི་ཆོས་སྟོན་པ་ལ་དོ་སྣང་ལེགས་པོ་བྱེད། དོན་འདི་རྣམས་མཐར་ཕྱིན་པ་བྱས་ན་ཁྱེད་དང་ཁྱེད་ཀྱི་གཏམ་ལ་ཉན་མཁན་ཡང་ཐར་བར་འགྱུར་ངེས་སོ། །