1 གལ་ཏེ་ངས་མི་དང་དཀོན་མཆོག་གི་ཕོ་ཉ་རྣམས་ཀྱི་སྐད་རིགས་སུ་གཏམ་བྱས་ཀྱང་བྱམས་སེམས་མེད་ན། ང་ནི་སྒྲ་སྐད་ཆེ་བའི་འཁར་རྔ་དང༌། ཡང་ན་འཁྲོལ་བའི་སྦུབ་ཆལ་དང་འདྲ། 2 གལ་སྲིད་ང་ལ་ལུང་བསྟན་པའི་གནང་སྦྱིན་ཡོད་ཅིང་གསང་བ་དང་ཤེས་བྱ་ཐམས་ཅད་རྟོགས་ལ། རི་བོ་སྤོ་ནུས་པའི་དད་པ་ཀུན་དང་ལྡན་ཡང༌། བྱམས་སེམས་མེད་ན། ང་ནི་ཅིའང་མིན། 3 གལ་ཏེ་དབུལ་པོ་རྣམས་ལ་ངའི་རྒྱུ་ནོར་ཐམས་ཅད་སྦྱིན་ཞིང༌། ངའི་ལུས་སྲོག་གསོན་སྲེག་བཏང་ནའང༌། བྱམས་སེམས་མེད་ན། ང་ལ་ཅིའང་མི་ཕན། 4 བྱམས་པ་ནི་བཟོད་པ་དང་བཀའ་དྲིན་ལྡན་པ། ཕྲག་དོག་མེད་པ། རང་བསྟོད་མེད་པ། ང་རྒྱལ་མེད་པ། 5 མ་རབས་མེད་པ། རང་དོན་མི་འཚོལ་བ། སུན་སྣང་མི་སྐྱེ་བ། འཁོན་འཛིན་མི་འཆང་བ། 6 དྲང་བདེན་མིན་པ་ལ་མི་དགའ་སྟེ་བདེན་པ་ལ་དགའ་བ། 7 དོན་ཐམས་ཅད་ལ་བཟོད་པ། དོན་ཐམས་ཅད་ལ་ཡིད་ཆེས་པ། དོན་ཐམས་ཅད་ལ་རེ་བ་བྱེད་པ། དོན་ཐམས་ཅད་ལ་སྡུག་རུས་བྱེད་པ་ཞིག་ཡིན་ནོ། །

8 བྱམས་པ་ལ་རྫོགས་པའི་མཐའ་མེད་ཀྱང༌། ལུང་བསྟན་མེད་པར་འགྱུར། སྐད་རིགས་གཞན་ཤོད་པའི་གནང་སྦྱིན་འགག་པར་འགྱུར། ཤེས་བྱ་མེད་པར་འགྱུར་རོ། 9 གང་ཡིན་ཞེ་ན། ང་ཚོས་ཆ་ཤས་ཙམ་ཤེས་ཤིང་ཆ་ཤས་ཙམ་ལུང་དུའང་སྟོན། 10 འོན་ཀྱང་ཡོངས་སུ་རྫོགས་པ་དེ་འོང་བའི་ཚེ་མ་ཚང་བ་མེད་པར་འགྱུར། 11 བྱིས་པའི་དུས་སུ་ངའི་གཏམ་དང༌། བློ་གྲོས། བསམ་པ་བྱིས་པ་ལྟར་ཡིན་ལ། དར་མར་གྱུར་བའི་ཚེ་ངས་བྱིས་པའི་སྤྱོད་ཚུལ་སྤངས། 12 དེ་ལྟར་ད་ལྟ་ང་ཚོས་རབ་རིབ་མེ་ལོང་ལ་ལྟ་བ་ལྟར་གསལ་པོ་མི་མཐོང་ཡང༌། ཕྱིས་སུ་གདོང་གཏུགས་ནས་མཐོང༌། ད་ལྟ་ངས་ཆ་ཤས་ཙམ་ལས་མི་ཤེས་ནའང༌། ཕྱིས་སུ་དཀོན་མཆོག་གིས་ང་ཡོངས་སུ་མཁྱེན་པ་ལྟར་ངས་ཀྱང་ཤེས། 13 མདོར་ན། དད་པ་དང༌། རེ་བ། བྱམས་པ་གསུམ་པོ་གནས་ཡོད་ཀྱང༌། དེ་ཚོའི་ནང་ནས་མཆོག་ཏུ་གྱུར་བ་ནི་བྱམས་པའོ། །