50
1 Ada Yosefa tamana Iyakobo manawane gitanalina aku tamana giatulauwina watagigina ke giveyaugina. 2 Ada Yosefa yana tagiya giluyabu muline yana togugaiyavo tokivebwaina giveimeyedi ke tamana vovona ina kidewedewena anaitavuna faina. E ada tokivebwaina vovo ikidewedewena 3 yadayada foti wagaidiya, faina tayuwe yadayada-dina matatabuna wagaidiya kidewadewa anatova.** MeItipita adigiduwa anafaiweya, bunama inasena toalika vovona wagaine e ada keke gina abudali. Ada meItipita inuwavita lakai-moena ke Iyakobo faine itagitagiya yadayada seveniti (70) wagaidiya.
4 Ada nuwavita ke tagiya aditova bademowa giavaidi, au Yosefa Felo yana togugaiyavo givonedi, “Kai matamiya nuwakalikali ganuwagana aga faikuya Felo wada ifufuyena, wadavona, 5 ‘Kamaku giveimeyeku wagaine gavonadabadaba toyogina, givona, “Iya tova kabisona yawaiku ginaavaina, ada nuwanuwaku una tavuku didikula luweya tauku akudidikula gatalana fafali Kenani wagaine.” Ada meyameyaganina uda awaegeku gadalaka kamaku gadatavu-yo kaduwe gada yewaelai.'”
6 Ada Felo yana laufata giimilina Yosefa wagaine, givona, “Iwakana, unalaka tama una tavuna anafaiweya giveimeyeni uvonadabadaba mamauwe.”
7 Ada Yosefa gilaka tamana gina tavuna, ada Felo yana togugaiyavo lakaidiyavo ke yana manuwa anatomiyayavo anakalivayavo lakaidiyavo ada fafali Itipita anakaliva lakaidiyavo, moyaidi ikwayabu nodi ilaka Kenani. 8 Ada kaduwe Yosefa yana manuwa anatomiyayavo matatabudi ke anatubulugayavo ada badi gavega tamana yana gabuyavo matatabudi nodi inau. Aku tufona togugaiyavo, biyabiyama, sifi ke goti, ada bulumakau ani badiyavo gaga imiya Goseni. 9 Ada kaduwe saliyoti wa aditovemadu ke osi wa aditovemadu nodi ilaka, yoo lakai-moena ikwayabudi.
10 Ada tova-nai ielai Atadi yana witi anaebaitutu wagaine, tainei gufa Yolidani lilivane, wadedeku itagi lakwalakwakwa aku taudiyavo ibaibaidadanedi tova manamanawena. Ada wadedeku Yosefa nodi itagitagiya yadayada seveni tamana faine. 11 Ada meKenani-dina badi imiyamiya wadedeku ani iitana fafali-nai wagaine tagiya lakaina, ada ivonaga, “Waitana, taidei tova tagiya toalika faine vita-moena meItipita faidiya.” Ada tayuwe wagaine fafali-nai gufa Yolidani lilivane ivewagana Ebeli-Misilaimu.** 'Ebeli-Misilaimu' anakivila anafaiweya, 'meItipita yadi tagiya toyogina'.
12 E ada Iyakobo natunavo igugai anafaiweya tamadi giveimeyedi mamauwe. 13 Vovona iwai inauwena Kenani anafafaliya ada isena luwa didikula wagaine, luwa-nai gimiyamiya Makapila, Mamele lilivane, tuwaina Ebelaamo gikimone tamwaina wababina nodi Itaiti tubuna Efiloni wagaine. 14 Ada Yosefa tamana gitavuna muline banae, anatubulugayavo, ke badi gavega ikwayabu nodi inau ani matatabudi iyewadi Itipita.
Yosefa tawaganavo giawaasevatudi.
15 Iyakobo yana alika muline, Yosefa tawaganavo inuwanuwa ada ivebutu imatauta, ivonaga, “Gavaiyamu, kai Yosefa yana nuwakoyo gina kiveyabina ke aimo gina miwayaudi yada koyona matatabuna kagugaiyedi wagaine faidiya?” 16 E ada matawa iimilina wagaine, ivonaga, “Muliya-yo tama gialika ani veimeya taidei givelema, givona, 17 ‘Taidei anafaiweya wanavona Yosefa wagaine: Iya gaveoleni tawagamomo yadi koyona uda venuwaegedi, yadi dewa koyona igugaiyena wagainiya faine.' E ada ime, tama yana Yaubada yana togugaiyavo, ani yama koyona wagainiya uda venuwaegau.” Ada yadi matawa giela Yosefa ginogalina, au giafuwa gitagiya.
18 Ada kaduwe tawaganavo taudiyavo ielai wagaine ke tugadi ivetodonedi ke iodu vemoimoina matane ada ivonaga, “Unaitana, ime ya togugaimomo yogoyogoma.”
19 Aku Yosefa givonedi, “Keke wana matauta. Iya gavaiyamu, Yaubada? 20 Imi wanuwanuwa vaita wada kivekoyoku, aku Yaubada ginuwanuwa iwakana faine ke gigugaiye-yabuna, ada malinai kaliva moyaidi adikibababala inuwagana. 21 Tainei faina keke wana matauta. Aimo aa gana avetavetala imi faimiya ke natumiyavo biyabiyamidi faidiya.” Ada giawaasevatudi ke givonabikebikedi.
Yosefa yana alika.
22 Ada Yosefa ke tamana yana gabuyavo nodi imiya Itipita wagaine. Yosefa gimiya malamala 110, 23 ada aimo wayawaina gimiyamiya aku Ifeleimu natunavo, natudiyavo tainei Iyakobo gaisenavo giitadi. Kaduwe natuna Manasa natuna anayegana Makili natunavo itubuga ani Yosefa giawavenatunedi.
24 Ada Yosefa anatubulugayavo giifufuyedi, givonaga, “Iya tova kabisona ganaalika. Aku velemoena Yaubada gina lememi, ada ginavaimi gina yegemonemi fafali taidei wagaine-deya ke gina lakavemi fafali-nai wagaine givonadabadabayena Ebelaamo ke Aisake ada Iyakobo wagaidiya.” 25 Ada kaduwe givonedi, “Velemoena Yaubada aimo ginamadumadubodami, e ada wanavonadabadaba wagaikuya vaita luluku wanawai wana lakavena fafali taidei wagaine-deya.”
26 E ada Yosefa gialika anamalamala 110 wagaine, ke vovona bunama wagaine ikidewedewena e ada keke gina abudali. Ada kidewadewa muline, idodona toalika adibokesi wagaine Itipita-deya.