1 Ada muliya Yaubada Iyakobo givonena, givona, “Tova taidei una mididi unalaka Bedeli, ada wadedeku unamiya. Iya Yaubada-kuna gayegemona wagainiya Bedeli wagaine tova-nai uotaota tawaga Iso wagaine-deya, e ada wadedeku ebavebolavoi anadidiga unabubuna ke una oduodu wagaikuya.”

2 E ada Iyakobo yana gabuyavo ke badi gavega banae nodi ani givonedi, “Yami yaubada fwayafwaya wagaimiya wana segedi ke taumiyavo wana kiveyegayeganemi, ada aminuya yegayegadi wana osedi.** 'Nuya yegayegadi' ani seyana ebaita anafaiweya taudiyavo ina kiveyegayeganedi Yaubada matane. 3 Ada ide kanasege-ku kanalaka Bedeli, ke wadedeku Yaubada anaebaoduodu anadidiga gana bubuna, Banae gilemeku yaku tova vitana wagaine ada gadedeku ganaunau, Banae iya akutokwayabu.” 4 E ada yadi yaubada ke tagaafola matatabuna ialiyedi Iyakobo wagaine, ada gaitoma-dina matatabuna gitavudi ai lakaina dibune melala Sekemu lilivane. 5 Ada ikidewadewa itauya inaunau aku Yaubada anamatauta lakaina giyegemona kaliva moyaidi imiyamiya melala-dina fafali-nai wagaine, e ada keke seyana gaito gida maduvenegadi.

6 E ada Iyakobo ke yana biyavo matatabudi nodi ielai melala Lusi, malinai ivewagana Bedeli, Kenani anafafali wagaine. 7 E ada ebavebolavoi anadidiga gibubuna ke givewagana ‘Bedeli ana Yaubada’. Faina nagona wadedeku Yaubada giyegemonina, tova-nai giotaota tawagana Iso wagaine-deya.

8 Wadedeku vavine anayegana Debola banae Libeka yadi tova kwamana wagaine aditoitaveyabina, ani gialika. Ada itavuna ai lakaina vuvune Bedeli wadibune, ada fafali-nai ivewagana ‘Tagiya ana Ai’.

9 Ada Iyakobo giyewayewa Padan Alama wagaine-deya aku Yaubada kaduwe giyegemona-vagila wagaine ke giawanuwakabubuyena. 10 Ada givonena, “Ayegana Iyakobo, aku keke kaduwe ina doudouweni Iyakobo, aku ina douweni Isileli.” E ada anayegana givewagana Isileli.

11 Ada kaduwe Yaubada givone-vagilena, givona, “Iya Yaubada Totoyogi-vagaiku. Biyabiyama moyaidi una vetubulalagidi ke adiyoo gina veinala anafaiweya seyana ebaveimeya. Ada oyeni ani aimo ebaveimeya moyaidi ke kiniyavo tamadi nagona. 12 Nagona babi-nai gaveledi Ebelaamo ke Aisake, ani kaduwe o babi-nai gana veleni ke aimo ya tubudelidelimomo ganavele-vagiledi tova ielaelai matadeya wagaidiya.” 13 Ada ifufu giluyabuna muline au Iyakobo gisege-ku gilaka fafali-nai giifufuyena wagaine-deya. 14 Ada Iyakobo kabala ogola givemididina ke waini giiwana kabala-nai wagaine yana vele-kavovo faina, ada kaduwe bunama giiwana wagaine. 15 E ada fafali-nai wagaine Yaubada nodi iifufu ani givewagana Bedeli.** 'Bedeli' anakivila ani 'Yaubada yana manuwa'.

16 Muliya Iyakobo yana yooyavo nodi Bedeli isege-ku inaunau ada tova kabisona ina yegemona melala Efilati, ani Litiyeli ivefaedi ina venatuna faina aku vita lakaina inuwagana. 17 Ada iuloulolo lakaina kwamana gina tubuga faina, aku toveiwaga iitana kwamana gitubutubuga ada ivonedi, “Keke wana matauta, kwamana kaliva velugana gina tubuga.” 18 Ada kwamana gitubuga au Litiyeli yala isegena inaalika faina ani natudi anayegana idouwena Benoni.** 'Benoni' anakivila anafaiweya 'akuvita kwamani-nai kaliva'. Aku tamana gidouwe-viviyena ada anayegana givelena Beniyamina.** 'Beniyamina' anakivila anafaiweya 'nima aiyatagiku kwamani-nai kaliva'.

19 E ada au Litiyeli ialika, ada itavudi wai lilivane, wai-nai ginau Efilati-deya, tainei malinai ivewagana Bedeliyema. 20 Ada Iyakobo kabala ogola givemididina vavinena manawadiya, kabala tayuwe Litiyeli adididikula anaiyaiyaya. Ada kabala-nai aimo malinai gimiyamiya.

21 E ada Isileli, anayegana anavelu Iyakobo, ani yana yoo nodi kaduwe itauya-vagila inau Migidala Ideli fafaline,** 'Migidala Ideli' anakivila ani 'manuwa tulatulana' ada wadedeku toitaveyabina imiyamiya ke tokiyafu ina venegadi e ada keke sifi ina kiyafudi. wadedeku yana manuwa sinininila givemididina. 22 Ada Isileli gimiyamiya fafali-nai wagaine aku natuna Lubeni gina giluku tamana yana togugai vavine adiyegana Bila ani vovodi gikiluvaluvana. Muliya-yo Isileli gikaiyanogala.

Taidei Iyakobo natunavo kaliva badi itubuga Padan Alama-deya.

27 Ada Iyakobo giyewana Mamele tamana Aisake wagaine Kiliyati Aba lilivane, tainei Ebiloni. Wadedeku Ebelaamo ke Aisake nagona imiya. 28 E ada Aisake gimiya anamalamala 180. 29 Ada au givesilakai-mowa e ada yala gisegena ke gialika ada ginau tamanavo alialikadiyavo wagaidiya. Ada natunavo Iso ke Iyakobo itavuna.