1 Ada Lebani gitauya giyewayewana yana melaleya, aku Iyakobo ke badi gavega nodi imididi yana fafali waina inau. Ada inaunau aku Yaubada yana aneloseyavo ielai Iyakobo nodi ivenuwaga. 2 Tova-nai Iyakobo giitadi, givona, “Ida Yaubada yana tolugaviyamomo yadi ebaga.” E ada tayuwe fafali-nai anayegana givewagana Maanaimu.

3 Ada Iyakobo tomatawa giimilidi wai inagona tawagana Iso wagaine gimiyamiya Seila, Idomu anafafali wagaine. 4 Ada yana tomatawa giifufuyedi, givona, “Wananau ada taidei anafaiweya wanavona yaku kauveya Iso wagaine, ‘Ya togugai Iyakobo givona, Iya Lebani nodi amiya-deya au malinai-mowa gayewayewaku. 5 Ada wayaku bulumakau ke doniki, sifi ada goti ada togugaiyavo kaliva ke vevine. Taidei faine matawa gaimilina yaku kauveya wagainiya, vaita nuwa gida veiwaka wagaikuya.'”

6 Ada tomatawa iyewadi Iyakobo wagaine, ivona, “Anau tawaga Iso wagaine, ada bademowa gitauya gielaela gina madubodebodeni aku kaliva 400 nodi ielaelai.”

7 Ada Iyakobo au gimatauta lakaina kaduwe aseasena giulolo, e ada kaliva givutugedi yoo luwei ada kaduwe yana kevakevayavo givutuge-vagiledi bou luwei wagaidiya. 8 Faina ginuwanuwa, “Kai Iso gina elaelai ada yoo boudi nagona wagaine kaliva ina tafitafidi aga yoo anavelu kaliva inaota.”

9 Ada givutugedi muline giveola Yaubada wagaine, givona, “Kubuku Ebelaamo ke kamaku Aisake yadi Yaubada, O Yaubada uvoneku, ‘Unayewani ya fafaliya ke ya gabuyavo wagaidiya ada gana kivekaikaiwabuni.’ 10 Iya ya togugai. Iya seyana tokoyona, aku oyeni ya nuwakabubu miyamiya-vagaina ada keke uda segeku. Ada taidei gufa Yolidani gadamani ganaunau Mesopotemiya ani keke tamo gavana wagaikuya aku yaku aiwala gagana. Aku tova taidei wagaine gavekaikaiwabu lakai-vagaina ada yaku yoo giveinala-mowa ke gavutugedi inau bou luwei wagaidiya. 11 Gaveola wagainiya, una kibababaleku kawaku Iso nimane, faina gamatauta aenanai gielaela gina munuku ada kaduwe biyabiyama inadiyavo nodi gina luvealikadi. 12 Faina uvoneku, uvona, ‘Velemoena aimo gana kivekaikaiwabuni, ada kaduwe ya tubudelidelimomo gana kiveinalina taliya anamakama anafaiweya, keke adiebaveyawa.’ ”

13 Ada wadedeku fafali-nai wagaine gidau. Ada mala gilavuna yana kevakevayavo wagaidiya yana nuwakabubu givaidi tawagana Iso ananuwaibubuna faina. 14 Kevakeva-dina givaidi ani goti vevine 200 ke goti kaliva adi 20 ada kaduwe sifi vevine 200 ke sifi kaliva 20. 15 Ada kameli vevine adi 30 wanatudiyavo nodi ke 40 bulumakau vevine ke bulumakau kaliva 10 ada doniki vevine 20 ke doniki kaliva 10. 16 Ada Iyakobo kevakeva-dina givutugedi makakaudiga bou bou wagaidiya, ke kaduwe aditoitaveyabina gisenauwedi bou-dina wagaidiya ada givonedi, “Wai wana nagona, aku yami mwatugu wana sesena kevakeva-dina boudi seyana seyana wagaidiya.”

17 Ada kevakeva boudi wai inagona ani aditoitaveyabina givonena, “Kai tova-nai kawaku Iso gina nuwagani gina tolidadaneni gina vonaga, ‘Gaito ya kauveya? Ada gadedeku unauna? Aku gaito yana kevakevayavo taidei matatabuna?’ 18 Ani una vonena, ‘Ida ya togugai Iyakobo yana kevakevayavo, taidei anuwakabubu giimilidi yana kauveya Iso wagaine. Aku Iyakobo tauna mulimeya gielaelai.’ ”

19 Ada kaduwe anavelu givone-vagilena ke anaveto ada matatabudi imulikabekabe ani givonedi, “Imi kaduwe anafaiweya wanavona Iso wagaine kai tova-nai wana nuwagana. 20 Wana nuwaududuna wana vonaga, ‘Ya togugai Iyakobo tauna mulimeya gielaelai.’ ” Faina ginuwanuwa, givona, “Taidei ananuwakabubu-dina gaimilidi wai inagonagona wagaine nuwana gana bubuna faina, aku muliya kai anavenuwaga aga kai anaita gina vemwamwala wagaikuya.” 21 E ada Iyakobo yana nuwakabubu wai givenagona, aku tauna gidau ebaga-nai wagaine.

22 Tayuwe bogi-nai wagaine Iyakobo gimididi ada vavinenavo adiselu ke yana togugai vevine adiselu ada natunavo adiileveni giimilidi wai inago gufa Yeboka anaebadamaneya idamana. 23 Ada yana gabuyavo givedamanidi, muline kaduwe yana giba matatabuna gisedamanedi gufa fafaline. 24 Aku Iyakobo anakaibe-mowa isegena, ada gimiyamiya ani Kaliva seyana giyegemona wagaine ada nodi iveyabi ivetoyotoyogina-deya malalavuga. 25 Ada Kaliva-nai gilutovonina keke anafaiweya Iyakobo gina toyogitagone e ada au agalina anatubo gilumwanuna. 26 Kaliva giitana bademowa mala gilavulavuna ada givona, “Unakisegeku gananau faina mala gilavulavuna!”

Ani Iyakobo gilufata, givonaga, “Keke! Keke maita gana kisegeni aku nagona una awanuwakabubuyeku.”

27 Ada Kaliva-nai gitolidadanena, “Gavaiyamu ayegana?”

Ani Iyakobo gilufata, givona, “Iya akuyegana Iyakobo.”

28 Ada givona, “Keke kaduwe ina doudouweni ‘Iyakobo’, aku ina douweni ‘Isileli’,** 'Isileli' anakivila anafaiweya, 'Yaubada nodi iveyabi ke ivetoyotoyogina'. faina Yaubada nodi waveyabi wavetoyotoyogina ada kaliva nodi waveyabi wavetoyotoyogina, aku oye utoyoginatagodi.”

29 Ada Iyakobo givona, “Udavoneku ayegana.”

Aku givona, “Gavana faina akuyegana utotolidadane?” Ada wadedeku Kaliva-nai Iyakobo giawanuwakabubuyena.

30 E ada fafali-nai anayegana Iyakobo givewagana Peniela, faina givona, “Au Yaubada magigina gaita-moena, aku keke gadaalika.” 31 Ada kauwana gilaka ani bana Peniela gisegena, aku ginunukoyo faina agalina anatubo giamwanuna. 32 Tayuwe vuvuna-nai faine, ada tova taidei wagaine meIsileli keke kevakeva agalidi anatubo anawalowaloga ida kanikani, faina tova tuwaina Iyakobo agalina Yaubada gikiabina.