1 Ada Ebelamo anamalamala 99 wagaine, Yaubada giyegemona wagaine ada givonena, “Iya Yaubada Totoyogi-vagaiku.** Anayegana-nai vona Ibeliu wagaine anafaiweya, 'El Shaddai'. Yaubada anayegana tufona moyaidi, keke seya-moena. Una muliye-vagaiku ke una yegayegana matakuya. 2 Ada yaku veyavo anavonadabadaba gana bubuna Iyayeku ke Oyeni wagaideya, ada aimoina ya tubudelidelimomo adiyoo gana kiveinalina lakai-vagaina.”

3 Au Ebelamo giiboula-mowa magigina babi wagaine ada Yaubada givonena, givona, 4 “Iya tauku faikuya, ani taidei yaku vonadabadaba wagainiya: Oyeni aimo yoo moyaidi tamadi nagona. 5 Ada kaduwe keke ina doudouweni Ebelamo, aku gavewagani Ebelaamo, faina oyeni yoo moyaidi tamadi.** 'Ebelamo' anakivila anafaiweya, 'tama anayegana lakaina'. Aku 'Ebelaamo' anakivila anafaiweya, 'Yoo lakaina tamadi'. 6 Ada ya tubudelideli moyaina aimoina gana veleni, ada oye wagainiya-deya kiniyavo ina yegemona. 7 Yaku veyavo anavonadabadaba gana vevuvuna ke vonadabadaba-nai miyamiyani-vagaina Iyayeku ada oyeni wagaideya ke kaduwe ya tubudelideliyavo nodi tova gielaelai wagaidiya, Iya ya Yaubada ke muliniya ya tubudelideliyavo yadi Yaubada. 8 Ada gadedeku malinai umiyadadana nau fafali Kenani matatabuna wagaine, ani aimo Iya ganavele-vagaini, oye ke ya tubudelideliyavo tova gielaelai wagaidiya. Ada badi Iya yadi Yaubada.”

9 Ada kaduwe Yaubada Ebelaamo givone-vagilena, givona, “Aku oye tauni fainiya, yaku veyavo anavonadabadaba una itaveyabina, oyeni ke ya tubudelideliyavo ada tova gielaelai anayoo kaduwe. 10 Taidei yaku veyavo anavonadabadaba gasena wagainiya ke ya tubudelideliyavo wagaidiya tova gielaelai faine, taidei vonadabadaba-nai wana itaveyabina: Kaliva seyana seyana imi wagaimiya vovodi bubuna bwatana wana lugoloidi.** Giduwa-nai taidei anafaiweya: kaliva yana gaitoma bubuna bwatana itomogoloina. 11 Imiyavo vovomi bubuna bwatana wana tomogoloina, tainei veyavo anavonadabadaba anaiyaiyaya, iyayeku ke imiyavo wagaideya. 12 Tova taidei ke tova gielaelai anayoo wagaidiya, biyabiyama seyana seyana ina tubuga kaliva ani anayadayada eita wagaine vovona bubuna bwatana ina tomogoloina, anafaiweya unumi wagaine itubuga o mali kaliva maniya ukimonedi, badi gavega keke ya tubudelideliyavo. 13 Kai itubuga unumi wagaine, o kai ya maniya ukimonedi ani badi vovodi bubuna bwatana wana tomogoloidi. Tayuwe wagaine yaku veyavo anavonadabadaba anaiyaiyaya vovomiya-deya gina vewala tainei yaku vonadabadaba-nai miyamiyani-vagaina keke ginaavai. 14 Aku kai kaliva seyana gaito keke vovona bubuna bwatana tomotomogoloina ina aimo ina luyavulena yana yooyavo wagaidiya-deya, faina banae yaku veyavo anavonadabadaba gidabana.”

15 Ada kaduwe Yaubada givona-vagila Ebelaamo wagaine, givona, “Aku vavine Selai ani keke una doudouwe Selai, aku tova taidei wagaine anayegana una douwena Sela. 16 Ada Sela gana vonanuwakabubuyena ke natu gana veleni banae wagaine, gina venatunena. Gana vonanuwakabubuyena e ada banae aimo yoo moyaidi inadi, ada yadi kiniyavo banae wagaine-deya ina yegemona.”

17 Ada Ebelaamo tugana givetodonedi ke magigina babi wagaine ke giodu, aku giveleiga ada nuwainagene givona, “Anafata kaliva anamalamala 100 ani seyana kwamana gina nuwagana? Ada Sela anamalamala 90 aku anafata kwamana gina venatunena?” 18 Ada Ebelaamo giveolena Yaubada, “Isimeli wagaine ya vonanuwakabubu anavonadabadaba gida miyamiya.”

19 Aku Yaubada givona, “Keke banae, aku vavine Sela aimo natu kaliva gina venatunena fainiya, ada anayegana una douwena Aisake.** 'Aisake' anakivila anafaiweya 'giveleveleiga'. Banae wagaine yaku veyavo anavonadabadaba gana kivetoyogina, veyavo-nai miyamiyani-vagaina yana tubudelideliyavo faidiya tova ielaelai wagaidiya. 20 Aku Isimeli faine, ani bademowa ganogalini. Ada unaitana, gana vonanuwakabubuyena velemoena, ada natunavo ke yana tubudelideliyavo gana ivetubulalagina ada anayoo gina veinala lakaina. Ada banae aimo toveimeyamomo adituwelo tamadi, ke yadi ebaveimeya gana kiveinalina. 21 Aku yaku veyavo anavonadabadaba gana kivetoyogina Aisake wagaine, banae Sela gina venatunena tova taidei wagaine aku malamala gielaelai.” 22 Tova-nai Yaubada yana vona bademowa giluyabuna Ebelaamo wagaine, ada gisegena.

23 Ada tayuwe yadayada-nai wagaine Yaubada gisegena, au Ebelaamo gigugai anafaiweya giveimeyena. Ada Ebelaamo natuna Isimeli giabina ke kaliva matatabudi itubuga anaunuma wagaine o siliva wagaine gikimonedi, ani vovodi bubuna bwatana gilugoloidi anafaiweya Yaubada giveimeyena mamauwe. 24-25 E ada Ebelaamo anamalamala 99 ada natuna Isimeli anamalamala tetini tova-nai vovodi bubudi bwatadi itomogoloidi. 26 Ada Ebelaamo ke natuna Isimeli nodi vovodi bubuna bwatadi itomogoloidi tayuwe yadayada-nai wagaine. 27 Ada kaliva seyana seyana anaunuma wagaine, anafaiweya mali kaliva aku siliva wagaine gikimonedi, ani bana nodi vovodi bubuna bwatadi itomogoloidi.