4
Keni ada Ebeli yadi velekavovo
1 Tayuwe tova-nai wagaine Adama vavinena Ive vovona gikiluvaluvana ada giveifuga ke kwamana kaliva ivenatunena. Ada anayegana idouwena Keni,** 'Keni' anakivila ani 'ganuwagana'. faina ivona, “Yaubada yana lemeya natuma kaliva anuwagana.” 2 Muliya taina kwamana kaliva ivenatunena ada anayegana idouwena Ebeli.
Tova-nai Keni ada Ebeli itubulakata, Ebeli ani givetoitaveyabina sifi aku Keni banae tobakula. 3 Ada seyana tova Keni babi guwana tufona gialiyena ke givele-kavovoyedi Yaubada wagaine. 4 Ada kadu Ebeli yana sifiyavo wagaidiya tufodi imadutubuga ani gialiyedi ada gimunudi ke vidoyafayafana givaidi ada givele-kavovoyedi Yaubada wagaine. Ada Yaubada wayana vemwamwala nodi Ebeli yana vele-kavovo faina, 5 aku Keni yana vele-kavovo keke gida vemwamwala wagaine. Taidei faina Keni ginuwakoyo ada gimagilakalaka.
6 Ada Yaubada Keni givonena, givona, “Gavana faina unuwakoyo? Kadu gavana faina umagilakalaka? 7 Kai udagugai iwakana aga gada awaveiwakaneni, aku kai keke unagugai iwakana, tainei nuwanuwa koyona gikidewadewa-mowa gina veimeyeni. Aku gilubodani o tauni una veimeyena ke koyona keke una gugaiye.”
Keni anatubuluga Ebeli giluvealikana.
8 Aku Keni givebutu anatubuluga givonena, givona, “Unaela kananau walaiya,” ada inau. Ada ina bademowa ilovoga walaiya, Keni gimiyavilana ada anatubuluga gikiyabi giluvealikana.
9 E ada kaduwe Yaubada givonena Keni, “Aku taini, Ebeli?” Ada gilufata Yaubada wagaine, givonaga, “Kaiwa, keke gada alamane. Iya keke kaiku anatoitaveyabina.”
10 Ada Yaubada givona-vagila, “Gavana tainei ugai? Bademowa gaitana atubuluga dayagina babi wagaine gimadu, anaita anafaiweya vaita ganogalina bonana gidoudou wagaikuya. 11 E ada taidei aalatabutabu babi wagaine una nuwagana faina atubuluga Ebeli dayagina ukivemaduna ada dayaga-nai babiya giluku. 12 Kai tova-nai una bakula aga aimo keke una bavagu, aku una nudadana-kavokavovo babi wagaine ada aimo keke una vemelala.”
13 Ada Keni givona Yaubada wagaine, “Taidei matavuloga-nai uveleku ani vitana velemoena ada keke akufaiweya gana avala. 14 Unaitana! Malinai uvenegaku fafali taidei wagaine, ada keke magiginiya gana miyami. Gananu-kavokavovo babi wagaine, keke gana vemelala. E ada gavega kaliva aimo ina nuwagaku aga velemoena ina luvealikaku.”
15 Aku Yaubada givonena, “Keke anafaiweya. Kai gava kaliva gina luvealikani, aga anayoo wagaine kaliva kaduwe seveni inaalika.” Ada Yaubada iyaiyaya seyana gisena Keni wagaine ada keke seyana gaito gina luvealika kai gina nuwagana. 16 E ada Keni gimididi ke Yaubada magigina wagaine-deya ginau. Ginau fafali ivewagana Nodi,** 'Nodi' anakivila ani 'nu-kavokavovo'. fafali-nai gimiyamiya kauwana ebalakavine Ideni-deya.
17 Muliya Keni vavinena vovona gikiluvaluvana ada iveifuga, ke kwamana kaliva ivenatunena ada tamana anayegana gidouwena Inoki. Tova tayuwe wagaine Keni melala giyogona ada givewagana Inoki faina natuna anayeganeya giluvenonogana. 18 Ada Inoki gitubulakata ada ginagi ke natuna kaliva givetubuna anayegana Iladi, ada Iladi natuna Meuyaela, Meuyaela natuna Metusela, ada Metusela natuna Lemeki.
19 Lemeki ginagi lugaluga, vavinena ineinagona adiyegana Eida aku ineimuli adiyegana Sila. 20 Ada Eida kwamana kaliva ivenatunena anayegana Yabali. Bana manuwa sinininila anatomiya ada kevakeva aditoitaveyabina aditomaduvevuvu. 21 Ada kaduwe Eida kaliva anavelu ivenatune-vagilena, anayegana Yubali. Bana api anatoveneganega ada kulele anaiyuve anatomaduvevuvu. 22 Lemeki vavinena ineimuli adiyegana Sila kadu ivenatuna natudi kaliva, anayegana Tubali-Keni. Bana kainumu anatofaisewa ke ebafaisewa tulina tulina gibubudi kopa ke kainumu wagaidiya-deya. Ada Tubali-keni novuna anayegana Nama.
23 Seyana tova Lemeki vavinenavo adiselu wagaidiya givona,
“Eida ke Sila wana vanenegeku. Imi vavinekuweyavo,
wana nogala-vutuvutu gavana ganavona.
Kaliva galuvealikana faina givegilagiku,
tubulakaina giluvedayagiku. 24 Kai Keni anamiwa
seveni, Lemeki anamiwa seveniti seveni.”
25 E, ada Adama vavinena Ive vovodi gikiluvaluva-vagilena ada iveifuga ke kwamana kaliva velugana ivenatunena. Ada idouwena anayegana Sete,** 'Sete' anakivila ani 'velavela'. faina ivonaga, “Yaubada bademowa kwamana velugana givelema, Ebeli fatana banae Keni giluvealikana.” 26 Ada Sete gitubulakata ke ginagi ada natuna kaliva givetubuna ani anayegana gidouwena Inosi. Ada tayuwe tova-nai wagaine kaliva ivevuvu-vaguvagu Yaubada anayegana imoinena ada ioduodu wagaine.