1 Ada lavilaviya anelose adiselu iyegemona Sodoma melala wagaine, aku Lota givetovetogana melala-nai anaedawaneya, ada gidaitanau ani giitadi anelose adiselu ielaelai, ada au gimididi gimadubodebodedi ginau wagaidiya ke giiboula-mowa babi wagaine ke givemoimoina.** Anelose-dina bademowa ielai Kauveya nodi ke iyegemona Ebelaamo wagaine. Adiita anafaiweya kaliva ada tamo tova tovetokiluma ivewagana 'kaliva' aku tamo tova 'anelose'. 2 Ada givona, “Yaku kauveyamomo, wanaela kananau yaku manuweya ada wadedeku agemi wana koladi ke wanadau. Aku malabutu malabutuya-yo wananau.”

Ani ivonaga, “Keke. Ime auwe anadau ebavagauta wagaine.”

3 Aku giluveyavaledi toyogi-vagaina ada au nodi inau yana manuweya. Ada Lota yana togugaiyavo givonedi ke faidiya kanibutu ikidewadewa, beledi ikabudi keke wa anakiveinala nodi, ada ikani.

4 Muline vaita idadau ani Sodoma anakalivayavo, tubulakata ke kaliva lakaidiyavo matatabu-moedi, iela Lota yana manuwa imidififina. 5 Ada ivedou wagaine, ivona, “Ei Lota! Badi gadedeku kaliva adiselu lavilaviya uabidi ualiyedi? Una yegemonedi una aliyedi wagaimeya ke vovodi anakiluvaluvadi anafaiweya vevine.” ** Kaliva-dina yadi dewa koyona anafaiweya taidei, kaliva vovodi ina kiluvaluvadi vaita vavine.

6 Ada Lota giyegemona wagaidiya aku wana gifalina 7 ke givonedi, “Tubuiyakuweyavo, yaku veola toyogina wagaimiya, keke taidei anafaiweya wanadewa. Taidei gaitoma koyo-moena! 8 Waitana, natukuweyavo vevine adiselu badi keke tamo tova kaliva nodi idada, ada kai nuwanuwami aga gana abidi gana yegemonedi wagaimiya ada gavana yami nuwanuwa anafaiweya wanagana wagaidiya. Aku kaliva adiselu auwe wana segedi ina miya-mowa. Faina badi ielai yaku manuweya iya akuvita, ada keke kadu gavana wanagai wagaidiya.”

9 Aku iagodadagena, ivona, “Unaota!” Ivonaga, “Taidei kaliva-nai gielai idedeku au kwanaawaawala-mowa aku taumada malinai gina vetoveimeya wagaideya!” Ada Lota ivonena, “Ime anadewa koyona badi wagaidiya aku oye wagainiya anadewa koyo-moena!” Ada ilutuwatuwaine-ku ina wana ida yawelina.

10 Aku anelose adiselu manuwa negenine iyegemo, Lota itai ilukuwe-ku wana ifalina. 11 Ada anelose-dina wana ifalina muline, Sodoma anakalivayavo manuwa-nai imidififina lakaidiyavo ke tubulakata ani matatabudi matadi igadi ikoyo ada itutugana ada ibalalava aku keke adifaiweya wana inaita.

12 Ada kaliva-dina adiselu Lota itolidadanena, ivonaga, “Gaito tamo kaduwe ya gabu gimiyami idedeku Sodoma anafafali wagaine, anafaiweya natumomo kaliva ke natumomo vevine ada lawamomo o kai gaito seyana ya gabu? Unana una vagauledi ada wanaota fafali taidei wagaine-deya. 13 Faina tova kabiso-moena fafali taidei ana luveyawaliyena. Yadi dewa koyo-moena Yaubada matane, ada tayuwe faine ime giimilima fafali taidei ana luveyawaliyena.”

14 E ada Lota ginau kaliva-dina wagaidiya badi iawakivefosedi vaita natunavo vevine ina nagidi, ani givonedi, “Wana madumididi kanaota fafali taidei wagaine, faina tova kabiso-moena melala taidei Yaubada gina luveyawaliyena!” Aku kaliva-dina inuwanuwa vaita Lota gida awaveleiga.

15 Ada matabogina aneloseyavo Lota iluimimilina ivona, “Una madumididi! Vavine ke natumomo adiselu idedeku nodi wanaota aenanai o nodi ana luveyawaliye-tamwaini, tova-nai melala anamatavuloga wagaine.”

16 Aku Lota aimo givedivedidiu, ada Yaubada ginuwakalikaliyena faine au anelose-dina nimane iabi ada vavinena ke natunavo vevine nimadiya iabidi inauwedi iyegemona melala Sodoma wamelaleya. 17 Ada bademowa iyegemonedi au seyana wagaidiya givona, “Yawaimi faidiya wanaota! Keke wana itayewa ada kaduwe keke laubeuya wana ilova. Wanaota oya wagaidiya aenanai wanaalika.”

18 Ani Lota giveola, givona, “Keke, yaku kauveya! 19 Uitana, iya ya togugai bademowa uitanuwakalikaliyeku, faina Sodoma analuveyawaliya wagaine-deya ukibababaleku. Wada iwakana, aku gana veole-vagileni, vaita keke una imiliku oya wagaidiya, wada atuwada-mowa. Tayuwe faina keke akufaiweya oya ganamadu nuwaga aenanai Yaubada yana matavuloga gina lutamwaiku ada ganaalika. 20 Unaitana, seyana melala kabisona keke atuwada, lilivadeya, ada akufaiweya ganaota wagaine. Melala-nai kabisona. Wadadeku keke anaalika.”

21 E ada anelose Lota givonena, “Ina kadu iwakana, gavana uveoleku mamauwe gana gugaiyena. Aimo keke melala-nai gana luveyawaliye uvoneyena anafaiweya. 22 Aku wanamadu ota wananau wadedeku, faina keke akufaiweya Sodoma ke Gomola ganamadu luveyawaliyedi analaba wana yegemo wadedeku.” Tayuwe vuvuna melala-nai ivewagana Soweli** Vona-nai 'Soweli' anakivila ani 'kabisona'., faina kabisona.

23 Tova-nai Lota giyegemo Soweli, bademowa kauwana gilaka. 24 Ada Yaubada gigai fwayafwaya ginaginana giyabeyabela wagabameya-deya giobu anafaiweya wei melala Sodoma ke Gomola wagaidiya. 25 Tainei anafaiweya tayuwe melala-dina giluveyawaliyedi, ada Iyolidani laubeuna matatabuna ke melala-dina aditomiyayavo ada kaduwe gaitoma matatabuna itabotabo fafali-dina wagaidiya ani gikabuyavuledi.

26 Aku Lota vavinena waimulina ada imiyaviladi iita ani au iveleyaga kwakwana ada imididi anafaiweya ogola.

27 Ada mala gilavuna malabutuya-mwaeya Ebelaamo gimididi ginau fafali-nai wagaine nagona Yaubada matane gimididi. 28 Ada giitaobu Sodoma ke Gomola waina ada kaduwe Iyolidani laubeuna matatabuna wagaine ani siyo giitana gilakalaka, anafaiweya laimwagu siyona.

29 Ada taidei anafaiweya giyegemona tova-nai laubeu anamelala-dina Yaubada giluveyawaliyedi. Aku Yaubada ginuwaveyalaina gavana Ebelaamo giveola, ada Lota giyavana luveyaweliya melalina wadedeku gimiyamiya wagaine.

30 Taidei gaitoma-nai muline, Lota melala Soweli anamiya gimatausena e ada natunavo vevine adiselu giabidi nodi ilaka oya wagaidiya inamiya. E ada ina wadedeku kabala luwa seyana wagaine imiya. 31 Ada imiyamiya aku seyana tova natunavo ani ineinagona ani kwamaneya givonena, “Tamada bademowa givekaliva, ada keke tamo gaito kaliva idedeku nodi kada miyami ayo gida nagida, anafaiweya giduwa babi matatabuna wagaine. 32 Unaela kanana tamada waini kana veyuna analaba ginayuga kwavakwava ada nodi kanadau ke natudeyavo kana nuwagadi tamada wagaine-deya, e ada yada gabu babi taidei wagaine keke ginaavai.” 33 E ada tayuwe bogi-nai wagaine tamadi waini iveyui gikwava ada natuna vineinagona giluku tamana nodi idau. Aku tamadi keke gida alamane tova-nai natuna giluku nodi idau ada kaduwe giyegemona.

34 Ada mala gilavuna malabutuya, ineinagona giifufu kwamaneya wagaine, givona, “Bogi tamada nodi adau. Aku malinai bogi kaduwe waini kanaveyu-vagilena, ada o unaluku nodi wanadau ke taidei dewa-nai wagaine adaunuma kana vetubulalagina tamada wagaine-deya ada yoo keke ginaavai.” 35 E ada tamadi waini iveyu-vagilena, ada bogi-nai wagaine kaduwe natuna kwamaneya giluku nodi idau. Aku kaduwe keke maita yana alamana tova-nai natuna giluku nodi idau ada kaduwe giyegemona-vagila.

36 Taidei anafaiweya Lota natunavo vevine adiselu iveifugaluga tamadi wagaine-deya. 37 Ada natuna vineinagona natudi kaliva ivenatunena, ke anayegana idouwena Mowabi. E, banae meMowabi tamadi nagona, ada malinai badi ivewagadi meMowabi. 38 Ada kaduwe natuna kwamaneya natudi kaliva ivenatunena, ke anayegana idouwena Benami. E, banae meAmoni tamadi nagona, ada malinai badi ivewagadi meAmoni.