1 E aku Yaubada ginuwanuwa Nowa ada kevakeva walawalaa ke kevakeva melamelala matatabudi imiyamiya aki wagaine faidiya. Ada mala giimili gimadu babi getane, e ada gufa gitaina. 2 Aku bademowa folufolu dibune yadi lumoimoi Yaubada gifalidi kaduwe wei yana lugaga giavaina. 3 Aku gufa babi gikiwafina ani givebutu gitaitaina ada yadayada 150 muline gufa au giobu-mowa. 4 E ada vaikoi anaveseveni anayadayada 17 wagaine aki givetogana Alalata anaoya wagaine. 5 Aku gufa aimo gialialina analaba vaikoi anaveteni, ada anayadayada nagona wagaine oya bwatadi ituneyegemonedi.

6 E ada yadayada foti giavaidi, Nowa aki anatalafolega nagona gibubuna wagaine ani giyavuna 7 ada bwayobwayo giimilina ani keke gidayewa auwe giyaveyavegadadana analaba gufa gialina. 8 E aku Nowa kaduwe bunebune giimilina ginana ginaitana kai tuwa bademowa giobu. 9 Aku bunebune keke gida luboda ginavaga faina gufa aimo babi getana gikiwafi-vagaina, e ada giyewa-vagilena aki wagaine. Ada Nowa nimana gitune manuga-nai givai gilukuwena aki negenine. 10 Nowa giboda yadayada anaveseveni giavaidi muline, kaduwe bunebune-nai giimili-vagilena. 11 Ada tova-nai manuga lavilaviya giyewana Nowa wagaine ani ai olive lukuna yawayawana manuga-nai mudune gikudalagagana! E ada Nowa gialamanena vaita tuwa bademowa giobu. 12 Ada kaduwe giboda yadayada seveni giavaidi muline bunebune-nai giimili-vagilena, aku taidei tova-nai wagaine keke gidayewa.

13 Tova tayuwe wagaine Nowa anamalamala 601 ginuwagana, tova-nai vaikoi nagona ke anayadayada nagona wagaine gufa gisidobodobona babi wagaine. Ada aki anamanuwa getana givaiyavulena aku gimatadadana ani giitana babi getana ayayana. 14 E aku vaikoi anavelu anayadayada 27 wagaine au babi matatabuna giayayana!

15 Ada Yaubada Nowa givonena, 16 “Oyeni ke vavine ada natumomo wavavinediyavo nodi wana yegemona aki wagaine. 17 Ada gaitoma seyana seyana wayawaidi o nodi, manuga, kevakeva ada gaitoma matatabuna yagayaganidiyavo babi wagaine, ani una veyegemonidi. E ada adifaiweya ina vemoyai babi getane ke ina venatuna ada adiyoo gina veinala.”

18 E ada Nowa wavavinena ke natunavo wavavinediyavo nodi iyegemona. 19 Ada kevakeva matatabuna ke gaitoma matatabuna yagayaganidiyavo babi wagaine ada manuga matatabuna, gaitoma matatabuna inudadana babiya ani au seyana seyana watubuiyana anaita anafaiweya nodi iyegemona aki wagaine.

20 Ada Nowa ebavebolavoi gibubuna Yaubada faine ke kevakeva yegayegadi adiyoo seyana seyana tufona givaidi. Ada kaduwe manuga yegayegadi adiyoo seyana seyana tufona givaidi vebolavoi kabukabuna gibubuna ada gioduodu Yaubada wagaine. 21 Ada Yaubada vebolavoi kabukabuna magana gilulakave giyauna iwakana ada givemwamwala ke nuwainagene givona, “Keke-mowa kaduwe babi gana alatabutabuye kaliva faidiya. Badi yadi nuwanuwa koyodi yadi tova biyabiyama wagaine-deya, aku auwe, keke-mowa kaduwe gaitoma matatabuna gabubudi wayawaidi ani gana luveyawaliyedi anafaiweya tova taidei.