Diyesuwa
Dedena
3
Sidohana Isalaela Dodoga sa Lau Diyodan Tefana
Diyesuwa 3:1-17
1 Hola hige i ifi tatatali na Akasiya* “Akasiya” hesana hesa mate “Sitim.” sa lau afulen, na sa leu Diyodan Hoꞌowana sadaina yai, be amainiya edi palai sa faꞌobiyo fuyoꞌidi.† Edi palai hige doha eda gwaꞌu. Edi palai mate, yosiyosi ꞌwapidi yai sa ginaulidi. Sa pei hitinidi, sa famala edi luma. Edi aba lau somo yai, gonowana sa lawelawedi. Na sa bagibagi bena sa lau tefa.
2 Ya lau ee–, lahai fafaihonana, babaꞌisa sa lau palai hesa - hesa, 3 be dodoga sa falibadi, itiyen,
Yena tau antalasam ami itadi, Guyau emi Yaubada ena Laugagayo Aba Husaꞌina‡ Beyabeyana Mose lau-gagayo safuhudohudoꞌi ya uli umeꞌehu yai, na aba husaꞌina bogesina sa ginauli mate, ganamulina yo ganahewana gole afaꞌafa sa fapatu. sa iloꞌiloloi mate, emi palai au lopadi, na au lau watanidi. (Auꞌaulaha 25:10-16, yo Auꞌaulaha 37 hinaga.)
4 Beyabeyana hige umi amaiteꞌi, be aba launa ami fakau. Haba sa faꞌitamiu. In moho, tabu au sigilau sadaina. Aꞌawana doha kilomita esega.
5 Habahim Diyesuwa dodoga ya falibadi iyen,
Taumiu au faꞌaꞌadi. Yaluwamiu enehena au nonoha. Paꞌana bobon Yaubada ena gigibwali yai haba noꞌo laulauna ya fataumahata lisida yai.
6 Diyesuwa ya libalau tau antalasam lisidi yai, iyen,
Laugagayo au abi hitin, be au iloloi, na au lawen be dodoga au famulidi.
Yo fede, alinana sa lau watan, be sa iloloi.
7 Yaubada Diyesuwa ya faliba iyen,§ Au itaꞌita lau Diyesuwa 4:4 mate, amainiya liba-fasunuma te Yaubada ya fawananaha.
Aho, haba E fatubu be hesam E tole hitin. Isalaela mahudoꞌidi haba sa faꞌatitiyem, be haba sa siba, Yau maꞌem, doha maꞌegu Mose. 8 Tau antalasam u falibadi mate saluma Laugagayo tau baheina, yena ami mahano Diyodan Hoꞌowana bubuna yai, au lau, au obiyo hoꞌowana fotefotena yai.
9 Yo fede, Diyesuwa ya libalau Isalaela lisidi, iyen,
Au laoma aiteꞌi, haba Yaubada eda Guyau ena liba te atahiyen. 10-13 Yaubada ena Laugagayo Aba Husaꞌina haba te ita, be haba te siba sidohana In Tanoꞌubu Mahudoꞌina eda Guyau. Tau antalasam dodogadi haba sa iloloi bwaꞌiyen, be sa doheyen Diyodan yai. Yena ahedi sa bwaꞌiyedi Diyodan Hoꞌowana yai mate, haba ya didi tau, na uluna yai haba ya siu fuyo hasa. Doha, haba te siba, In Tanoꞌubu Mahudoꞌina eda Guyau. Itete sidohana haba te siba Yaubada Mwahumwahulina ganahewada yai, be In haba wananaha, Kanana, Hiti, Hiwi, Pelisi, Giligasi, Amoli yo Diyebusi dodogadi haba ya lau weꞌaidi hinaga.* Adi waiyunu ya fatilidi mate, nuꞌu ouꞌoulidi yai sa miya.
Na aho te, au siꞌoꞌinadi dodoga 12, esega - esega Isalaela sulu hesa - hesa yai.
14-15 Mahula fuyana mate, be Diyodan Hoꞌowana ena fuya wewe. Habahim, dodoga edi palai sa lopadi, bena Diyodan Hoꞌowana haba sa gayo dohe. Laugagayo tau baheina, iti, sa bwaꞌiyedi. Na tau antalasam te, sa gayo lau hoꞌowa yai,
16 Maꞌesega, na hoꞌowa ya tiwa, paꞌana ulu yai ya siu fuyo hasa, Adam yo Salatan lumadi yai.† Mapu au ita.
Hoꞌowa gwaluna ya tiwa, ya lau Gabogabo Peꞌipeꞌina.
Habahim, gonowana dodoga sa lau tefa, tefa leuleuna yai, Diyeliko nuꞌuna yai.
17 Sa dohe sa lau tefa tanohi pitapitalina yai, na Laugagayo tau baheina, gelegele atipuna yai sa obiꞌobiyo. Sa obiꞌobiyo ee–, Isalaela dodoga mahudoꞌidi sa laoma sa lau tefa.
*3:1 “Akasiya” hesana hesa mate “Sitim.”
†3:1 Edi palai hige doha eda gwaꞌu. Edi palai mate, yosiyosi ꞌwapidi yai sa ginaulidi. Sa pei hitinidi, sa famala edi luma. Edi aba lau somo yai, gonowana sa lawelawedi.
‡3:3 Beyabeyana Mose lau-gagayo safuhudohudoꞌi ya uli umeꞌehu yai, na aba husaꞌina bogesina sa ginauli mate, ganamulina yo ganahewana gole afaꞌafa sa fapatu.
§3:7 Au itaꞌita lau Diyesuwa 4:4 mate, amainiya liba-fasunuma te Yaubada ya fawananaha.
*3:10-13 Adi waiyunu ya fatilidi mate, nuꞌu ouꞌoulidi yai sa miya.
†3:16 Mapu au ita.