Ikeruwang Surat i Pablo dut mengeꞌ tawʼt
TESALONIKA
Kepurisnan et itueng Surat neng 2 Tesalonika
Ganang neterima et mengeꞌ mengengandel itueng unang surat i Pablo dut lungsud et Tesalonika, sebarang ibang mengengandel diki meretian dye nebres i Pablo tiꞌ eset pasal dut pegpeuliꞌ megtuy i Jesus in. Lein ne kedyeng nepikiran, gay dye mebiyanan dye ne kenyeng pegpeuliꞌ. Indyari enu itueng kedyeng binwat? Imbes “megkeradya”, kaya dye ne nemuwat et misan enung bubuwaten, nemenagey dye ne lang et pegdateng i Jesus.
Ganang nesewran itue i Pablo, atin ne punsabab megtuy ya negsurat dut kedye gasi peuliꞌ, sinugid ye kedye na lein kwantin nepikiran dye in. Sinugid ye kedye na mura megpeuliꞌ si Jesus Kristo, atin ne si Anti-Kristo neng si Seytan na sembatung kesagkaꞌ ki Kristo keilangan ne dumateng. Itueng Anti-Kristo in, tiksaen ye taaw ginsang dunyaꞌ, dut sebarang lein mengengandel bekeꞌ memuwat et kereatan.
Si Pablo penggayat kedye na inunganen mengebiyagan dye sampay buwaten et menunga eset mengeꞌ ibang taaw. Ya negpepangger kedye ne na megsandal misan enu negang ketiksaan dye. Ya negsugid kedye na Empuꞌ mene meles dut sebarang pemuwat kedye et ketiksaan tiban.
Ketulduan et itueng Surat
Penegnaan 1:1-2
Pegpepeselamat bekeꞌ Pegpenelang i Pablo 1:3-12
Taaw neng Menunungsang dut Empuꞌ bekeꞌ Pasal et Anti-Kristo 2:1-12
Mengeꞌ Tawʼt Tesalonika Piniliꞌ supaya Mebawiꞌ 2:13-17
Angat supaya Ipenelang et mengeꞌ Mengengandel si Pablo 3:1-5
Subaliꞌ Tyu Megkeradya 3:6-15
Penimpusan neng Pegpangling, Emuring penektak 3:16-18
1
1 Mawaꞌ kire Pablo, ki Silas bekeꞌ ki Timoteo, dut mengeꞌ mengengandel et lungsud et Tesalonika, dye in mengeꞌ ginerar et Empuꞌ Amaꞌ tyu, sampay Begerar tyung si Jesus Kristo.
2 Redyikiꞌ sampay kesenangan dumateng dimyu teyeg dut Empuꞌ Amaꞌ, sampay Begerar tyung si Jesus Kristo.
Pegpepeselamat bekeꞌ Pegpenelang
3 Subaliꞌ daran kay megpeselamat dut Empuꞌ, pasal et dimyu mengeꞌ ketipusdan. Sabab dimyung pegandel ki Jesus pereklaꞌ neng pereklaaꞌ, megdemikian pasal dimyung pegireg dut kede sembatu pereklaaꞌ myu gasi. 4 Angkansa pegbenbentugen gasi kemyu dut ibang mengeꞌ titimungan et mengeꞌ mengengandel et Empuꞌ, pasal et dimyung kepenggeran bekeꞌ pegandel et Empuꞌ, sampay pegsandal myu et mengeꞌ ketiksaan.
5 Ginsaʼt itue sembatung upama et Empuꞌ, dut kenyeng metignaꞌ na arat, sabab usalen ye itueng mengeꞌ ketiksaan myu apang teupen kew dut seled pengmilikan ye. 6 Empuꞌ metignaꞌ banar. Itangeꞌ ye sebarang megpeniksaꞌ dimyu, tiksaen ye gasi. 7 Tebangan ye kemyu et dimyung keliyutan, kwantin gasi damen. Meinabu itue, baꞌ nebunayag ne mawaꞌ dut langit ating Begerar neng si Jesus. Megiibut mengeꞌ kekinsegan yeng mengeꞌ dereakan et Empuꞌ. 8 Dumateng si Jesus megbibit et megdedleg na apuy, supaya dusaen ye sebarang diki megkilala et Empuꞌ, bekeꞌ mengeꞌ kaya megterima et Menungang Abar, pasal et kityung Begerar na si Jesus Kristo. 9 Dusaen dye et kaya seskeran neng kebinesanan, bekeꞌ diki dye meterima dut elepan et Empuꞌ neng Begerar. Sampay meparak dye eset ketaasan et kenyeng keksegan. 10 Meinabu dut eldew na si Jesus peuliꞌ atue, bentugen sampay deyewen ya et kenyeng mengeꞌ piniliꞌ et mengeꞌ mengengandel ye. Kemyu pelelamud gasi sentin, sabab nengandel kew et pesebanar kay dimyu pasal ki Jesus.
11 Angkansa, megpenelang kay daran dut Empuꞌ pasal et dimyu, apang teupen kew dut mengengandel et Empuꞌ na piniliꞌ ye. Sabab dut kenyeng kepengdyarian, teyen metuman ginsan neng mengeꞌ menungang keinginan myu bekeꞌ ginsan neng buwat teyeg et dimyung pegandel ki Jesus. 12 Itue pegpenelang kay, supaya megmendyaring igbey myu kebentugan dut ating ingaran et Begerar tyung si Jesus. Megdemikian gasi ya memgey dimyu et kewasa sabab kemyu mengeꞌ mengengandel ye. Meinabu itue sabab et redyikiꞌ et Empuꞌ tyu bekeꞌ si Jesus Kristo neng Begerar dut dimyu.