A Maka Habu ni Kavurike a Vure

1 E BAKOVI DAGI i takia e Moses, 2 ge taki e huriki a Israel na maka habu dagi ne BAKOVI DAGI ri gi ramai, ge ta maea, “Na tahuna mu vapopo mu kavurike iau vona a parava nga a vulaki.

3  * Nim 20:8-10; 23:12; 31:15; 34:21; 35:2; Vin 5:12-14“Mu tahoka a parava i polotara ni rata a leho. Pali na poloruana parava, a Parava Nimalo, naha ni leho vona. Mu vapopo mu kavurike iau. Na hini vai mu made vona mu luhoia a Parava Nimalo ne BAKOVI DAGI, mu ratea ge a parava nau.

4 “Ngane ga taki mua vona a maka parava dagi e BAKOVI DAGI i vulaki, mu gu rata a habu vona. Na pida lobo mu vapopo vona a parava nga, mu vasileki. 5  * Nim 12:1-13; Vin 16:1-2Na parava ravulu a polona i va (14th) na mugana keva, ge vakatubu na haro i rolo, mu ratea a Habu na Nipagepolo. 6  * Nim 12:14-20; 23:15; 34:18; Vin 16:3-8Na parava ravulu a polona i lima (15th) na keva iea kunana, a Habu na Bret I Uka Is mu vakatubua. Na parava ge polorua mu kani a bret i uka ma ni vuli turana a is. 7 Na mugana parava na vik mu vapopo mu kavurike iau, naha ni rata a leho mu rata na parava vakaroro. 8 Mu rata a nihabi ni gutu na kanono ne BAKOVI DAGI na parava ge polorua. Na poloruana parava mu vapopo tabu, mu kavurike iau. Na parava iea naha ni rata a leho mu rata bala.”

9 E BAKOVI DAGI i takia e Moses, 10 ge taki e huriki a Israel, ge ta maea, “Na tahuna mu vano mu made vona a malala iau a habia ne mua, mu mirio a vit, mu bole lakea na prister a galesi na vit mu rotu muga. 11 Na parava muri na Parava Nimalo, a prister ge tabari e BAKOVI DAGI vona a nihabi nga, bara i ngaru mua. 12 Na parava mu tabaria a nihabi na vit, mu habi turana a tuna sipsip ge gavutuvutu, ge tahoka a pida i taku, ge a nihabi gutu-vuro ne BAKOVI DAGI. 13 Mu bole a kilo na plaoa ge rua, mu vuli turana a namona oliv, ge a nihabi na vit ni gutu na kanono ne vona e BAKOVI DAGI. Mu habi turana a nihabi ni gutu-vuro, i manginoro a mangina. Mu bole a lita na vain ge taku, ge a nihabi na vain, mu habi turana a nihabi nga i rua. 14 Pali mua, i uka ma mu bole valai nau, iau a Vure ne mua, a galesi na vit nga, naha ni kani a vit mu bole karaba na hania. Na tahuna mu habi pali, ngane mu kara ni kani a bret i uka is, o ni vuli turana a is. Ra vinara nga, ge ramai vakaroro e huriki a hamone mua muri ma.

15  * Nim 23:16; 34:22; Vin 16:9-12“I tubu na parava muri na Parava Nimalo, ra parava mu tabari iau vona a galesi na vit, mu gi a vik ge polorua. 16 Mu gi a parava ge ravulu lima, muri na vik i polorua ge lobo, mu habi tabua a nihabi na vit karaba ne BAKOVI DAGI. 17 Mu bole tala na hini mu made vona a balena bret ge rua, ra bret mu rata na kilo i rua na plaoa kamumu, mu vuli turana a is, mu gutu. Muri mu tabari iau e BAKOVI DAGI vona a nihabi na kanena maki i moro muga. 18 Mu habi turana maki ranga, ra bret iea. Mu habi a tuna sipsip ge polorua, a pida na viri taku i taku, a bulmakau a toga, a sipsip a toga ge rua. A sipsip, a bulmakau nga ri gi gavutuvutu, mu habi nau ge a nihabi ni gutu-vuro. Mu habi turana a nihabi na vit, a nihabi na vain. Ra nihabi maea i huli kamumu a mangina, a ngaru hatekea. 19 Mu bolea tara meme a toga, mu rata a nihabi na naro hale. A sipsip a toga ge rua, a pida ne rua ge taku, ge a nihabi na nivalemu. 20 A prister ge bole a maki nga ge tabari e BAKOVI DAGI vona, turana a bret ni rata na vit i moro muga. Ra nihabi nga, a maki nau kunana, bara habi ne huriki a prister. 21 Na parava mu ratea a nihabi iea, mu vapopo mu vasileki. Naha ni rata a leho mu rata bala vona a parava iea. E huriki a hamone mua ri bele muri ma, na hini vai ri made vona, ri gi ramai vakaroroa a vinara iea.

22  * Levi 19:9-10; Vin 24:19-22“Na tahuna mu mirio a vit na malala ne mua, naha ni bole a vit na harena hania. Naha ni hamule tabu ni poi a masigo. Ge tabuli vonga ngi, ge bole e huriki a matasia, e huriki a mosi. Iau e BAKOVI DAGI a Vure ne mua, a takia a ngava iea.”

23 E BAKOVI DAGI i takia e Moses 24 ge taki e huriki a Israel, ge ta maea, “Na mugana parava na poloruana keva naha ni leho, mu malo. Na tahuna mu longo a nangina tavure, mu vapopo mu vasileki. 25 Na parava iea naha ni rata a leho mu rata vakaroro, pali mu bole a nihabi ni rata na kanono mu habi nau.”

26  * Levi 16:29-34E BAKOVI DAGI i takia e Moses, 27 “Na ravuluna parava na poloruana keva, mu vapopo mu ratea a habu ni kavitagu e huriki. Na parava iea mu vapopo, mu vasileki. Mu peremu ni kani, mu habi a nihabi ni gutu na kanono ne BAKOVI DAGI. 28 Naha ni leho vona a parava iea, a vuhuna ia a Parava na Nikavitagu. A prister ge rata a nihabi ni kavitagu mua na matane BAKOVI DAGI a Vure ne mua. 29 A viri i uka ma i vakaperemua na parava iea, bara ni lili tala na kabu vona. 30 E rei a bakovi i rata a leho vona a parava iea, bara ratapilea. 31 Naha ni ratea tara leho. Mu ramai vakaroroa a vinara iea. E huriki a hamone mua ri bele muri ma, na hini vai ri made vona, ria ranga ri gi ramaia a vinara iea. 32 Mu malo kamumu vona a parava iea. Ra habu iea ge vakatubu na polovana parava na malunga liu, ge harena na malunga liu tabu na ravuluna parava. Na parava iea naha ni kania tara maki, naha ni vakavivi mua vona tara maki.”

33  * Vin 16:13-15E BAKOVI DAGI i takia e Moses, 34 ge taki e huriki a Israel, ge ta maea, “Na parava i ravulu a polona i lima, na poloruana keva mu vakatubua a Habu na Kape ne BAKOVI DAGI. Mu made na maka kape na parava ge polorua. 35 Na mugana parava na vik iea, mu vapopo mu vasileki, naha ni rata a leho mu rata na parava vakaroro. 36 Na parava lobo na vik iea mu ratea a nihabi ni gutu na kanono ge lakea ne BAKOVI DAGI. Na polotoluna parava mu vapopo tabu mu kavurike iau, mu ratea a nihabi tara ni gutu na kanono ge lakea ne BAKOVI DAGI, mu vakaloboa a habu iea. Na parava iea naha ni rata a leho mu rata na parava vakaroro.

37 “Iau a vulaki a parava nga, ge ria a habu ne BAKOVI DAGI. Mu vapopo mu vasileki, mu habi a nihabi ni gutu-vuro, a nihabi na vit, a nihabi na vain, a nihabi ranga na parava nga. 38 Ra nihabi nga ni rata langa tabu na nihabi na Parava Nimalo ne BAKOVI DAGI, ranga maki mu habi nau, a nihabi na nita muholi, turana a nihabi na ningaru ne mua.”

39 E BAKOVI DAGI i taki tabua e Moses na Habu na Kape, i ta maea, “Na parava ravulu a polona i lima na keva polorua, muri kunana ne mua mu mirio, mu ratea a habu ne BAKOVI DAGI na parava ge polorua. Na mugana parava, na polotoluna parava na habu mu malo, naha ni leho. 40 Na mugana parava mu bole ranga kanena kai kamumu, a pagana niuniu, a rahana kai i paga bolabola, a rahana kai i paga madilidili, mu pitei na matane BAKOVI DAGI na parava ge polorua. 41 Na pida lobo na poloruana keva mu rata a habu ne BAKOVI DAGI na parava ge polorua. E huriki a hamone mua, ria ranga ri gi ramaia a vinara iea. 42 Mua a tahotanga o Israel mu made na kape na hania na parava ge polorua, 43 lakea e huriki a hamone mua bara ri lohoka vona a tahuna a tuli tala mua o Egipto mu valai koea, mu made na maka kape kiroko maea. Iau e BAKOVI DAGI, a Vure ne mua, a takia a ngava iea.”

44 E Moses i longo a ngava nga, i vakalongo e huriki a Israel vona a maka habu i vulaki e BAKOVI DAGI.