1 Abaraqaammáfa Mámareena arookása atukakí súani qámbaanai aiqaiqá ufanóo narí úiqaana máqa kooqíki óoqu faaqée márufanoo karaambáiqa maaqímmasee miná áfusaa kooroo inau. 2 Óoqufaaqee márufaqa faiqí qaaramoó námu ánufanoo Abaraqaammáfa níqáfamaséenoo nárì óosana máreenoo fíndimeeqeenoo misá ánuqoo sandée óonuréenoo óorindari maqásaa kummáramá fínoo qímanniminoo qináu.

3 Óo úriqararausa, qinée ínni dadaaqírausa máridaqa sía qiní áidaaqa ráaqa. 4 Qinee qíanaqa nammári mínisaifaqa ínneeqa níku nammári úqu séeqa maa saqarína atukakí adooaaqa. 5 Qinee akaqá nárana nímiana námaseeqa afeeka mara máreeqa fuaqa. Qinee ínni dadaaqianéera maaqóo ániafanoo. Innee maí ánianannái qiní dúqu uqéeraafanoo. Minára eedoo qífaqa nárana nímia. Miqí qufaqá misá qiqau. Dúfi dúfi doo nímina naanée qiqau.

6 Abaraqaammáfa iriséenoo úiqaa máaqaki sandéenoo óonureenoo Saráqa námmarina qímaminau. Anee kái kaqi parauáqa ámiqirana moodáa beeka marasée féemu suqá.

7 Miqí qímaseenoo ráudamaki sandéenoo burimakáu máruqoo óonureenoo burimakáu ánaaqi ámiqirana amaqí qumooqu kírana mara rumbá máreenoo narí aináinira fáiqi amisoofanóo kai káqi ufanoo arusée suqánau. 8 Abaraqaammáfa burimakáu náamma anoona fáqa náamma anoona fadaméena fáqa féemu faqa burimakáu suqárana faqa mara máree míní nímufaqa naqau. Abaraqaammáfa saqári atukakí misá faqa máridanoo nárana nímufaqa naqau.

9 Misa námaseeqa Abaraqaammána maaqi qímasee iraqau. Aní ánaaqa Saráqa námmarifa yái fée márinoo fée qufanóo mifá qinau. Máà úiqaana máqaki máridanoo fee qinau.

10 Miqí qufanóo misákiqari moó fánnoo qinau. Moó áukuana maa quqoonnánasaa kai qinee kafáa aniráananoo aní ánaaqa Saráqa námmarifa akoonaiqí fáiqi máqaannoo. Miqí qímarufánoo Saráqa námmarifa úiqaana máqa kooqíki mi fasiqána ánaaqíannai óoqu faaqée ídanoo írimarínau. 11 Miqí qufanoo Saráqa námmarisa Abaraqaamása asooqá uqanna márufanoo Saráqa námmarifa faqa faiqì máqara aukuana óoqai taikánau. 12 Saráqa námmarifa minára iriséenoo narí kai náanaidara qídanoo qinau. Qinée faqa qeeqá náuraiqindiri asooqá marida. Náqimmasee fee qeeqá qifaaqi faqa aaná fuanáuree.

13 Miqúfanoo karaambáiqa Abaraqaammána qímaminoo qinau. Náqaa fée ifanóo fee Saráqa námmarifa naanaidara qínoo fee. Maana qinee asooqá máridaqa náqimándee faiqì máqaanauree qínoo fee. 14 Nána áinainee moó áinaina Yáaweefa sía amana áuqaannoo fee mifá amaná aiqáma áinaina áuqaannoo. Qinée ánoona ufa qídaqa, moó áukuana maa quqoonnásaa qinée kafáa aniráananoo Saráqa námmarifa akoonaiqí fáiqi máqaannoo.

15 Saráqa námmarifa miná iriséenoo rufía máreennoo únna qímasee qáòo qinau, Qinée sía naanaidara qíqa. Miqí qufanóo misá úriqararafa Karaambáiqa qímaminoo qinau. Anée naanaidara qíanaqa íriqa.

16-17 Mi fasiqa qaaramoo namúsa Abaraqaammána faqa óoqu fíufaqa Soodooma máqusai qáfee máruqoo múqunnisoofanoo Karaambáiqa narí kai qímasee írinau. Qinée áuqararee qúnna áinaina sía Abaraqaammána umeeráma ámaqaanaura. 18 Miná saaqari kambíqáinausa firaa maqannaá márifaranoo. Aiqáma máqannaasa Abaraqaammána sáaqaraanannai ámiqi ámiqimma nímaqaanaura. 19 Abaraqaammáfa narí faiqi námu fáqa misásáaqari kambíqainausara faqa andeeqára óosanamau kai fuaqéera fuki faaki íanifeera rusandeesámummasee máraqiafana. Misa miqí faqa qinee qíma afeekaikíafanna áinainausa aiqáma miqímma nisaanaura.

20 Miqí qímiriséenoo Yáaweefa Abaraqaammána akooqóo kooroommásee qímaminau. Soodoomma máqusanaasa fáqa Koomoora máqusanaasa fáqa mandá óosana fíqaranoo márifaqa akaqáusa minára níkoo uqanná qaifaqá qímaqimiafaqa íriqa. 21 Qinee óoqureeqa mi fasiqa anaaseesá mi oosanná áuqee máriana qáfaanaura kúqaa fee únna fee máridanoo fee.

22 Mi qaaramoo fasiqa namúsakiqari qaara qánda Soodoomma máqusai óoqu fímarufanoo Karaambáiqa Abaraqaammána faqa márinau. 23 Abaraqaammáfa Karaambáiqa óorinni óonu réenoo irámirinoo qinau. Kúqaa fee anee andeeqárausa fáqa áaqee máriasa fáqa aiqámee nárú taikéennaree. 24 Qaara fasiqa níku nísauku taikásee qiní qísauku qára taikásee 50 andeeqárausa mi maqusánaki márifana anee aiqámee nárú taikéennaree. Kafaa 50 andeeqárausa márifana mi maqusána asumu quqéennaree. 25 Sía amana andeeqárausa faqa mandáikirausa faqa moodáanaki nárinnaranoo. Mifá sía andeeqánoo máridanoo. Andeeqárausa faqa áaqee maríasa faqa sía amana moodáa óosana kai níminnaranoo. Aiqáma maa maqánasaa máriasa siaasa márianafa andeeqára óosana kai máraà.

26 Karaambáiqa Abaraqaammána ufa iriséenoo qímaminau. Qinée qaara fasiqa níku nísauku taikásee qiní qísauku qára taikásee 50 andeeqárausa mi maqusánaki paqúriqa sía mi maqusána kurídianaura.

27 Abaraqaammáfa miná iriséenoo kafáa qímaminau. Óo karaambáiqa qinée qifaaqa quqásee aní qímamunna ufana mi numooná minní qísaa. Qinee faiqí faiqì máridaqa áaqàmámmasee ani faqa moómoo kári ufa qídaqa. 28 Amanée 50 sía márifana 45 kai andeeqárausa márifana moodáannai qísauku 5 minakí sía márinnanara irisée nárinnaree. Karaambáiqa narí qímaminoo qinau. 45 andeeqárausa mi maqusánaki márifaqa sía kuridi taikáanaura.

29 Abaraqaammáfa miná iriséenoo kafáa qímaminau. Óo karaambáiqa qaara fasiqa níku nísauku taikásee 40 andeeqárausa márifána aiqáma nárinnaree. Karaambáiqa miná iriséenoo qímaminau. Qineé qaara fasiqa níku nísauku taikásee 40 andeeqárausa paqúriqa mi maqusána sía kurídianaura.

30 Abaraqaammáfa iriséenoo kafáa Karaambáiqa qímaminau. Qinée kaifáa aní qímamíànana anée sía qiníara áanoo qia. Moodáa fásiqa áiku ásauku taikásee qiní qísauku qara taikásee 30 andeeqárausa márifana náqaa fee innáree. Yáaweefa iriséenoo qinau. Qinee 30 andeeqárausa paqúriqa sía miqíanaura.

31 Abaraqaammáfa kafáa qímaminau. Qinée qifaaqa quqásee ani faqa moómoo ufa qímarúnnana mi numooná minní qísaà. Mi maqusánaki moodáa fasiqa 20 kai márifana náqaa fee innáree. Karaambáiqa iriséenoo qinau. Qinee 20 andeeqárausa paqúriqa sía mi maqusána kurídianaura.

32 Abaraqaammáfa kaifáa qinau. Óo karaambáiqa sía áanóo qia. Qinee moó úfa kafáa qianáura. 10 andeeqárausa paqúrimásee náqi fée innáree. Miqí qufanóo Karaambáiqa qinau. Qinée qísauku qara 10 kai andeeqárausa paqúri mándee sía kurídi nímaqaanaura.

33 Karaambáiqa Abaraqaammána faqa ufa qímaseenoo dóo óoqu finau. Óoqu fúfanoo Abraqaammáfa quqásee anirandée ámaaqa finau.