1 Fúka kiapafa Feestusafa qaaramoo éenda faiqéenoo Seesareea máqusaindari Yeerusaree máqusai óori quqárara óoru fínau. 2-3 Yeerusareenni óoru márufaqa amaana máqasaa aanáiqikirausa firaasá faqa Yuda máqannaasa faiqí firaasá faqa Pauroona ufa óosana amoosáu máqeeunara qímamiqau. Miqí qímasee maaqí qímasee Feestusana qímamiqau, Óo maasá kiapafa amanée anée Pauroona maréeqee Yeerusareenni quqásainaqa ufa írianauree. Misá aanái maará maqasée áruanneera quandásee miqí qímasee qímamiqau. 4 Feestusafa misá ufa iriséenoo qinau. Pauroofa Seesareea máqusai karabúsaki máridanoo. Qinée qúsasaa óoqu fúanaura. 5 Ínni faiqí firaasá qiní faqa óoquraifaqa miqóokai Pauroona nána mandóosana maraqáinaqa misá qífaqa qinée írianaura.

6-7 Feestusafa miqí qímaseenoo qísaukuqara taikásee áfuru faiqéenoo dóo Seesareea máqusai kaifáa ururandée óoqu fínau. Iqáqoofanoo kanánaana ufa írimaruna máaqaki kéeqafi narí qaindasáa óoqu marífinoo Pauroona áaroofanoo aniroofaqa Yeerusaree máqannaasa Pauroona fíqu fíqu mámbufaqa mandúfa uqanna óosana óosana Pauroonara qímasee sía miná ánoona paqúriqau. 8 Misá taikóofanoo Pauroofa narí óosanara Feestusana qímaminau. Óo firaa kiapafa qinée sía Yuda máqannaasa sándufa rukíeeqa. Sía náaquqara amaana máqa putaa mánniseeqa maasá Roomma máqannaa firaa Kiapana sándufa sía rukíeeqa.

9 Feestusafa miná iriséenoo naríara Yuda máqannaa áqoondikianee qímaseenoo Pauroona irámmirinoo qinau. Amanée anée Yeerusareenni óorureenana Yuda máqannaa faqa qiní qífusaa misá aní amoosáu máqeeaanara andeeqéennaree. 10-11 Pauroofa miná iriséenoo Feestusana qímaminau. Maa-ufa irimaria maqáfa sía aníndi kai Roomma máqannaa firaaná ufa írira maqa maaqóo máridanoo miná sándufa maaqóora qídanoo maaqóo andeeqáaqaana. Qinée sía Yuda máqannaa mandáikamannisaunausa máridaqa anée mi-ufána ámiqimasee írimariananoo. Qinée moo sándufa rukíaanaqau moo mándainaina áuqeefau sía qinée kúqiranara rufíaunaiqini. Misá qiní qimooosáu máqara ufa óosana sía máridanoo sía moó fannoo qiní maréeqee misá nísaukuki quqáannoo. Qinée Roomma máqusai mári kiapana firaaná mináuqu Sisaanasaa miná áfusaa óonuree qianáura.

12 Miqí qímasoofanoo Feestusafa quándaki narí ufa írimarusa faqa ufa qí qíseenoo Pauroona qímaminoo qinau. Anée Sisaana áfusaa ufa andeeqáraree qíananoo. Anée Sisaana áfusaa ufa andeeqáraree qíánnanara, dóo qinée aqiqáanana minní finnáranoo.

(Mi-aukuaná Seesareea máqusaindari sípaki akarámafufaqa fífiufaqa Itari máqa maaqai Roomma máqusai fímariqau.)

13 Ufa taikáseenoo Pauroofa karabúsaki máridanoo sípa áfeesara márinau. Maríkufanoo moo kíapafa narí ánasaasandiri fúka kiapana áuqu Akaripaafa márufa áninau, miná ánasaana áuqu Beeranisa námmarifa márinau. 14 Miqandá ani maríkufanoo Feestusafa Pauroona ufa óosana óosana qímaminoo qinau.

Indaarú máriu kiapafa Feerisafa maaqóo márufanoo moo fásiqa karabúsa márufaqa karabúsa rumbáqoofa káqi máridanoo. 15 Qinée Yeerusareenni óonuraafanaqa amaana máqa aanáiqikirausa misá úriqararausa faqa faiqí firaasá faqa mi-fasiqánara mandúfa óosana óosana qímaqimisee miná áruannee qiqau. 16 Qinée miná iriséeqa Roomma máqannaasa sánda sía miqínoo máridanoo. Narí amoosáu máqainnanara sía fífau nímianaqa árifara. Maasá Roomma máqannaasa sándamau fídaqa miqandá moodáaqoo kikíqamambi ufa dínni dínni andeeqásee iriséeqa miqóo áaqarana márinaqa nímianaqa árifara sía márinaqa sía nímianauranoo. 17-19 Misá maí Seesareea máqusai qumuraafaqa qinée sía fúrufariqa iqáqaifaqa kanánaana mi-fasiqána karabúsakinaaana áaraafananoo aniroofaqa miná amoosáu máqoosa fíndifiqa dapi dápi ufa qiqau. Qinée minára moo áinaina mandáikammánnimaqee foora írunanoo sía márifaqa. Misá nári amaana sándufara kai íridaqa maaná amoosáu máqaidaqa árirara qídaqa. Misá faiqí moó miná áuqu Yísufa minára kúqinau foo qiafanóo Pauroofa minára dóo fíndifíifoo qifaqa miná sáara miná árirara qídaqa.

20-21 Miqí qiafaqa qinée Pauroonara amanée aní faqa Yeerusareenni áfiqee múrusaanaqa mi-ufána qiní qífusaa andeeqéefaree qúnanoo Pauroofa Sisaana áfusaa iráree qímaseenoo maaqóo qinée rumbáranaki máriiqa kásooqaqee Sisaa finnái qeeqá ufa miná áfusaa andeeqáraree qifaqa eedóo qímasaunanoo káqi karabúsaki máridanoo. 22 Akaripaafa Feestusana ufa iriséenoo qinau amanée qinée miná ufa írianauree. Miqí qufanoo Feestusafa qinau, Óo amaná dúna kanánaana íria.

23 Iqáqoofanoo kanánaana Akaripa faqa narí ánasaana Beeranisa námmarifa faqa anirée foo qímasee miqóoqaraasa faiqí firaasá faqa sundíauqa faqa nammári áuqamásee nifaaqa ánukamásee ámiqira ainaina nifaaqa nífaaqa íi̱seeqa aiqáma anirée padí máfufanoo mi-qambaanná miqandá rafúdamakufaqa ufa írimaru maqanaki kéeqaqau. Kéeqafufanoo Feestusafa sundía moó aqiqoofanoo Pauroona karabúsa maqakinaana áfiqee míni quqánau.

24-25 Quqásoofanoo Feestusafa aiqáma maaqí qímasee qímanniminau, Óo Karaambáiqa Akaripa ínnee aiqámausa maaqóo ani máriasa qiní ufa íria. Maa-fasiqánara ufa qídaqa. Yuda máqannaasa maaqóoqaraasa faqa Yeerusaree máriasa faqa aiqáma maa-fasiqána amoosáu máqee maríafanoo. Misá minára kúquanifeera firaaqóo fáaqa quqáida máridaqa. Qinée miná iriséeqa kuqánnáruaninna ainainara randáuna sía máridanoo naríkai Roomma máqusanaa firaaná miná áuqu Sisaana áuquraifaqa qinée dóo amana fée qíqa. 26 Qinée miná aqiqéeqa nána ufa fée pásakina akará rúmamiana máree fúannoo fee, sía márifaqa, randáunaisia. Qinée minára miná maréeqee ínni nífusaa maaqóo quqéeqa Karaambáiqa Akaripa aní faqa áfusaa quqásaanana anée miná ufa irisée qímaqiminaqa qinée miná ufa óosana irisée akará rúmma firaa Kiapana Sisaana amaqáanaura. 27 Náqi fee mándee qinée fífau aqiqáanauree. Qinée Yuda máqannaasa Pauroona amoosáu máqeemaria úfana andeeqásee akooqóo papiqasáa ákara rúmasaananoo andeeqáannoo.