1 Qinée qeeqára qimooqíanafa sia ánoonaikiannoo, káqi fífau qeeqá qimooqianáura. Karaambáiqa qífu pisipasamándeenoo kukéeqara ainaina kooroommá qímunara qímannimianauranoo.

(Ánutufa Pauroona uqéereenoo innaarúnai quqásoofanoo innaarúna quqúsakinaa ainaina qáfoonara narí áuqu kukéeqasee Koorinti máqannaasa qímannimidanoo moo fásiqa fee qídanoo.)

2 Óoqai qinée Yísuna ufa írimaru fásiqanara íriqia. Karaambáiqa Ánutufa káqi kai miná uqéereeqeenoo qaara innaaruna óoraaqareenoo qaaramoo kíranaki Ánutufa márunaki quqánau. Mifá kúqaa fee áfiqa miqóo quqánoo fee inau kai áfu pisipasamáseenoo miná amana mara uqéereeqeenoo innaarúnai quqánau fee inau. Qinée sía íridaqa Ánutufa kai íridanoo. 3 Qinée kafáa qímannimiqa mi-fasiqána uqéereeqeenoo innaarúnaki moó áuqu Paradisee minakí quqánau. Kúqaa fee miqínoo fee áfu kai fee pisipasínoo fee Ánutufa kai íridanoo. 4 Mi-fasiqána miqóo quqásoofanoo máridanoo óosana óosana ainainara írinau sía faiqí ufa amaná qímari ainaina írinau náaquqara ainainara Ánutufa qáoo qinau sía faiqí minára qímannimiannee qinau. Sía faiqí qíra ainainara írinau.

5 Miqínna fásiqanara qinée amooqianáura sía qeeqára qimooqianáura qeeqá ummooqukíannanara qimooqianáuranoo. 6 Qinée qeeqá qimooqífau sía fúrufarirafa máriqini kúqaa ánoona ufá kai máriqini. Qinée sía qeeqára qeeqá qimooqianáura. Faiqí ánaasee qiní dóoki qíqafamasee qiní dóokinaa ufa irisée náriqá kai qiníara íriaqa. Qinée qeeqá dúqu uqéeraranannai misá fífau qiní dúqu firaaqóo uqéeree foora.

7 Qinée ámiqira ainaina náaquqara ámiqira ainaina qáfaafannanara qiqá dúquara firaaqóo uqéeraifaqa áaqaranaki fuanóora Ánutufa Sadannanara káqikaaqoo eedóo qufanoo qifaaqasáa moo áupurarana qimiqoofanoo maqee maqee dárímariafaqa sía qeeqá dúqu uqéereeqa káqi qumeé kai andeeqásee márianífee qímasaida dárímarifaqa máridaqa qídaqa. 8 Qinée qaaramoo kári karaambáiqinnai innaaru qíqa anée maa-aurirána maráquqisáannee qíafananoo mifá qáoo qímasee qinau. Qeeqá káqi nímira dadaaqirana ámiafanafa dóo mifá kai doo aní amaná máriannoo, qiqá afeeka fannoo kudoosaápee máriasaki ámiqi mándee kambíqaidanoo. 9 Qinée Pauroosa miná iriséeqa maaqí qídaqa qinée qeeqá kudoosaápee márunnanara asasammásee amooqídaqa. Ásauku mundírana afeeka fannoo qiní rafáaqa fúanifeera qeeqá ummooqúkiannanara amooqídaqa. 10 Ásauku mundírana ufasáara mandúfa faqa kudoosaáparana faqa kadáapirirana faqa, Yísuna ufasáara dárirana faqa tínoo taanóo rírana faqa tínaakurirana faqa qíminaqa máreeqa dóo amaná ámiqira fee qianáura. Qinée qeeqá kudoosaápee márunna kamuqoo mi-kamúqoo kai afeekaíkidaqa.

11 Qinée ínniki ani mária fasiqausa únnaqira niqiqoo fasiqausa naannaraqá máridaqa fúrufarira fasiqara foora maa-ufána qímannimidaqa. Ínneeqá kai ínni óosana fannoo qiní mara fúrufariranaki quqáqisaidanoo. Ínnee Koorinti máqannaasa qiníara Yísuna ánoona ufa qímaqimi marí fasiqa fee qíaqaana. Ínnee ínniki ani maría únnaqira niqiqoo fasiqausara fífau únna qídaqa úriqararausee qímariafaqa misá qiníara uréeqara fasiqee qídaqa. Kúqaa qinée káqi fífau fasiqa máridau qinée sía misa uréeqarausa márunaiqini, misá úrinaaqararausa máridaqa.

12 Qinée kúqaa Yísufa diqiqoo fasiqausa máridaqa aiqáma ainaina kooroománnimaqee maríafanaqa qáfee maríqau. Ínnee sía írufaqa qinée káqi reendeenámandee uqannífiqee maríqiafana. Faiqí sía amana áuqaaqaaira ainaina faqa náaquqée marú ainaina faqa Ánutunara faqa kooroománnimaqee marú ainainna faqa reendeénamandee uqannífiqaafannana. Minánnai kai qinée niqiqáafanna fasiqausa márunnanara kooroománnimaqaqiafana. 13 Qinée maqúsa maqúsa Yísuna ufara suqímarusa faqa ínni saimbaqa faqa amana amana kái ínniki máridaqa qímannimiafannana. Sía misá ámiqimannimaqasee ínni mandáikamma nímaqasee qímariqiafana. Moodáa ainainá kai ínniki moo kíqiafanafa mifá kai qeeqá nárana munnimma sía amanaíkufaqa qinée sía ínni nárana munnimma irámmirisée máreeqa. Mi-moodaa ainainnára kai íridaqa qinée áaqeefee miqí fee qídaqa. Ínnee moó áinaina ákiaqara minní qísaaqa.

14 Qinée óoqai ínni maqúsai qaara kari fúafanausa kafáa maqee qaaramoo kífaqa doó qúsasaa fuanáuranoo, fídaqa sía ínni nárana munnimma ainaina máraanaura. Faiqi ánaaqiuqa sía nári nínaukoo nárana munnimma ainaina nímidaqa, misá kai nári faiqi námu nímidaqa qinée ínni níkausara foora máridaqa qeeqá nárana munnimma aiqáma faqa qeeqá márirana faqa ínni asasammándee nímirarammidaqa. 15 Qinée ínni níkausara foora máridaqa firaaqóo ínniara qímuqusufaqa ínnee qiní faiqiara foora quándakina firaaqóo qiníara faqa nímuqusiaqaana. Qinée kai ínniara firaaqóo qímuqusidanoo.

16 Ínnee maa-ufánara eedóo qifáranoo. Qinée ínniki máridaqa sía nárana munnimma mi-ummaarána ínni nímiqiafana. Ínnikiqari moó fannoo qiníara maaqí qíannoo Pauroofa níkaruqimásee únnufannai maasá mara quqásoofaqa maasá miná ufaanakíara foora arufúa̱nanoo maasá nárana munnimma máraandoo qifóora. 17 Dóo qinée náqifeemmásee fee ínni miqí qiqíafana. Qinée maíndari qeeqá ufa máraqa nuasa niqiqáafanaqa sía ínni maqúsai óoqureeqa sia qiní dúqusaafau ínni munnimma nárana mara máreeqau múru qímifau. 18 Qinée Titusana iráafananoo eedóo qímasee ínnee unnái finau, moo fásiqa Yísuna ufa írimarufa qiní qíkaqaafasaa miná faqa aqiqáafananoo Titusana faqa finau. Ínnee minára Titusafa maasá qíkaru qímaseenoo fee maasá aináina máreefoo qída fee. Sía fee qinée Pauroosa faqa Titusafa faqa moodáa írirana maraséeqara moodáamau fímarunnanara írida fee.

19 Ínnee mi-ufána iriséeqa qiníara maaqí qifaranoo. Pauroofa narísaa faqa narí faqa márinausa faqa misásaa faqa ititáidanoo miqídanoo fee qifáranoo. Maasá sía miqíanaura, ásauku mundírafa maasára qundée kaimmídaqa. Qiní qifaaqasáa qíqoondíuqa maasá Ánutuna áfusaa máridaqa aiqáma ainaina áuqeemaría ainaina ínni dadaaqídee qídaqa áuqaidaqa.

20 Qinée ínni maqúsai óonureeqa moo áinainara rufíaanaura. Ínni márirafa sía ámiqirafa óorudupirafa máriandoora qinée qídaqa. Koorinti máqannaasa ínnee qiníara mookámaseenoo qiqá qímiifoo qifóora anée sía reendeénamandee maasá qímaqiminnaranoo áanoommasee maasá qímaqimiifoo, qifoora. Qinée ínni maqúsai óonureeqa maa-ainaináusara rufíaidaqa, ufa raínarafa áanooqirafa máriandoora naríara naríara rairaiqifóora naríara naríara idára foora qeefóora, káaqa aináinara rímariasa nárífoora, naríara naríara mandúfa qifóora múnuqi míniqira ufa qifóora narí núqu uqéerasee nimooqifóora dapi dápi qifoora. 21 Qinée ínnee unnái óonu ráananoo Ánutufa qiní maréeqeenoo qisauríranaki quqáannoo. Qinée ínni mandóosanaki óorureeqa ínni nífusaa ikíraqasee soofaaríara foora íqa qisaurúanoora. Ínniki moómoosa óoqaindari mandóosana marasée sía minára óonumafi irisée nisaurúsee minnísaqau. Akaqáusa faiqí faqa ánaasee faqa narí úmmuari narí úmmuarirana minánnai fúrufaridaqa akaqáusa faiqí ánaasee dapi máraqanua fasiqa anaaseesa faqa akaqáusa ufa rukíasee nári mandóosana mandá íriranamau fímariasa máriafaqa sía minára óonumafi irisée nisaurúsee minnísaqau.