1 Ánutufa maasá mandóosana ákiaqara dáriraru sianoo narí nífauarana qimisaifanoo márinara maasá namu Yísuna áufakiana qímannimiranaki quqáqisaifaqa nídaqa sía níkoonikaa ídaqa sía kudoosaápaidaqa. 2 Maasá namu asukunakí nímaria oosana nisauríra óosana faqa dóo maréeqee nínaaqiannai áqusee nímeesuqusée sía únnamaanna qídaqa sía níkaruqiranaki nídaqa káqi akoomau faiqí nífusaa nídaqa. Maasá Ánutuna ufa qumáree sía múnu eendí míni eendídaqa ánoona ufa qírana kai uqéereeqee akooqóo nífusaa quqáidaqa. Maasá miqí kaimmáseeqa qeeqá nírana márirana Ánutuna áfusaara foora miqí kaimmáseeqa aiqáma maqannaasa nífusaa andeeqáanaqa misá náakirafa qíqafamasee sía qáoo qífarannoo.

3-4 Maasá ámiqira fasaasa ufa qímannimunaqa akaqáusa sía íriasa innaarúna aanara randáidaqa auíqeera foora iasá márianara náaqooki óoni ititánoo máridanoo. Mi-naaqoonáki óoni ititárausa maa-maqánasaa mandá afaanna Sadannafa misá náaqoo nífu ititáqaifanoo Ánutufara foora moodáa karirafa ásauku mundírafa miná káaqa aréenarana ámiqira fasaasa ufa qóomara foora áninaqa misára sía qáfaaqee qímasee náaqoo nífu ititéenoo. 5 Maasá namu sía qeeqára qídaqa faiqí ánaasee qímannimidaqa, maasá ásauku mundírana karaambáiqa Yísuna minára kai kooroománnimidaqa. Maasá namu Yísuna áuqu uqéeraidaqa Yísunara ínni qímannimidaqa ínniki rumbára fasiqara foora aináina mánnisaidaqa. 6 Óoqai indaarú Ánutufa asukunakíqari káaqa qáranara qáani fee qufá mi-moodaa Anutufá kai narí áreenarana maqee maasá qitikúraki qóomara foora qeenoo. Ánutuna aréenarafa narí ásauku mundírana óorisaa aréenaidanoo mi-areenarána áufakiana ínnisaimbaqa íriaqee qímasee Ánutufa ínnisaimba maasá qitikúraki qóomara foora qáidanoo.

7 Mi-areenarána áufakiana firaa munnimma áqimari ainaina fára foora márifa maasáki fífau maqánnai áuqira qáfeera foora maasáki quqáqaifaqa sía faiqí faiqi aináinimariana amanasáa aináinidaqa, fíqararafa márunara aináinidaqa. Ánutufa mi-fiqaramasee ainainirána naríndikai márinara akooroo íanifeera narí aréenara áufakiana maasáki fífau maqánnai áuqimaria ainainaki quqánau. 8-9 Maasá Yísunara qímannimimarunaqa minára níkooqee máriasa díndari díndari fuseeídaqa sia ámiqimandee ititáafanoo Ánutufa sandára ápootaana quqásaifaqa miqóo quqásee sandéeqa maasá yáifee fuanáu yáifee fuanáu qímasee sía káaqa quqásee minníseeqa, misá maasá qífaqamaree fíqa sía Ánutufa kúqaa mínniqiseenoo. Misá daru quqásaafaqa sía káaqa kúqiqa.

10 Yísuna árundee dárí dárí isoofaqá qiní qifaaqa ufaanakurú moómoo márifaqa máraqa nídaqa maaqí qídaqa. Mi-ufaana kurúnannai Yísuna márirana maasá qifaaqasáa aiqámausa nífusaa kooroo íanifeera miná kúqirafa faqa ufaanakurú fannoo maasá qifaaqasáa márina miná kúqirana akooroo íanifeera máridanoo. 11 Maasá káqi márunaqa Yísuna náaru marirana maasá faiqí faiqi qifaaqasáa koorooíanifeera miná ufasáara kúqiranaki maqee maqee fídaqa. 12 Minára maasáki kúqirafa kásinara ínni Koorinti máqanaaki náaru marirafa kásidanoo. 13 Tamummáqara fasiqa minára maaqí qímasee ákara rínau.

Qinée Pauroosa mi-maú fídaqa qinée minára maaqí qídaqa. Maasá faqa írirana rusírafa márinara qímannimidaqa. 14 Maasá maaná faqa íridaqa, karaambáiqa Yísuna kúqiranakinaana uqéeroofa maasá ínnisaimbaqa Yísuna faqa uqéera narí óorisaa quqáqisáannoo. 15 Maa-aiqama ainaináusa ínni dadaaqírafa kambíqaidanoo Ánutuna áfaarirafa moómoo fasiqa anaasee iannái fifaqá iriséeqa misá dúfi Ánutunara qírafa firaaqóo kambíqafinoo miná amooqírafa firaanáikiannoo.

16 Maasá minára iriséeqa sía kudoosaápaidaqa minnísaidaqa. Maasá faiqí qifaaqa kúqaa qúmidaqa dóo kúqirannai ubeekáidaqa daundurákinaafa faasaambáasaana fúkaikákai iqá máridaqa. 17 Kúqaa maasá maqee márunnanaki úfaasu unmaara dárirafa máridanoo dóo mifá kai firaa areenarana náaru marira areenarana sía amaníaqaairana dóo káaqa firaatía qímiannoo. 18 Sía maasá maqee qáfee márunna ainainasaa maasá írirafa mundídanoo, maasá sía qáfee márunna ainainará kai íridaqa. Akooqóo qáfee maría ainainafa qúsasaa taikáidanoo, sía akooqóo qáfee marí ainainafa náaru náaru máriannoo.