45
Biaŋinba ki Yennu gann Sairus
1 Yennu gann Sairus-e ki teenɔ kpanbar.
U gann ŋɔɔe a wun kɔn nyann digbana,
ki tumɔ a wun liat kpanbara.
Yennu saa loot doi na tammɔi ki turɔ.
Yennu pak ki tur kpanbar Sairus a,
2 “N mɔŋe saa ŋamm sɔnu ki tura,
ki naa jɔɔt nan kunkona.
N saa yeer bi kutgana na, ki biir bi kutlaana na.
3 N saa nyinn mɔkint bɔra ni ki tura,
ki a bann nan mine tee Yennu
ki bia bann nan min Israel teeb Yennu-e put a sann ki yiina.
4 N ganna maa a somm n toontunna Israel teebe,
ŋamme tee niib nba ki n gann.
Faa lek ki min na, ŋaan n te ki a la baakir bonchiann.
5 “Mine tee Yennu, ki yensau ji kaa ki pukin n po.
Faa lek ki min na, ŋaan n saa tura paŋ nba ki a loon.
6 N tuun linba na, a nisaarik kur nba be durinya na ni n bann
nan mine tee Yennu, ki yensau ji kaa ki pukin n po.
7 Mine nan yentu nan bunbɔnn kura;
mine baat nan piisin nan biiru kur.
Min Yennu-e tuun linba na kur.
8 N saa te ki nyannu n nyi sanpaapo ki baa nan saak nae,
ki tingbouŋ saa teen siir ki gaarir,
ki yent-n-mɔŋ nan barmɔnpaku sii be.
Min Yennu-e saa te linba na n tun.”
Ki jiin naamii nan barkperii Yennu na po
9 Bobir nba tee nan bobilia na
saa fit nɔi nan wunba maau nawa-a?
Yɔk saa fit boi yɔkmaarɔ linba ki u tuuna-a?
Bobir saa fit yet a wunba maau na ki mi toonna-a?
10 Sɔɔ saa fit yet u damm a, “Bee ki i marin nna?”
11 Yennu nba tee Israel teeb kasii Yomdaanɔ,
ki tee wunba ŋmakitir tɔɔnn po binbeŋ na yeen a,
“A kaa yaak ki saa boin siar ki jiin n waas po,
koo ki wannin linba ki n saa tumii.
12 Mine nan tingbouŋ na, ki nan nisaarii a bii be leŋ.
N jii n yiikooe ki jɔnn sanpaak,
mine ŋmakitir yonnu nan ŋmaarik nan ŋmaabira.
13 Mine fiin Sairus maa wun tun gbeen n loomm,
ki lin ŋmant bona.
N saa sont sɔnu nba kur ki u tɔkii,
u saa ŋamm maa n digbann Jerusalem,
ki nyinn n niib nba be dansarii ni na, ki ŋaab.
Sɔɔ ki jiiu, koo ki kɔɔu nan likirii, a wun tun linba na.”
Yabint daanɔ Yennu-e pak na.
14 Ki Yennu yet Israel teeb a,
“Ijipt nan Sudann mɔkint sii tee i yare,
ki Seba jafɔkit na sii tee i yommii,
ki waa i poor po, ki jarit diab.
Bi saa gbaan i tɔɔnn ki pak kat a,
‘Yennu be nani, u kɔɔe tee Yennu,
15 Israel teeb Yennu nba tint u niib nae
tee Yennu nba woont u mɔŋ.
16 Binba maa pata na kur saa di feiwa,
bi kur yura saa tibina.
17 Ŋaan Yennu-e tint Israel teeb,
ki bi nyannu na sii yɔɔ be,
ki niib maŋ kan ban di fei.’ ”
18 Yennu-e nan sanpaak, ŋɔɔe tee Yenmɔnu.
Ŋɔɔe nan tingbouŋ na, ki li see fanu, ki bia saa wei.
U ki namir ki li dɔɔ yann kaa,
ŋaan u te ki li tee boor nba ki niib sii be-e.
Ŋɔɔe yet a, “Mine tee Yennu, ki yenlɔɔ ji kaa ki pukini.
19 N ki bɔr pak kaa, koo n ki bɔr n lora.
N ki yet a Israel teeb n lomin yann boori.
N tee Yennu-e ki piak barmɔnii, ki fiitir linba took ki want.”
Ki jiin Yennu nba yen durinya na po
20 Ki Yennu yet a, “Lakint man, yimm digbana teeb,
yimm nba nyii digbana biiru ni na, baat buut man.
Niib nba somm nan bi pata nba tee daat,
ki mei pata nba kan fit tinnib na,
niib maŋ ki mi siar nan waama.
21 Baat nan i maan buut boor,
ŋaant i sommteeb na n pak nan bi leeb.
Yaayoo ni, ŋmee din bunt linba tan saa tumi?
Li din ki tee min Yomdaanɔ Yennu nba tint niib na kaa-a?
Yensau ji kaa.
22 “Durinya kur niib, baat n boor man ki la tinnu.
Min kɔɔe tee Yennu nba be.
23 N mɔsonn tee barmɔniie, ki kan lebiti.
N senn mɔsonne ki turib nan n kpan tee maa tee wunbae,
a nisaarik kur saa baar ki gbaan n boor
ki por senn nan u sii waan.
24 “Bi saa yet a nyannu nan paŋ nyi n kɔɔ boore,
ŋaan binba ki loon n maan na saa di fei.
25 Min Yennu saa tinn Israel teeb nan bi yaaboona kur,
ki bin turin dontir.