1 माननीय थियोफीलस, इं रागीम मार मार दुम्‍मे, मेको आ पर्बम शुश लोव़ ब्रशो बाक्‍माक्‍त। 2 ङोंइती रे मेको ताइब नु तुइक्‍बपुकीमी मेको आन तशो, तुइश्‍शो लोव़ तेइ तेइ नेंपाइश्‍शो बाक्‍मा बाक्‍त। १यूहन्‍ना १:१-४ 3 गोमी ताइब तुइक्‍ब आन देंशो नेंशा, ब्रेक्‍ब आन ब्रेक्‍शो पढेशा “थमान बाक्‍माक्‍त” देंती। मिनु गो यो ब्रेक्‍तु देंशा, एको लोव़ का का पा इन कली ब्रेक्‍ताक्‍न्‍नी। प्रेरित १:१; कलस्‍सी ४:१४ 4 लोव़ का निक्‍शी ङोंइती नेंनी माइ। एको आं ब्रेक्‍शो यो पढेतीनी हना, गेमी यो “थमा बाक्‍माक्‍त” दे थमा सुइक्‍नीनी।

5 यहूदीया रागीम हेरोद पिप आ पालामी अबीयाह आ हुल ङा जकरिया नें पाइश्‍शो चढ़ेब का बाक्‍माक्‍त। आ मीश हारून आ खिं ङा चढ़ेब आ तमी बाक्‍माक्‍त। आ नें एलीशीबा बाक्‍माक्‍त। १इतिहास २४:१०,१९ 6 मेको निक्‍शी परमप्रभु यावे आ ङोंइती ठीक पाइब बाक्‍सा बाक्‍त। परमप्रभु यावे आ अरेशो लोव़ नु पतीके लोव़ नेल्‍ल टिशा, दोस मताइब दुम्‍शा बाक्‍शो बाक्‍सा बाक्‍त। 7 मेको निक्‍शी खाल्‍पी खाल्‍पा दुम्‍‍शो बाक्‍ताक्‍स हना यो, आल मथिशो बाक्‍सा बाक्‍त। मारदे हना एलीशीबा आल मथीब मीश मुर बाक्‍माक्‍त।

8 मिनु मार दुम्‍माक्‍त देंशा हना, चढ़ेब आ गेय पचा कली अबीयाह आ हुल आन पालो जाक्‍माक्‍त। मिनु जकरिया यरूसलेम ल‍माक्‍त। मिनु मेकेर जाक्‍दीश्‍शा, परमप्रभु यावे आ खिंमी गेय पवा बाक्‍त। 9 मिनु धूप चोचा कली चढ़ेब योव़चा माल्‍बाक्‍माक्‍त। मिनु चढ़ेबपुकीमी यहूदी आन पतीके धूप चोइब मुर योव़चा कली भोट तोक्ग‍मे बाक्‍त। मिनु भोट तोक्‍गमेनु, जकरिया योव़से बाक्‍त। मिनु जकरियाम परमप्रभु यावे आ खिंमी धूप चोचा माल्‍दा बाक्‍त। प्रस्‍थान ३०:७ 10 मिनु धूप चोची ना मुर नेल्‍ल लाङगाम रिम्‍शा, परमप्रभु यावे कली पुंइना पुंइन बाक्‍मा बाक्‍त।

11 मिनु आगामी चहिं मार दुम्‍माक्‍त देंशा हना, परमप्रभु आ स्‍वर्ग ङा गेय पाइब का फो ग्रूशा, धूप चोतीके आ ग्‍युरा गे राप्‍शा, जकरिया कली तपांइसे बाक्‍त। 12 मिनु जकरियामी मेको कली तशा, थाम्‍पा हिंमाक्‍त। 13 मिनु परमप्रभु यावे आ स्‍वर्ग ङा गेय पाइबमी “जकरिया महिनो। परमप्रभु यावेमी इ पुंइशो गेब। इ मीश एलीशीबाम तौ का थीब। मिनु गे मेको आ नें यूहन्‍ना वोतो। 14 मेको आल थिशो तशा, गे ग्‍येरसीनेवे। शुश मुर मेको आल आ पर्बम ग्‍येरसीनीम। 15 मारदे हना मेको परमप्रभु आ ङोंइती ठेयब दुम्‍ब। मेकोमी शांबु राकसी मतूब। मेको कोव़जम बाक्‍मेनुन, परमप्रभु यावे आ सोक्‍तीम ब्रीशो बाक्‍ब। न्‍यायाधीस १३:४-५ 16 मेकोमी शुश इस्राएली आन थुं परमप्रभु, आन परमप्रभु यावे गे लेप्‍पाइक्‍ब। 17 मिनु मेकोमी एलीया आ सोक्‍त नु सक्ति तशा, आम आफ आ थुं आन तमी तौ गे लेप्‍पाइक्‍ब। मिनु मटीब आन कली ठीक पतीक लां जोक्‍ब तुइक्‍ब सेल्‍ब। मिनु मोपा मुर आन कली प्रभु नु ग्रुम्‍पाइक्‍चा कली ठीक सेल्‍ब” देंमाक्‍त। मलाकी ३:१,२३,२४; मत्ती १७:११-१३ 18 मिनु जकरियाम परमप्रभु यावे आ स्‍वर्ग ङा गेय पाइब कली “गो खाल्‍पा दुम्‍ती, आं मीश खाल्‍पी दुम्‍त। आल थीनस्‍कु, दे दोपा थमा सुइक्‍चा ङा?” देंमाक्‍त। उत्‍पत्ती १८:११ 19 मिनु “गो परमप्रभु यावे आ स्‍वर्ग ङा गेय पाइब गाब्रीएल नङ। गो परमप्रभु यावे आ ङोंइती बाक्‍नुङ। परमप्रभु यावेमी इ कली ग्‍येरपाइक्‍ब लोव़ नेंपाइक्‍थ सोइक्‍ताक्‍यी। दानीएल ८:१६ 20 तन्‍न गे आं देंशो लोव़ थमा मसुदी। मोपतीके आं देंशो लोव़ नेल्‍ल मदुम सम्‍म गे इ सेंदा सोव़शा ब्‍वाक्‍ने मचाप्‍ब दुम्‍नेवे” देंमाक्‍त।

21 जकरिया आगाम बाक्‍मेनु, शुश मुर लाङगाम देल्‍शा “ना रेन आगा ओव़शो मार पवा माइ, काइ मग्रू” देंशा रिम्‍दमे बाक्‍त। 22 मिनु नोले जकरिया ग्रूशा “लोव़ पङ” देंमेनु, काइ लोव़ पने मचबा बाक्‍त। मिनु गुइ चाल पवा बाक्‍‍त। मिनु लाङगाम बाक्‍बपुकीमी “मेकोम परमप्रभु यावे कली ग्रुमा बाक्‍त” दे तुइक्‍तमे बाक्‍त। 23 मिनु अबीयाह आ हुल ङा पालो नुप्‍शा, जकरिया आ खिं लेम्‍माक्‍त।

24 मिनु आ मीशेम कोव़ज कुरा बाक्‍त। मिनु ५ महिना सम्‍म सुइ आन कली मतुइक्‍पाइक्‍थु, खिं ङा खिं बाक्‍माक्‍त। 25 मिनु “मुरपुकीमी आं कली आल मथीब, दे महिक्‍गेम। मुल परमप्रभुमी आं कली हिक्‍पाइक्‍चा कली शिशी पतीकेमी आल थीब दुम्‍पाइक्‍‍ती” देंमाक्‍त। उत्‍पत्ती ३०:२३

26 एलीशीबामी आल कुरशो ६ महिना दुम्‍मेनु, परमप्रभु यावे आ स्‍वर्ग ङा गेय पाइब गाब्रीएल गालील रागी ङा नासरथ सहर सोइक्‍चा पुंइसे बाक्‍त। 27 मेकेर मरीयम नें पाइश्‍शो मीश आल का बाक्‍माक्‍त। मरीयम दाऊद आ थर ङा योसेफ माइश्‍शो वोंइश मुर नु ग्‍युंबे पचशो बाक्‍माक्‍त। मत्ती १:१६-१८ 28 गाब्रीएल मरीयम आ बाक्‍तीके जाक्‍शा, मरीयम कली “परमप्रभु गे नु बाक्‍ब। इ कली दाक्‍शा, आसीक गेते” दे सेउ पवा बाक्‍त। 29 मिनु मरीयममी परमप्रभु यावे आ स्‍वर्ग ङा गेय पाइब कली तशा, आ लोव़ नेंशा छक लाक्‍शा “मार लोव़ माइ” दे मिम्‍ता बाक्‍त। 30 मिनु गाब्रीएलमी “ए मरीयम, महिनो। परमप्रभु यावेमी इ कली दाक्‍शा योव़ते। 31 गे मुल कोव़ज कुरशा, तौ का थीनेवे। मिनु इ तौ कली येसु नें वोतो। यसैया ७:१४; मत्ती १:२१-२३ 32 मेको ठेयब दुम्‍ब। मेको कली नेल्‍ल क्‍येङा ठेयब आ तौ देंनीम। मिनु परमप्रभु, परमप्रभु यावेमी मेको कली आ किकी पिपी दाऊद आ ठेयब नित्‍तीके गेब। यसैया ९:६ 33 मिनु मेको याकूब आ खिं ङा मुर, यहूदी आन पिप दुम्‍शा, हुकुम पाइब। मिनु आ राज्‍य गेनायो मनुप्‍ब” देंमाक्‍त। 34 मरीयममी मेको लोव़ नेंशा “गो मुल सम्‍म ग्‍युंबे मपशो बाक्‍नुङ। गो वोंइश मुर नु मइम्‍ङ। इन देंशो दोपा दुम्‍ने चाप्‍बा ङा?” दे हिल्‍लो पवानु 35 “परमप्रभु यावे आ सोक्‍तीमी इ कली सुम्‍ब। मिनु नेल्‍ल क्‍येङा ठेयब आ सक्ति ताइनेवे। मोपतीके इ आल परमप्रभु यावे के बाक्‍ब। मेको कली परमप्रभु यावे आ तौ देंनीम। मत्ती १:१८-२० 36 इ थर ङा एलीशीबा कली यो मार दुम्‍त देंशा हना, आल मथीब खाल्‍पी बाक्‍त हना यो, मुल कोव़ज कुरशो ६ महिना दुम्‍त। 37 मारदे हना परमप्रभु यावेमी पने मचाप्‍शो मारेइ मबाक्‍ब” देंमाक्‍त। उत्‍पत्ती १८:१४ 38 मिनु मरीयममी “गो परमप्रभु आ वाइलीम दुम्‍ती। मिनु इन देंशो बुद पा आ दाक्‍शो पपाइय्‍यील” देंमाक्‍त। मिनु परमप्रभु यावे आ स्‍वर्ग ङा गेय पाइब लेश्‍शा ल‍माक्‍त।

39 मिनु नोले मरीयम यहूदीया रागी ङा पहाडी सहर कामी बाक्‍शो एलीशीबा कली ग्रुम्‍थ लमाक्‍त। 40 मिनु जकरिया आ खिं ओव़शा, एलीशीबा कली सेउ पवा बाक्‍त। 41 मरीयम आ सेउ ताक्‍गानु, एलीशीबा आ कोव़ज ङा आल प्रेक्‍माक्‍त। मिनु परमप्रभु यावे आ सोक्‍तीमी एलीशीबा कली प्रिंदा बाक्‍त। 42 मिनु ठेयब सेंदा पा मरीयम कली “मीश मुर नेल्‍ल आन दातेमी गे आसीक ताइब बाक्‍नेवे। इ कोव़ज ङा आल आसीक ताइब बाक्‍ब। 43 आं प्रभु आ ममा दोपा आं खिंमी आं कली ग्रुम्‍थ जाक्‍नी? 44 गो इ सेउ ताक्‍गुनु, आं कोव़ज ङा आल ग्‍येरशा प्रेक्‍त। 45 गे परमप्रभु आ लोव़ नेंशा, आ देंशो गेना हना यो जाक्‍दीप्‍ब, दे थमा सुइक्‍तीनी। परमप्रभु यावेम इन कली आसीक गेवल” देंमाक्‍त। लूका ११:२७-२८

46 मिनु मरीयममी “आं थुंमी परमप्रभु कली ठेयब सेल्‍नुङ। १सामुएल २:१-१० 47 मारदे हना मेको आं कली श्‍येत रे प्रोंइब, परमप्रभु बाक्‍ब। गो ग्‍येरसीनुङ। 48 गो महिक्‍सीशो आइक्‍च नङ। तन्‍न परमप्रभु यावेमी आं कली हिक्‍ती। मुल ङा मेरे जात नेल्‍ल ङा मुरपुकीमी आं कली आसीक गेनीम। 49 मारदे हना सक्ति पाइश्‍शोमी आं कली थम रिम्‍शो पाइक्‍ती। परमप्रभु यावे आ नें का ला बाक्‍ब। 50 सु सुम मेको कली मान पा हिंनीमी, मेको आन कली शिशी पाइब। भजन संग्रह १०३:१३,१७ 51 मेकोमी सक्ति कोंइताक्‍व। मिनु ठेयब लेश्‍‍शो आन कली आन मिम्‍शा हिंतीके मेको आन कली गेब। उत्‍पत्ती ११:८ 52 हुकुम पाइब आन सासन पशो रोइश्‍शा, महिक्‍सीशो आन कली ठेयब सेल्‍तु। भजन संग्रह १४७:६ 53 शोव़लु बेक्‍शो आन कली जचा गेब। शोंप पाइश्‍शो आन कली श्‍येत्‍थ गुइ सोइक्‍ब। भजन संग्रह ३४:११; भजन संग्रह १०७:९ 54 मेकोमी आ शिशी कोंइशा, आ वाइल इस्राएल कली वारच पाप्‍तु। 55 मेकोमी इं किकी पिपी, अब्राहाम नु आ चच युइ आन कली गेना हना यो शिशी पचा कली मिम्‍ताक्‍व” दे मरीयममी परमप्रभु यावे कली मान पा देंमाक्‍त। उत्‍पत्ती १७:७; उत्‍पत्ती १८:१८ 56 मिनु मरीयम एलीशीबा आ खिंमी महिना सां सम्‍म बाक्‍शा, आ खिं लेम्‍माक्‍त।

57 मिनु ङोंइती देंशो बुद पा एलीशीबामी तौ का थि‍माक्‍त। 58 आ एर ओंथ बाक्‍ब नु आ खिं ङा मुर नेल्‍लेमी “परमप्रभुमी मेको कली शिशी पा, तौ थीब सेल्‍तु” देंशो नेंशा, नेल्‍ल मेको नु ग्‍येरसमा बाक्‍त।

59 मिनु आल ८ नाक्‍त दुम्‍मेनु, जकरिया आ खिंमी मुर देल्‍शा, ख्रोइक्‍तीक चिनु ख्रोइश्‍शा, आल आ नें वोइक्‍चा‍मेनु, नेल्‍लेमी “आ आफ आ नें खोदेंशोन वोइक्‍चा” देंमा बाक्‍त। उत्‍पत्ती १७:१२ 60 तन्‍न आल आ ममामी “मदुम्‍ब, एको आ नें यूहन्‍ना वोइक्‍चा माल्‍ब” देंमाक्‍त। 61 मिनु मुरपुकीमी “मुल सम्‍म इन खिं ङा सुइ मुरुमी मोदेंशो नें मवोदेम” देंमा बाक्‍त। 62 मिनु नोले “आ आफ कली हिल्‍लो पय” दे जकरिया कली हिल्‍लो पामेनु, 63 जकरियाम ब्रेक्‍तीक का पितीन, दे चाल पा “आं तौ आ नें यूहन्‍ना वोतीने” दे ब्रेक्‍ता बाक्‍त। मिनु नेल्‍ले छक लाक्‍मा बाक्‍त। 64 मेना जकरिया आ सेंदा ग्रिश्‍शा, ब्‍वाक्‍ने चाप्‍ब दुम्‍शा, परमप्रभु यावे कली ठेयब सेला बाक्‍त। 65 मिनु लोव़ पाइब दुम्‍त देंशो नेंशा, मुर नेल्‍ल छक लाक्‍शा हिंमा बाक्‍त। मिनु मेको लोव़ यहूदीया ङा पहाड नेल्‍ल ब्रमाक्‍त। 66 नेंबपुकीमी मेको लोव़ आन थुंमी वोइश्‍शा “मेको आल नोले दोदेंशो दुम्‍बा?” देंमुमा बाक्‍त। मारदे हना परमप्रभु मेको आल नु बाक्‍माक्‍त।

67 आल आ आफ जकरियामी परमप्रभु यावे आ सोक्‍तीम ब्रीशा, परमप्रभु यावे आ लोव़ पवा बाक्‍त। 68 मेकोमी “परमप्रभु, इस्राएली आन परमप्रभु यावे ठेयब बाक्‍ब। मारदे हना इस्राएल ङा मुर इं कली शिशी पा पाप रे प्रोंइब सोइक्‍चाप्‍तु। लूका ७:१६ 69 मेकोमी आ गेय पाइब दाऊद आ खिं ङा मुर रे इं कली सक्ति पाइश्‍शो पाप रे प्रोंइब सोइक्‍ताक्‍व। 70 साइ नेसी परमप्रभु यावेमी आ लोव़ पाइब आन कली मेको इस्राएल कली पाप रे प्रोंइब आ पर्बम लोव़ पपदा बाक्‍त। मिनु मेको लोव़ पाइबपुकीमी मार देंमा बाक्‍त देंशा हना 71 ‘परमप्रभु यावेमी गो इस्राएल ङा मुर आंइ कली आंइ जोरी सत्रु आन गुइ रे नु आंइ कली काइ मदाक्‍ब रे प्रोंइब’ देंमा बाक्‍त। 72 ‘परमप्रभु यावेमी आंइ किकी पिपी आन कली शिशी पाइनुङ’ दे आ पशो कबल मिम्‍ताक्‍व। उत्‍पत्ती १७:७ 73 मोदेंशो पा शिशी पाइनुङ, दे इं किकी पिपी अब्राहाम नु कसम जशा लोव़ थोक्‍ता बाक्‍त। मार लोव़ थोक्‍शो बाक्‍त देंशा हना उत्‍पत्ती २२:१६-१८; मीका ७:२० 74 ‘गो इं जोरी सत्रु आन गुइ रे प्रोंइचा पुंइसीनय। मिनु गो महिंथु परमप्रभु यावे कली ठेयब सेल्‍ने चाप्‍नय। 75 आ मुर दुम्‍शा, ब्रोंइका सम्‍म ठीक गेय पा बाक्‍ने चाप्‍यल’ दे परमप्रभु यावे आ लोव़ पाइबमी देंमा बाक्‍त। तीतस २:१२-१४ 76 मिनु जकरियामी आ तौ कली ‘गे नेल्‍ल क्‍येङा ठेयब आ लोव़ पाइब’ देंनीमी। मारदे हना गे प्रभु आ ङोंइती गाक्‍शा, मेको आ लां सेल्‍नेवे। मलाकी ३:१ 77 गे मेको आ मुर आन कली आन पाप क्‍याम्‍सीशा, पाप रे ब्रोंइशो मुर दुमीन, दे शेंनेवे। येरमीया ३१:३४ 78 आंइ परमप्रभु यावेमी इं कली दाक्‍शा, शिशी पा, रुप्‍तीक थुं सुनी ङा छेङछेङ खोदेंशो पा इं तार मोइक्‍ताक्‍व। यसैया ६०:१-२ 79 मिनु मेको बेक्‍पाइक्‍ब आ छिङछिङम बाक्‍ब आन कली हाम्‍सो दुम्‍ब। मिनु मेकोमी आंइ कली थुं नाइश्‍शा बाक्‍तीकेम खुल्‍ब” देंमाक्‍त। यसैया ९:१

80 मिनु यूहन्‍ना कोल्‍शा, परमप्रभु यावे आ सोक्‍तीम बोल्‍यो दुम्‍शा, खिं रे गाक्‍शा, मुर मबाक्‍तीके गोरशो रागीमी जाक्‍दीश्‍शा, इस्राएल ङा मुर आन कली परमप्रभु यावे आ लोव़ मशेंदीमी सम्‍म मेकेर बाक्‍माक्‍त। मत्ती ३:१