1-2 Wen Krais Jeezas kohn set op fi hihn kingdom, ih wahn joj evribadi, livin ahn ded. Soh Ah di koman yu fronta Gaad ahn Jeezas Krais fi preech di Werd a Gaad. Noh let op ataal ataal ataal. Preech it weda ih luk laik da di karek taim er nat. Teech yu peepl dehn gud; karek dehn ahn tel dehn bowt dehnself wen dehn du rang. Bot du it eena wahn payshent way soh dat yu ku inkorij dehn. 3 Kaa di taim di kohn wen peepl noh wahn waahn yehr gud song teechin. Insted, dehn wahn goh afta weh dehn waahn, ahn dehn wahn bring een lata peepl weh wahn teech dehn weh fi dehn oan ayz di eech dehn fi yehr. 4 Dehn wahn rijek di chroot ahn bileev loan lai-an-stoari. 5 Bot yu mos aalwayz kip yu hed wid yu. Noh frayd fi sofa fi di Laad. Du di werk a wahn ivanjelis, ahn finish di jab weh Gaad gi yu fi du.

6 Az fi mee, fi mee laif da wahn sakrifais weh don poar owt tu Gaad. Da soon taim fi mee ded. 7 Ai don fait wahn gud fait. Ai don ron di rays aredi, an Ah mi faytful tu di en. 8 Ahn now, di krong weh yu geh wen yu liv rait di wayt fi mi. Dat da weh di Laad, weh da di raichos Joj, wahn gi mee pahn di Day wen hihn kohn bak. Da krong deh da noh oanli fi mee, bot da fi evribadi weh di lang wid aal dehn haat fi mek hihn kohn bak.

9 Chrai az haad az yu kud fi kohn si mi soon. 10 Bikaaz Deemas lov di ting dehn weh eena dis werl soh moch, ih lef mi ahn gaan aaf da Tesalonaika. Krezens gaahn da Galaysha, ahn Taitos gaahn da Dalmatya. 11 Oanli Look deh wid mi. Goh pik op Maak ahn bring ahn lang wid yu wen yu di kohn, kaa hihn ku help mi wid di werk weh Ah di du. 12 Ah don sen Tichikos tu Efisos. 13 Wen yu di kohn, bring mi koat weh Ah mi lef wid Karpos eena Chroawaz, ahn bring di buk* Er: skroal. dehn, espeshali di wan dehn weh mi mek owta leda skin.

14 Alegzanda, di man weh mek ting owta metal du mi nof eevl. Di Laad wahn pay ahn bak fi weh ih du tu mi. 15 Unu beta wach owt fi hihn, bikaaz ih noh agree ataal wid weh wi preech, soh ih reeli deh gens wi bad.

16 Di fos taim Ah gaahn da koat, nobadi neva gaahn lang wid mi fi stan op fi mi. Evribadi lef mi. Ah pray seh dat Gaad wahn fagiv dehn fi dat. 17 Bot di Laad mi deh wid mi. Ih gi mi schrent soh dat Ah kuda mi tel di Gud Nyooz tu aal di peepl dehn weh da noh Joo. Ahn soh di Laad sayv mi fahn di laiyan mowt. 18 Di Laad wahn sayv mi fahn evri eevl ting weh kohn gens mi. Ih wahn kip mi sayf ahn kehr mi da hevn wehpaa hihn di rool. Mek wi gi ahn gloari fareva ahn eva! Aymen.

19 Tel Prisila ahn Akwila heloa fi mi, ahn tel aal dehn wan eena Onisiforos hows heloa tu. 20 Erastos mi stay eena Korint, an Ah lef Chrofimos da Maileetos, bikaaz ih mi sik. 21 Chrai az haad az yu kud fi kohn fi si mi bifoa winta taim.

Yubolos, Prudens, Lainos, ahn Klaadya, lang wid aal di ada bradaz ahn sistaz, aala dehn seh heloa tu yu.

22 Ah pray seh dat di Laad Jeezas Krais deh wid yu spirit.

Ah pray seh dat di grays a Gaad wahn deh wid aala unu.