2 sɑ̀ n ɡɑri ɡeruɑ yi koo nun du?

Wɑrɑ u koo sere ɡɑri yini nɔ u n mɑɑri.

3 Wee tɔn dɑbinɑ ɑ keu sɔ̃ɔsi,

mɑ ɑ nuku sɑnkirobu dɑm kɑ̃.

4 Wunɛn ɡɑri yi be bɑ rɑɑ kpɑnɑmɔ dɑm kɑ̃.

Mɑ ɑ be bɑ ɡɔmɑ dwiiyɑ tɑ̃sisiɑ.

5 Wee tɛ̃ ɡɑri yi nun deemɑ, mɑ ɑ kpɑnɑmɔ.

Wee wɑhɑlɑ yɑ nun ɡirɑri, mɑ ɑ burisinɛ.

6 N ǹ Gusunɔ sɑ̃ɑrɑ tɑ sɑ̃ɑ wunɛn dɑm?

N ǹ wunɛn yĩiyɔbu bu rɑ n wɑ̃ɑwɑ Gusunɔ win mi

yèn sɔ̃ ɑ nùn mɛm nɔɔwɑmmɛ?

7 Ǹ n mɛn nɑ, ɑ bwisikuo wunɛn wɑ̃ɑru sɔɔ,

ɑ̀ n nɔɔre bɑ tɑɑrɛ sɑriruɡii ɡoo ɡo,

ǹ kun mɛ bɑ ɡemɡibu mwɛɛrɑ bɑ kpeerɑsiɑ.

8 Nɛ, nɑ ɡɑbu wɑɑre, kɔ̃sɑn sɔmburɑ bɑ rɑ n mɔ̀,

kpɑ bɑ n weesu swĩi.

Mɛyɑ bɑ rɑ mɑɑ ye kpuron ɑre wɑ.

9 Bɑ rɑ n Gusunɔn mɔru seeye

kpɑ yu kɑ bu kɑm koosiɑ nɡe woo bɔkɔ.

10 Kpɑ ben kukiri bi bɑ rɑ ko nɡe ɡbee sunɔ bu nɔru ko.

Gusunɔ u rɑ ben nɔsu bɔɔkuwɑ.

11 Bɑ ko n sɑ̃ɑwɑ nɡe ɡbee sunɔ mɛro ɡe ɡɑ yɑɑ biɑ ɡu di,

mɑ ɡɑ ɡu, ɡen binu yɑrinɑ.

12 Gɑri ɡɛɛ mɑn nɑɑwɑ ɑsiri sɔɔ wɔ̃kuru,

mɑ nɛn swɑsu su yi nuɑ fɛrɛ fɛrɛ,

13 wɔ̃ku suunu sɔɔ, sɑɑ ye tɑ nɑnum kuɑ tɑ kpɑ,

mɑ tɔmbɑ kpĩ kpɑtɑ kpɑtɑ bɑ dosimɔ.

14 Sɑɑ yerɑ nɑ nɑndɑ,

mɑ nɛn wɑsi kpuro diirɑ.

15 Mɑ ɡɑ̃ɑnu mɑn sweemɑ nɡe woo,

mɑ nɛn wɑsi kiri seewɑ.

16 Nɑ ɡoo wɑ wi nɑ ǹ tubɑ.

Mɑ nɑ nɔɔ ɡɑɡu nuɑ ɡɑ ɡerumɔ tɛɛru tɛɛru ɡɑ mɔ̀,

17 tɔnu u koo kpĩ u n dɛɛre Gusunɔn wuswɑɑɔ?

U koo kpĩ u n dɛɛre wi u nùn tɑkɑ kuɑn nɔni sɔɔ?

18 Gusunɔ u ǹ mɑm win sɔm kowobu ɡɔrɑdobɑ nɑɑnɛ kue,

mɑ u torɑnu wɑɑmɔ be sɔɔ.

19 Kɑɑ sere ɡere tɔn be bɑ mɔmɑ kɑ tem,

be bɑ koo kpĩ bu sunku nɡe kɔkɔbu?

20 Tɔnu koo kpĩ u n wɑ̃ɑ bururu,

ǹ n kuɑ yokɑ kpɑ ɑ deemɑ u ɡu,

kpɑ ɡoo kun mɑm ɡɑrɑ nɡe u ɡu.

21 Win wɑ̃ɑru tɑ kɑsirɑ.

U ǹ bwisi kpuro wɑ u kɑ ɡu.