10
1 Gutiom, wo nimaŋ me ni biinumom ᵽoobo ban níh’ícin wo Aláemit, wo uomme mbi Esúif yay guyab gaᵽah. 2 Maagen nibbabbañ búsolil n’egiten búoh gúsusuᵽ ni burok bi n’Aláemit, bare gukanyokan m’babajut gaffas. 3 Maagen mamu, gujogut bu Aláemit akane me bugan bugagu n’guĉol bújoŋorol, ban guŋese ekanoro n’guĉol. Mamu, gulagenut bulago babu baa maĉole mamu mo Aláemit akiĉ me. 4 Maagen mamu, Kirista nárirendiren gúboñ gagu gaa Móis, min mbi bugan bugagu ᵽe gáinen me ni o gúni bugan gaĉole bújoŋor Aláemit.
Anóan áinene ni Ataw ᵽan ayab gaᵽah
5 Móis no nahiĉ me mala maĉole mamu majoumulo me ni gúboñ gagu, maa nalobe aah : « An akan me wo gúboñ gagu gulob me ᵽan ároŋum ni go* 10.5 Juluj Levitik 18.5. » 6 Bare mala maĉole mamu majoumulo me ni gáinen, Bahiĉer babu maa bulobe : « Jamb’uoh ni biinumi : Ay ajae me etebor bi fatiya émit ? » An alob mo me, dóemme namamaŋ ekan Kirista nabbañ áavul. 7 Jamb’uoh ᵽoᵽ : « Ay ajae me ealo bi síndena ettam ? » An alob mo me, dóemme ebbañ áᵽunnul Kirista to gaĉet me guomme. 8 Ñer Bahiĉer babu wa bulobe ? Buoge : « Firim fafu fulofilof, ufu ni butumi ni ᵽoᵽ ni biinumi† 10.8 Juluj Dáteronom 30.11-14. » Firim faufu fo fuomme faa gáinen gagu ni Kirista go jivaree me. 9 Ulob me ni butumi bújoŋor ésuh yay gaa búoh Yésu aamme Ataw ban núinen ni biinumi gaa búoh Aláemit nailenolyilen ni gaĉet me, ᵽan uyab gaᵽah. 10 Maagen mamu, an áinen me ni o ni biinumol ᵽe, Aláemit ᵽan ajogol an aĉole bújoŋorol. Ey, an alob me ni butumol bújoŋor ésuh yay gaa búoh náineyinen ni Yésu, Aláemit ᵽan asenol gaᵽah. 11 Maagen mamu, Bahiĉer babu buoge : « Anóan áinene ni o mat’ateh mahat‡ 10.11 Juluj Esai 28.16. » 12 Yo eĉil me, Esúif yay ni galet me Esúif gúbuliorut : bugo ᵽe Ataw anur gubaje, asene me waf waaro bugan bugagu ᵽe gáhagum me ni o. 13 Maagen mamu, Bahiĉer babu buoseh : « Anóan ajae me éhagum ni gajow Ataw ᵽan ayab gaᵽah§ 10.13 Juluj Soel 3.5. »
14 Bu ñer bugan bugagu gújue gúhagum ni gajaol bugo m’báinenut ni o ? Ban bu gújue ᵽan gúinen ni aĉila bugo m’baunut lobi mola ? Ban bu ᵽan guun lobi mola an m’bayabulat gayoŋ ákail alobil mola ? 15 Ban bu ᵽan baj bugan gúkail gulobil mola Aláemit m’baboñulatil ? Ti Bahiĉer babu buoh me : « Wárie ter ejuh bugan bugagu gavaree me gurim gásume n’gújaeul mee* 10.15 Juluj Esai 52.7 ! » 16 Bare let bugan bugagu ᵽe gúkanume Firim fafu Fásum me favarei me. Esai naage ᵽoᵽ : « Ataw, ay áinene ni bavareer babu bóloli† 10.16 Juluj Esai 53.1 ? » 17 Yoemme ñer, gáinen gagu n’eutten bavareer babu gujoumulo, ban bavareer baubu firim Kirista fom.
18 Niege ñer : Esúif yay guunut ᵽiaŋ ? Guun yo bae ! Bahiĉer babu buoge :
« Gurimil guuniwun tánotan ni ettam yay ᵽooyo,
baloberil bujojow bi to mof mamu mítij me‡ 10.18 Juluj Ufóñ 19.5. »
19 Bare niege : bugal Israel gujogut yo ᵽiaŋ ? Aláemit naᵽie nálobaliil ni butum Móis aah :
« Ᵽan ikanul n’jísilaet ni bugagu galet me búgumbam ;
ᵽan iinnul guiñul bi ni súsuh sajagut§ 10.19 Juluj Dáteronom 32.21. »
20 Esai nakañen may aah : « Aláemit naage :
Bugagu gaŋesutom me gujugomjuh,
nigitene múmbam bugagu gaŋesut me min guffasom* 10.20 Juluj Esai 65.1. »
21 Bare Aláemit nalob aya ni Israel aah :
« Funah fafu ᵽe nialewalen guñenom
mbal ésuh yatikoe gunnu,
bugan gákanumut wáfowaf† 10.21 Juluj Esai 65.2. »
*10:5 10.5 Juluj Levitik 18.5
†10:8 10.8 Juluj Dáteronom 30.11-14
‡10:11 10.11 Juluj Esai 28.16
§10:13 10.13 Juluj Soel 3.5
*10:15 10.15 Juluj Esai 52.7
†10:16 10.16 Juluj Esai 53.1
‡10:18 10.18 Juluj Ufóñ 19.5
§10:19 10.19 Juluj Dáteronom 32.21
*10:20 10.20 Juluj Esai 65.1
†10:21 10.21 Juluj Esai 65.2