Firim fafu Fásum me ti
Lík
anabaw ahiĉ fo me
Waf waw wabaj me n’élebur yauye
Ahiĉa ahu anur ahu, o guvoge me Lík, nahiĉe sílebur súuba : ewansil yay yola, ni ᵽoᵽ yayu élebur yo guvoge me Bakaner babu bal Uᵽotoraaw. N’éleburol étiar yay, Lík ni ejangara galet Esúif gúttut bugo nihi gulob gugerekay naam n’elob. Náh’áᵽajulil gurim guce gátañie ejoh ni ᵽoᵽ mukanay mamu mal Esúif yay mo bugo guffasut me. Mamu ñer, bugan bugagu ᵽe bugaa mof galet me Esúif ni ᵽoᵽ bugaa jabbah jánojan n’gúju guffas búoh Yésu aamme Aᵽagenail.
Ewansil yauye yaa Lík elagelagen bajaer babu baa sasu siewansil saa Mácie ni Maruk. Bare eĉila efafaŋ n’éᵽajule bagitener babu baa bújaor babu baa Yésu kábiriŋ Gálile bi Yérusalem (Lík 9.51 bi 19.28).
Lík nagitene wafaŋ me ebaj hámma ni o ni bavareer babu ni buroŋ babu saa Yésu : Aláemit naboñuloboñ Yésu Kirista bi eᵽagen bugan bugagu ᵽe gamaŋ me guyabol. Aĉila Yésu bugan bugagu bugo guĉotihene me nafaŋe eruhen : utilaaw, gaputi me, galeh me, úsotaaw, sijaora sasu.
Ulagoraaw bugaa Yésu ubugi m’bulago manur ni o ; gubaje gailo gagu gal ébahen bakaneril ; guffase búoh Aláemit násusum ban nábboliboli bugan bugagu ᵽe. Ni súsuh sasu so bugaa Rom guyab me síni ni guñenil, bugan bugagu nihi guoh : « Aví ahu ámah ahu Ataw nam. » Bare ejangaraay bugo n’guoh : « Yésu Kirista aamme Ataw ahu. » Maagen mamu, Aláemit nainnulo Yésu n’eĉet yay, aban nahat waf waw ᵽe ni gañen gola. Lík ni ewansil yay yola nafaŋe navoge Yésu Ataw sasuso.
Ewansil yay yaa Lík ni Yérusalem éuñene (Lík 24) ; to may éĉit me (Lík 1 ni 2). Yésu náᵽullo ulagorol maroŋe no naiyulo me n’eĉet yay, ban ni gúsumaet faŋ. No Yésu áᵽure me ni fuhay, o min ammeŋe biinum babu báᵽullo me n’Aláemit, baamme Biinum Banabe (Lík 3 ni 4). Ulagorol ᵽan may guyab bo (Lík 24.49).
1
Lík nahiĉ bi ni Teofil
1 Abugeom Teofil,
nuffasale búoh bugan gammeŋe gulige ehiĉ waf wauwu ᵽe wájalo mee wabaj me n’etulóli. 2 Bugan bugaubugi gugitenóli wo guun me n’utum bugagu gajuh wo me táh kábiriŋ ni buju babu, gabbanno me gúni ugitena firim Aláemit. 3 Yo eĉil me, ínje may no niŋes me ik’iffas joon waf wauwu ᵽe bi ni fíĉilum wo, nibaj biinum baube bal ehiĉuli. Aw Teofil, o níkanum me, nihiĉuli wo ni ganab ti ujow me. 4 Nikanmokan min mb’úju uffas búoh waf waw wo guligeni me ubabaj ti maagen.
Amalaka nalob Sakari mala gáuul Saaŋ Batis
5 No Herod aamen me ávi mof mamu maa Yúde, bajene ace áine aĉil me bíteŋen babu, gajaol Sakari ; o ni fítiman* 1.5 fítiman : No, uteŋenaaw ni’gukakan gútiman gono ávi ni gubbagir. Fítiman fánofan ᵽan fiteŋen ni gávi-Aláemit fíiyay iki fubao, fupafo ni fuŋar. fafu fal Abia nam. Aarol gajaol Elisabet, ban ni fiil fafu fal Aaroŋ náᵽullo, aamen me ateŋena ámah ala Aláemit. 6 Bugo éubail buroŋil búsusum Aláemit, ban ni’gúkanum faŋ gúboñ gagu ᵽe gal Aláemit. 7 Bare gubajut añil, mata Elisabet affasut fufane, ban bugo éubail gúfanumfanum.
8 Funah fice, Sakari náni n’ekan burokol ni gávi-Aláemit gagu mata fítiman fafu fola fiĉiggo. 9 N’gulukor ti guᵽi me nihi gukan, ni kan Sakari aĉiggo bi enogen ni gávi-Aláemit gagu ake esaen uyew waw wolil† 1.9 uyew waw wolil : dóemme wo guvoge me coraay ni guolofay.. 10 No naam wo me n’esaen, ésuh yay ᵽe n’guilo tíyaŋ n’gúni n’galaw. 11 To baenah ni baj amalaka ala Aláemit áᵽullol dó ni gávi-Aláemit gagu, nailo n’gañen gárib fúkanum-sambun fafu. 12 Sakari no najugol me, ajugut enilol, gáholi n’gunonol. 13 Bare amalaka ahu naagol : « Sakari, jamb’úholi ! Aláemit nayayab galai. » Natajen aagol : « Aari Elisabet ᵽan abaji áᵽur, mb’ukanol gajow gagu gaa Saaŋ. 14 O mb’akan me min biinumi bifilo, ban no najae me ebugi, bugan gammeŋe ᵽan súmil. 15 Ᵽan akan an ámah bújoŋor Aláemit, ban mat’arem erem yánoyan yo néh’éhallen. Kábiriŋ ni fuputeol, Biinum Banabe ᵽan bíni ni o. 16 Ᵽan ábbañenul gammeŋe ni bugal Israel mbal Aláemit aamme Atúlail. 17 Ᵽan abaj biinum ni sembe ti Elí aamen me aboñer ala Aláemit. Ᵽan ayab gayoŋ Aláemit bi ekan sipaya n’guunor ni guñolil ; bugan bugagu gamaŋérit me eun, ᵽan abbañulil gúni ti bugagu gaĉol me. Mamu, ᵽan aomen bugan guvugul bi ni Aláemit. »
18 Bare Sakari naagol : « Bu nijae me ñer ekan min iffas búoh dáuru maagen ? Let ínje nífanumfanum, ban aarom ᵽoᵽ naake ? » 19 Amalaka ahu naagol : « Injé iomme Gáburiel, o nihi ailo me bújoŋor Aláemit. O aboñulom bi egiteni firim faufu fásum mee. 20 Nemme úinenut firimom fajae me bae ekano funah fo baĉiger, mat’ubbañ úju elob bi funah fafu fo fujae me ebaj. »
21 Min Sakari aᵽio ró me, ésuh yay ganageol me tíyaŋ n’gujahali. 22 No ñer náᵽullo me ni gávi-Aláemit gagu, abajut butum bal elob ni bugo ; naŋar guñenol min alih egitenil wabajol me. Ñer ésuh yay n’gútallo búoh babaj bujugum bo najugulo ró.
23 No gunagol gaa burok gubao me, Sakari naot mbal ésugol. 24 Ᵽúrto, aarol Elisabet naŋar far. Gueñ futoh o n’ekoᵽ n’enah nímoro nah’aah ni biinumol : 25 « Aláemit úre nakan maa bi n’ínje : naannulo gúĉilol bi n’ínje min áᵽuren ñusuom bújoŋor bugan bugagu. »
Amalaka nalob Mari mala gáuul Yésu
26 No baj me gueñ futoh ni fanur, Aláemit naboñ amalaka ahu Gáburiel bi n’ésuh ece yaa mof mamu maa Gálile, gajow yo Nasaret, 27 yaŋ bice bájur gajaol Mari. O ámusut affas ánaine, n’guᵽañol gusen ace áine gajaol Susef, áᵽullo me ni fiil ávi ahu David. 28 Ñer no amalaka ahu aĉih me, nanogen dó naah Mari : « Nisafi, aw ayab me gáji gámah. Aláemit umu ni aw. » 29 Firim faufu ni fujahaliol nár iki arorenoro : « Basaf baubu, basaf bu bom ? » 30 Amalaka ahu naagol : « Mari, jamb’úholi, mata gáji Aláemit ugu ni aw. 31 Niege : ᵽan uŋar far uk’upegor áᵽur, mb’ukanol gajow gagu gaa Yésu. 32 Ᵽan áni an ámah, ban ᵽan gusalol "Añol Aláemit-Fatiya." Aláemit Atúla ᵽan asenol efenjeŋ yay yaa ᵽayol afan David. 33 Aĉila ajae me éni ávi ahu ala bugal Israel bi nánonan, ban fívietol mati fúmus fubao. »
34 Mari naah amalaka ahu : « Bu ᵽan kano ínje m’baffasut ánaine ? » 35 Naagol : « Biinum Banabe ᵽan búavul íkiil birembor n’aw, ban sembe sal Aláemit-Fatiya ᵽan súureni. Yo eĉil me añil ahu ajae me ebugi ᵽan anab, ban ᵽan guvogol "Añol Aláemit". 36 Nujuge ani Elisabet, aĉila may umu m’bíteb júᵽur ni fufaneol ; aĉila o guogen me o emotombo, maer umu ni fieñol fakan me futoh ni fanur. 37 Maagen mamu, bajut waf wo Aláemit ájuut ekan. » 38 Ñer Mari naah : « Injé amigel Aláemit nem. Wáfowaf wo nulob me uya n’ínje, mb’ukano ! » Mbiban, amalaka ahu nakay.
Mari nake gaŋalo Elisabet
39 Ᵽúrto, Mari nailo asommen ajow ariŋen mbal ésuh Elisabet yaamme ni gurijaŋ gagu gaa Yúde. 40 No naĉih bo me, nanogen ni yaŋ Sakari nasaf Elisabet. 41 No Elisabet aun me Mari asafol, añil ahu nagoror ni farol. Ñer Biinum Banabe m’bunogen Elisabet 42 min alob fatiya aah : « Aw Aláemit násonienisonien faŋ waareaw ᵽe, ban gásonien gaugu ᵽan gúni n’añil ahu o nujae me ebaj. 43 Injé niᵽiloe ᵽiaŋ bi ealen súndoom jaw áviom ? » 44 Natajen aagol : « Nujuge, no niun me basaferi, ésumay nekan añil ahu aamme ni farom nagoror. 45 Gásumay gúni n’aw, mala min úinen me búoh wo Aláemit aboñulo me gulobi ᵽan ukano. »
Mari o n’emalen Aláemit
46 Ñer Mari naah :
« Biinumom bumaŋe esal Aláemit !
47 Eĉígirom emmemmeŋ ésumay mala Aláemit aamme aᵽagenaom,
48 min aannulo me gúĉilol aluj ínje aamme amigelol,
ban itogut wáfowaf.
Maagen, maer bi nánonan bugan bugagu ᵽan nihi gulob múmbam
n’guoh : “Aare ahu abaj me gásumay.”
49 Mata Aláemit-Sembe nakakan waf waaro bi n’ínje.
Gajow gagu gola, go barebare gunanab.
50 Jabbah bi ni jabbah,
músumol májalo mee umu ni gákanumol me.
51 Nagitengiten gáju gagu gola ni sembeol,
min avis me újiloraaw.
52 Narikul úviaw ni sifenjeŋil,
aban nateben galet me n’gaᵽin.
53 Gacaret me, nasenil fubaj,
bare nabbañen usanum waw guñen gurakel.
54-55 Ti nalob me sipayolal,
no najogor me babugeol baliŋ mee n’Aburaham bi ni gabugorol ᵽe,
naosen bi nánonan wolal bugal Israel jákanumol me,
min arumolal me enil. »
56 Ñer Mari nanamo n’guñen Elisabet butum gueñ gúfaji, ᵽúrto naot.
Gabugi Saaŋ Batis
57 Elisabet no funagol fiĉih me, napegor nabaj júᵽur. 58 Buganol ni uĉindorol n’guun búoh Aláemit nagitenolgiten ñarumol enil ñájalo mee, ñer ni súmil nár manur ni o. 59 No añil ahu abaj me gunah futoh ni gúfaji, n’gújoul ᵽe gúkail gumat érurol búhut. N’gumaŋen eŋar gajow ᵽayol Sakari gukanol, 60 bare jaol naagil : « Hani ! Mb’uvogalol Saaŋ. » 61 N’guogol : « Bare bajut an ni fiil fafu fíya o ni’guvoh gajow gaugu ! » 62 N’gúbaho mbaa ᵽayma n’guŋar guñenil min gurorenol gay gajow namaŋe ekanol. 63 Ñer naagil guŋallol jibabar jal ehiĉ, min ahiĉ ró : « Gajaol Saaŋ. » N’gujahali bugo ᵽe. 64 To baenah, Sakari nabbañ áju elob, min áni n’esalen Aláemit. 65 Ñer uĉindorol n’gúholi bugo ᵽe, iki tánotan ni gurijaŋ gagu gaa Yúde n’gúni n’galolobor mala yo. 66 Anóan aun yo me náni n’eᵽinor bu añil ahumu ajae me éni gajem. Maagen mamu, sembe Aláemit usu ni o.
Sakari o n’emalen Aláemit
67 Ñer Biinum Banabe m’bunogen Sakari, ᵽay añil ahu, m’bisenol áni n’elob aah :
68 « Usalal Aláemit, Atúla ala bugal Israel,
mata najegorolaljegor, ban naᵽagenolal,
wolal bugo naĉob me.
69 Náuwenulolal aᵽagena ala sembe,
áᵽullo ni fiil David aamen me amigelol,
70 ti nah’alobolal yo me n’utum uboñerol kábiriŋ m’buju babu.
71 Naagolal ᵽan aᵽagenolal ni ulatorolal,
náᵽunnulolal ni guñen gaa bugan bugagu ᵽe gamaŋutolal me.
72 Nagitengiten sipayolal músumol,
ban ájumorut babuge babu baliŋ mee ban ni bunab
bo najogor me ni bugo,
73 ti nabbat yo me bújoŋor ᵽayolal Aburaham.
74-75 Naᵽagenolal ni fujoh fafu fal ulatorolal,
min mb’újual umigeletaol gunah émit ᵽe m’báhollut.
Mamu mb’únial bújoŋorol bugan bugaa maagen,
bugan gaĉole.
76 Ñer aw, añolom, ᵽan guvogi aboñer Aláemit-Fatiya,
mata aw ujae me eyabol gayoŋ bi eteŋen bulagool ;
77 aw mb’ugiten me bugan bugagu búoh
ᵽan aᵽagenil min ajae me eboketil utilil,
78 mata Aláemilolal násusum,
náju ñarum enil nímoro.
Ᵽan akan gajaŋaol n’gufijigenulolal kábiriŋ dó fatiya,
ganogor me ti gaa tinah to bajuer étebul,
79 dó ᵽe bi efijigen wolal jaamme n’emoĉ yay yal eĉet,
bi ᵽoᵽ éĉibbenolal ni bulago babu baa gásumay. »
80 Min añil ahu abbage me, mo may mujagol mutose me. Nanamo bo n’eᵽarandaŋ yay bi funah fafu fo najae me éᵽurul bújoŋor bugal Israel.