18
Nokobaraba'ianna Babel
18:1-20
1 Noko daa iya'a, yaku' piile' isian malaa'ikat men sambanaan nda'amari surugaa. Ia kuasaan balaki' ka' wakana leap tarang munguruari tano' balaki'. 2 Ia mangkakaro' taena,
“Kabus nokobaraba'ian a Babel, kota men balaki' iya'a,
ka' nosidamo dodongoanna giigii' meena ka' nosidamo pinsapitanna giigii' alus ba'idek,
ka' pinsapitanna giigii' sapu' men kobiit ka' men komaso'na mian.* Yes. 13:21; 21:9; Yer. 50:39; 51:8; Why. 14:8
3 Giigii' lipu' ninginummo anggurna men minsidakon i raaya'a mongoloingikon pisuuna.
Giigii' tomundo' na tano' balaki' mogora' tii ia, ka' giigii' pobaluk na tano' balaki' sida nokupangon tia wawauna Babel men nongoloingikon pisuuna iya'a.”* Yes. 23:17; Yer. 51:7
4 Kasi yaku' nongorongor wurung men sambanaan nda'amari surugaa taena,
“Uar i kuu mian-Ku! Parerei a kota kanono' kada' i kuu sianta tabalut na wawau ba'idek na mian men isian na kota,
dako' i kuu tonsoop men kana'onna balaa' men bo takakonon na kota kanono'!* Yes. 48:20; Yer. 50:8; 51:6, 45
5 Gause dosana nolalambunanmo taka langit, ka' Alaata'ala ninginau'mo wawauna men ba'idek iya'a.* Kej. 18:20-21; Yer. 51:9
6 Walos i ia koi men ia wawaumo, tarai i ia pinduan paku' koi men ia limangmo.
Isii a sasangkirna tia men bo inumon pinduan paku' a kokaraasna tia men ia toropotikonmo bo inumon.* Mzm. 137:8; Yer. 50:29
7 Talalais i ia ka' poposiongo' men koi kobiai'na nompobalaki'na wakana, ka' pintidaa-daawanna men ia limangmo,
gause i ia sinampang morobu na noana taena, ‘Yaku' kani'i koi tomundo' wiwine men mamarenta, yaku' taasi' balu ka' i yaku' sian munsuri masiongo'.’* Yes. 47:7-9
8 Mbali' iya'a, na lalomna sangilio, ia bo takaionna balaa' koi nggeo, kasiongo'an, ka' pololuan.
Ka' i ia bo pobabungon tia apu, gause Tumpu Alaata'ala kuasaan bo mungukum i ia.”
9 Giigii' tomundo' na tano' balaki' men mogora' ka' nongoloingikon pisuuna tia wiwine iya'a, bo mingiwirii ka' mantando'i kota iya'a, kalu i raaya'a mimiile' tibuk matabo' na apu men muntunu kota iya'a.* Yeh. 26:16-17 10 Raaya'a bo kumekerer olo-oloa gause layaonkon kana'onna repaan ka' i raaya'a bo mangaan:
“Silaka'! Silaka'mo tuu' i koo, kota Babel,
kota men balaki' ka' moonggor.
Ukumanmuu baasi sa'angu' jaam kasee narepamo tuu'!”
11 Giigii' pobaluk men isian na tano' balaki' uga' wiri ka' masiongo'kon kosilaka'anna wiwine iya'a, gause sianmo isian men bo pingili balukna i raaya'a.* Yeh. 27:31, 36 12 Balu-balukna: mosoni, salaka', watu men umangga', mutiara, toik lenang, toik kakamumu', sutaraa, toik memea' ka' biai' kaliangan kau men mawangi, ka' toropii kaliangan pakakas men wese'na ayop gaja a niwawau, ka' toropii kaliangan pakakas men kau umangga' a niwawau, ka' toropii kaliangan pakakas men tambaga, besi, ka' watu marmer a niwawau,* Yeh. 27:12-13, 22 13 kuangna kau ma'asing, rampa, minamina' mawangi, muur ka' kamangian, anggur, likison, tarigu ka' gandum, sapi', domba, kuda tia roda, ata' ka' uga' mian. 14 Raaya'a men mobalu-baluk norobumo na wiwine iya'a taena,
“Giigii' upa pore men kikira'am sianmo isian,
ka' giigii' men ma'amat nopenta'mo,
ka' sianmo rumpakioon soosoodo!”
15 Raaya'a men mobalu-baluk nosidamo mian men kupangon gause daa isian wiwine iya'a. Raaya'a nokumekerer olo-oloa gause layaonkon kana'ionna repaanna. Raaya'a bo wiri ka' tumando',* Yeh. 27:31, 36 16 kasi norobu taena,
“Silaka'! Silaka'mo tuu' a kota men tolele kani'i!
Mansanda' i ia mopake lenang molusa',
ka' toik kakamumu' ka' toik memea', ka' mopake mosoni, watu men umangga', ka' mutiara.
Kasee tongko' sa'angu' jaam, nopenta'mo a giigii' kupangna iya'a.”
17 Giigii' kapiteen na kapal ka' papalimangna, ka' giigii' mian men lumakit na kapal, ka' giigii' mian men basarakanna na tobui, nokumekerer olo-oloa,* Yes. 23:14; Yeh. 27:26-30 18 ka' nangkakaro' tempo i raaya'a nimiile' tibukna apu men nuntunu kota iya'a taena, “Sianpo no'isian kota sambana men koikoimo tia kota balaki' kani'i!”* Yeh. 27:30-34 19 Mbaka' i raaya'a nunguwuwurkonmo awu na takala'na i raaya'a gause nasiongo' ka' nangkakaro' taena,
“Silaka'! Silaka'mo tuu' a kota men balaki' kani'i! Kupangna men biai' ninsidakonmo giigii' mian men montombonoi kapal na tobui, nokupangonmo tia kupang men angga'an, kasee tongko' sa'angu' jaam, giigii' iya'a kabus nopenta'.”
20 Bi kambelesan a giigii' isiina surugaa, ka' i kuu mianna Alaata'ala, poposuu', ka' nabii, gause kota iya'a daa nokobaraba'ianmo! Alaata'ala bo mungukum i ia gause giigii' upa men ia limangmo na ko'omuu.* Ul. 32:43; Yer. 51:48
Babel nosilaka'mo
18:21-24
21 Noko daa iya'a sa'angu' malaa'ikat men moonggor nengeleengketmo sa'angu' watu men kobalaki'na koi watuna gilingan men balaki', ka' nintibarkon na tobui, kasi norobu taena,
“Koi kani'i a bo pintibarkon kota Babel men tolele iya'a. Ia bo tibarkonon bukuan pataka sianmo rumpakion soosoodo.* Yer. 51:63-64; Yeh. 26:21
22 Sianmo pomorongoran laungna kecapi ka' mian manani,
ka' mian men munduup poloit tia torompeet.
Sianmo sa'angu'po a mian men pande' mangawawau upa-upa rumpakion na ko'oom.
Laungna watu pinggilingan uga' sianmo kamporongoran.* Yes. 24:8; Yeh. 26:13
23 Ka' baangna boloak sianmo tarang na ko'oom,
ka' wurungna wiwine tia moro'one men mosuo' sianmo rongoron na ko'oom.
Miaan men mobalu-baluk iya'a tongaan tuu' na tano' balaki',
ka' tia duuduuwup i koo mangakali giigii' lipu' na tano' balaki'.”* Yer. 7:34; 25:10
24 Babel ni'ukum gause na kota iya'a nokandapotanmo isian rara'na nabii, ka' na mianna Alaata'ala, ka' rara'na giigii' mian men nipapatei na tano' balaki'.* Yer. 51:49
*18:2 Yes. 13:21; 21:9; Yer. 50:39; 51:8; Why. 14:8
*18:3 Yes. 23:17; Yer. 51:7
*18:4 Yes. 48:20; Yer. 50:8; 51:6, 45
*18:5 Kej. 18:20-21; Yer. 51:9
*18:6 Mzm. 137:8; Yer. 50:29
*18:7 Yes. 47:7-9
*18:9 Yeh. 26:16-17
*18:11 Yeh. 27:31, 36
*18:12 Yeh. 27:12-13, 22
*18:15 Yeh. 27:31, 36
*18:17 Yes. 23:14; Yeh. 27:26-30
*18:18 Yeh. 27:30-34
*18:20 Ul. 32:43; Yer. 51:48
*18:21 Yer. 51:63-64; Yeh. 26:21
*18:22 Yes. 24:8; Yeh. 26:13
*18:23 Yer. 7:34; 25:10
*18:24 Yer. 51:49