15
God ifongezir arazir e damuamiba
Devit onger akar kam osiri.
1 Onger Akaba 23:6; 24:3; 27:4; 61:4O Ikiavɨra Itir God, tinara nɨn Dɨpenimɨn ikiam?
Tinara mɨghsɨar nɨ ua bagha inabazim dapiam?
2 Aisaia 33:15; Sekaraia 8:16; Efesus 4:25Gumazim, God ifongezɨ moghɨn biziba bar dar gɨn ghua,
arazir aghuiba zurara dagh amua,
egha zurara uan navir averiamɨn aven guizɨn akam gɨnɨghnɨgha guizbangɨra mɨgei,
a nɨn Dɨpenimɨn aven ikiam.
3 Ua Me Ini 23:1; Onger Akaba 28:3; 50:20Gumazir kam, gumazir igharazibar ziabagh asɨghasɨzir puvatɨ,
egha arazir kurabar uan namakabagh amir puvatɨ,
egha akar kɨnibar pura uan roroabav geir puvatɨ,
gumazir kamnang, a nɨn Dɨpenimɨn aven ikiam.
4 Josua 9:18-20; Gumazir Dapaniba 11:35; Aposel 28:10Gumazir kam, akɨrim ragha God gasarazir gumazamiziba, a bar men aghua,
egha gumazamizir Godɨn apengan ikia an atiatiba, a men ziaba fe,
egha uan akar dɨkɨrɨzibar gɨrara ghua bizibagh ami.
Bizir kam osɨmtɨzir ekiam a danɨngtɨ, a nɨghnɨgh suam, a pura bizim.
A guizbangɨra uan akar dɨkɨrɨzir kamɨn gɨn mangam.
Gumazir kamnang, a nɨn Dɨpenimɨn aven ikiam.
5 Godɨn Araziba 16:19; Esekiel 18:8Gumazir kam uan dagɨaba amadima,
gumazir igharaziba pura da ini,
egha me ua da ikarvazir dughiamɨn, a dagh isɨn ua dagɨataba isir puvatɨ.
Gumazir arazir kuratam gamizir puvatɨzitam kotɨn tughɨv ikɨtɨ,
gumazitam kotiam gifarɨsɨ anepezeper dagɨaba a danɨngtɨ,
a dagɨar kaba inian markɨ.
Gumazir kamaghɨn amim,
a tugh gavgavigh irɨghan kogham.