1 Ang di tooltool nga le imot ole karaua pang di tooltool kuto maimai kiang a kayepe parmadi. Yesoo, di kuto maimai nga di tapdi be tiyei kuto maimai tiap, Maro la itar di be tiyei kuto maimai nga. Le di kuto maimai yo nookoot tiyepe nga, ngan Maro la itar di nga. 2 Ngan nanga, sei tool yo lono be iyepe di kuto maimai parmadi tiap i, in iyepe la betanga yo Maro itar be di kuto maimai tiyei urata ye ngan parmana tiap lapau. Le di tooltool yo tiyei nen nga, ngan tiyolo pang di be tiyemenai di ye dada dook tiap kidi yo tiyei nga. 3 Inbe di kuto maimai nga Maro itar di be tiyei di tooltool yo tiyei dada dook mata nga, a be nen ngan titattadai, ngan tiap, bong di tooltool yo tiyei dada dook tiap nga. Nen le ang tina nga sei lono be itattadai di kuto maimai tiap nga, ngan ole iyei dada yo dook mata ngan leu. Ngan kumata be iyei nen nga, ngan ole lodi ponana ye a tipayiti. 4 Yesoo, di kuto maimai tina ngan kapraingi ke Maro. Inbe Maro itar di a be tilonang le kayepe dook mata. Bong kumata le be ang tina ngan sa be iyei dada dook tiap nga, ngan kin itattadai di, yesoo di ngan, Maro ikap sokorai gurana pang di tiap, bong be tiyemenai di ye. Ngan di ngan kapraingi ke Maro, le ye punu in la le tipatnaia kate malmal ke Maro pang di tooltool yo tiyei dada dook tiap nga be tiyemenai di ye i. 5 Ngan la dook mata nen, ole karaua pang di kuto maimai a kayepe parmadi, yesoo di ngan ke be tiyemenai ang, inbe in dada dook mata tani yo lod wetewete paidi ye be tatoo lapau i. 6 Le ye punu, in la kakap pat pang di tooltool kuto maimai, yesoo di ngan kapraingi ke Maro. Le ye pat tina yo kakap pang di nga, ngan la be kanakana ngan tiyei urata tina yo Maro itar di be tiyei nga. 7 Le kakap soo so yo di kuto maimai tiwete be kakap pang di nga. Le kumata be tiwete ye kaungu pat nga, ngan kakap pat pang di be tiyei urata kidi ye. Inbe kumata be tiwete ye yeingi urata nga, ngan kayei urata yo be kalon di ye nga. Le di tooltool yo Maro itar di be katattadai di nga, ngan katattadai di. Inbe yo itar di le edi maimai nga, ngan karaua pang di.

8 Kin kayege bun kiang sila ikino le karau tiap, ngan be. Bong so ataleu yo be iyei ben bun pang a be iken nen i, in nen; be lomim pang di diemim atu atu mai san. Ngan nen le sei tool yo lono pang di diene mai san i, in itoo ger le imot yo ke Maro nga. 9 Ngan ger kapala yo Maro iwete ngan nen, “Kin kuyei bauk be,” inbe “Kin kuraumata di tooltool be,” inbe “Kin kupinoo be,” inbe “Kin matamim gorengana ye so kidi tooltool kapala be.”✡ Pamulenge 20:13-15, 17; Ger 5:17-19, 21 Bong ger yo iduk ger kapala nga le imot a igaua le ataleu, in nen: “Lom pang di diem mai san dawa ben yo ong taum lom pong mai san nga.”✡ Urata ke Paroranga So 19:18 10 Kumata be lomim pang di diemim mai san nga, ngan ke be kuyei dada dook tiap sa pang di tiap. Ngan la sei tool yo lono pang di tooltool kapala mai san i, in itoo ger ke Maro dook mata le imot.

11 Ngan awete pang be kayei nen nga, yesoo ang ngan lomim galanga ye lal yo nookoot nga tayepe ye in oo. Le kamadit ye ni ke kenongo mata a matamim rere, yesoo lal yo Maro iwanga Kirisi be si ikau idi a ipamulidi ye so dook tiap yo be igarungidi i, in iman potai oo. Ngan kulkulunu yege ye kene yo tatara lodo medana pang Kirisi ye in nga, ngan lal tani in ben iman potai kasin, bong yo nookoot nga, lal tani in iman potai oo. 12 Ngan bong i nga potai be imot, inbe ke nga be se pombe. Le tayege dada dook tiap yo ke todo lono nga, inbe tayei dada dook mata yo ke kemai nga. Kumata be tayei nen nga, ngan idi nga ole tapanat ye patokongo dawa ben tool ke patokongo yo isousou ye sousoungu medana ke patokongo i. 13 Le idi nga ole tayei dada yo dook mata nga, dawa ben di tooltool yo tiyepe kemai ye ni galangana nga. Nen le kin tayin ran medana a kutodo moo ye be, inbe taye di diede tagaua be tayin ran medana a la tayei dada dook tiap pang di tooltool kapala, ngan be. Inbe kin tayei dada dook tiap ke bauk be, inbe tagarung tiniidi ye dada ben kidi gaunu yo tiyei, ngan be. Inbe kin koodoo parkap a tapatoko be, inbe lodo dook tiap pang di tooltool ye so kidi, ngan be. 14 Bong takaua Tool Mai Yesu Kirisi dawa ben takaua sousoungu a tasousou ye nga. Ngan nen le kin lomim kaua urata ye dada dook tiap ke noonoo yo tiniidi iyolidi be la tayei, ngan be.