1 Motong la tikaua kai dundunngana dawa ben koro medana ke touanga so in pau, inbe tool atu iwete pau nen. Iyei ne, “Kula la kurouo bareme mai ke sungunu pang Maro le ipa ye kookoowoo ke paroranga so pang Maro ni, inbe kukinkat di tooltool yo tisung pang Maro ye bareme mai tani nga lapau. 2 Bong ni ke gaongo yo iken koongoo lono ke diki i, in kin kuroua be, yesoo ni in iken pang di tooltool yo tipa ye rara ke di Yuda tiap nga. Ngan di la be man tiyirngana malala mai Yerusalem* Betanga tani yo ‘tiyirngana malala mai Yerusalem’ i, in lono nen. Ngan di tooltool tina ngan ole tidada di tooltool yo tiyepe ye malala mai Yerusalem, ngan podi. Nen le ole tigarung di le tisolo moonoo ye taudu sangaul pai inbe balana ru. yo Maro ipootoo panga ya taunu i, in ye taudu sangaul pai inbe balana ru nga. 3 Bong ye kene tani in ole akaua gurana mai pang di tooltool kiau ru, a be nen ngan tikaua Maro koonoo a tiwetewete betanga ki pang di tooltool. Di suru tina ngan ole tisousou ye sousoungu ke lo modoko, inbe la tiwetewete betanga ki ye ke tina yo 1,260 nga.”

4 Di ngan dawa ben kai olip ru† Di tooltool ru tina, ngan dawa ben kai olip ru, yesoo di tooltool tikap olip surunu inbe tipaling ilo ye sul kidi inbe tilanga a tikamata ni ye. inbe sul ru yo tikodo dama ke Tool Mai yo matan kala tana mai i le imot i. 5 Ngan kumata le be koi kidi sa tikapye be tigarung di nga, ngan ole ei ipas ye koodi a ikan di le imot le tiyei kawa koonoo. Le in dada tani yo sei tooltool be igarung di ngan tiraumate ye i. 6 Inbe di tooltool ru tina, ngan gurana kidi mai lapau ke be tilele ki, a be nen ngan imol tiap ye kene yo be tikaua Maro koonoo a tiwetewete betanga ki ye i. Inbe di ngan gurana kidi lapau ke be tiwete ngan ole ran le tiek tina ngan le imot iportak le iyei ben rara. Inbe kumata le lodi be tiyei so matana matana sa dook tiap mulu yo ke be igarung di tooltool ke tana i a be timmata nga, ngan ole tiyei leu.

7 Inbe ye kene yo yaru tiwetewete betanga ke Maro a imot ye in nga, ngan asara gok dook tiap tani yo iyepe tana gumono yo taukan launu i, in ole ipas a ise be se irau di tooltool ru tina. Ngan gurana ki mai le ole illos di le iraumata di a timmata. 8 Inbe yaru bobodi ole sila iken sokorai dada katene ke malala mai tani yo muku ngan tipatoto Tool Mai kidi yaru lo kai palasingi kaini ye i. Ngan in malala mai tani yo tikatte betanga ye be ene Sodom inbe Isip i. 9 Nen le bobodi ole sila iken nen a di tooltool tina ke tana maimai nga le imot yo kulidi le koodi ngan ki ki inbe bareme kidi ngan ki ki lapau nga, ngan ole tikamata bobodi a koodi tada pang di ye ke tol inbe ke san in kapala ki. Bong di ngan o ke be timalum pang di tooltool sa a tikap di dook la tikelmai di, ngan tiap. 10 Inbe ye kene tani in di tooltool le imot ke tana i ole lodi ponana ye yo di tooltool ru tina ngan timmata koot nga. Le tina ole tiyei mailang a tikan be tisiki, inbe tiyawar so ye lo ponana kidi pang di diedi kapala, yesoo di Maro koonoo ru yo tikap masngana dook tiap pang di tooltool le imot yo tiyepe ye tana i nga, ngan timmata oo.

11 Bong be ke tol inbe ke san in kapala ki tina ngan iman a ila nga, ngan Maro ole iwanga Amunu a ilo lodi a be nen ngan iyei di le timaur mulu a timadit le lo tikodo. Nen le di tooltool yo koodi tada pang di nga, ngan ole titattadai dook. 12 Lo ngan be di tooltool ru tina ngan ole tilongo tool atu kalngana koonoo le mai ye malala ke Maro a isi in iwete pang di nen, “Angru kase ete me e ni.” Ngan nen le ye kene yo di koi kidi koodi tada pang di a matadi ikenen ye di nga, ngan eng tene ole isi iduk di, inbe ikap di a tilo pang malala ke Maro. 13 Inbe ye kene tani yo be yaru tilo ye in nga, ngan ole nauningi mai itak le igarungu malala mai tani in madini atu, inbe madini limi be pai la be iken nga. Bong nauningi tani in ole iraumata di tooltool alunu san le kinkatingi kidi ngan tau limi be ru. Nen le di diedi kapala yo be timmata tiap nga, ngan ole titattadai le tiyeie Maro yo iyepe ete ni, in ene le ilo ete ke be di tooltool tipayiti.

14 Ngan so tina yo be pombe nen nga, ngan akamata a imot le urata moonoo masngana dook tiap yo ru ki i, in naii la iman a ila i, inbe tol ki yo be ipa mur i, in mooloo tiap ole pombe.

15 Ngan akamata so tina ngan a imot, motong la bangabangana ke Maro tina yo limi be ru ki i, in imaia tauru ki, ngan le di tooltool kalngadi tiwetewete le maimai ye malala ke Maro a isi, inbe tiwete nen. Tiyei ne, “Lal yo be di tooltool kapala matadi kala di tooltool ke tana i le imot ye i, in imot oo. Inbe nookoot nga Tool Mai Maro iye Kirisi yo ya taunu ipootoo panga i, in yaru la be matadi kala di tooltool nga le imot le iken nen le taukan motingi i.” 16 Motong la di kuto maimai sangaul ru be pai yo tiwur dama ke Maro ye kookoowoo kidi ke burungu nga, ngan tigun turudi le du damodi itoko tana, inbe tisung pang Maro nen. 17 Tiyei ne,

19 Di tooltool maimai ke Maro tina ngan tiwetewete nen a imot, motong la akamata dada ke bareme mai ke sungunu pang Maro yo iken ye malala ki i, in koon panganga. Inbe koror tani yo muku ngan Maro ipamede betanga pang di Isrel le betanga tina ngan iken ye i, in ikenen mallangana. Ngan ye kene tani in kili itai, inbe looloo itara le ni mai i le imot rutunu ye, inbe nauningi itak, inbe ki somai imol, bong ki tani in patunu maimai inbe imede dawa ben madamada.