1 Ngan ke ataleu iken go pang dama, lo ngan be lal maiyoko kidi Yuda yo be lodi tut ye Paskimoolooningi ke Maro i, in pombe. Le nga Yesu lon galanga nen, lal ki yo be iyege tana i inbe imulu a ilo pang ye Tamana i, in iman potai oo. Ngan kulkulunu yege le ise ye kene tani in nga, ngan Yesu lono mai san pang di tooltool ki ya taunu yo tiyepe ye tana i. Inbe ye kene yo be lo imata ye i, in ipatnaia dada yo be lono pang di mai le mai san moolmool ye i.

2 Le nga rrai a Yesu iye di galiunu tigaua be tikan so. Ngan tool kuto mai kidi so sadi in idiwidiwi Yuta Iskariot, yo Simon natunu i, in lono a be nen ngan itara Yesu la di koi ki baedi i. 3 Ngan Yesu in lon galanga nen, ya in Tamana itar so tina nga le imot la baene be iyei tool kuto mai a matan kala. Inbe lon galanga nen, ya in Maro iwanga la isi nga, le ole imulu a ilo pang ye Maro. 4 Le nga Yesu iwulai kaningi so, inbe imadit tina le idudu sousoungu mooloo ki in du tana, inbe ikap manmaningi pattu a iwitkala lo galini. 5 Motong la iti ran du ye omai atu, inbe imadit ye ngasingi di galiunu tina ngan kedi a imanman ye manmaningi yo iwitkala lo galini i.

6 Ngan iyei nen le la pombe ye Simon Pita, le nga Pita imadit tina le itoru nen, “Tool Mai, ngan lom belei, ole kungas kek, too?”

7 Motong la Yesu iraua betanga ki nen, “So yo ayei nga, nookoot nga ong i lom galanga ye tiap, bong pang dama ni nga, ngan ole lom galanga ye.”

8 Le nga Pita iwete panga nen, “Atoo, au i o ke be amalum pong be kungas kek pitiap yege.”

Pita iwete nen, motong la Yesu iyei ne, “Kumata le be angas kem tiap nga, ngan ong in o ke be kuyepe yau tiap.”

9 Le nga Simon Pita iyei ne, “Tool Mai, be nen nga, ngan kungas kek leu be, bong kungas baek inbe kutok lapau.”

10 Motong la Yesu iwete panga nen, “Tool be irriu koot nga, ngan ke be irriu mulu tiap, bong ole ingas kene leu, inbe tinini mai i igalanga le imot. Ngan ang nga tinimim igalanga oo, bong ang nga le imot tiap.” 11 Ngan Yesu in lon galanga ye tool yo be itaru la di koi ki baedi in oo. Ngan ye punu in la le iwete be di le imot ngan tinidi igalanga tiap nga.

12 Yesu ingas di galiunu tina ngan kedi a imot, motong la isousou mulu ye sousoungu mooloo ki tani, inbe imulu la iwur ye nene. Motong la itor di nen, “Ai, ang nga lomim galanga ye soo so yo ayeii pang in lapau, too? 13 Ang nga kakiu au ye ‘Pannoongoo’ inbe ‘Tool Mai’ nga, ngan kawete gorrau le dook mata, yesoo au i urata kiau tina nangan. 14 Le kumata be au i Tool Mai inbe Pannoongoo kiang la angas kemim nga, ngan ole ang lapau, kayei nen a kangas di diemim kapala kedi. 15 Ngan au i ayei dada nen pang nga, ngan be nen a matamim too, inbe ang lapau ole kayei dada dawa ben yo ayei pang nga. 16 Awete pang moolmool nen, tool yo iyei urata ben kapraingi i, in ene mai le illoso tool mai ki, in tiap. Inbe tool yo tool san iwanga ye urata i, in ene mai le illoso tool yo iwanga i, in tiap lapau. 17 Ngan nookoot nga ang ngan lomim galanga ye dada yo ayeii pang, in punu oo. Le kumata be katoo dook nga, ngan Maro ole iyei urata dook mata pang.

18 “Betanga yo au i awete nga, ngan pang ang le imot tiap, yesoo au tauk i lok galanga ye di tooltool yo apootoo di pau nga. Bong dookoot be nen a betanga yo iken ye Rau ke Maro i, in ole kanono pombe moolmool. Ngan betanga tani in iwete nen, ‘Tool yo amru amkan porong i, in ole iyitmaka kene be iyirtoo au ye.’ ✡ Rau ke Woungu 41:9

19 “Ngan so yo nookoot awete pang ye nga, ngan kanono pombe moolmool tiao. Bong au i lok be aso talngamim ye, a be nen ngan pang dama ni be pombe nga, ngan ole katara lomim medana nen be Au I Tool Tani Yo Iyepe Nen I. 20 Le awete pang moolmool nen, kumata sei tool be ikaua tool yo awanga a ila, in a iyei dada dook mata panga nga, ngan tool in ben iyei dada dook mata nen pau lapau. Inbe sei tool be iyei au dook mata nga, ngan tool in iyei dada yo nen ngan pang Tamak yo iwangau a asi i, in lapau.”

21 Yesu iwete pang di galiunu nen a imot, inbe ikanamaii ngan lon gurrungu san. Motong la iwete pobe pang di nen, “Awete pang moolmool nen, ang tina nga atu la be itarau la di koi kiau baedi i.”

22 Iwete nen, le nga di galiunu tina ngan lodi sarere le matadi ikenen ye di diedi, inbe lodi kaua urata nen, ngan iwete nen ye sei. 23 Ngan di galiunu tina ngan atu yo Yesu lono panga mai san i, in iwur potai pang ye lapau. 24 Le nga Simon Pita iyei tomonai ye kutono pang ene tani be itoru, ngan sei iwete nen ye i.

25 Motong la galiunu tani, in irusu le la itadana Yesu, inbe itoru mos leu nen, “Tool Mai, ngan sei kuwete nen ye i?”

26 Le nga Yesu iyei ne, “Nga ole atepala porong kasin, inbe aroro ye sur yo iken omai lono i, lo ngan be akap pang ang tina nga atu. Ngan ya in tool tani yo awete nen ye i.” Motong la ikap porong kasin a iroro ye sur, inbe ikap pang Yuta Iskariot yo Simon natunu i. 27 Ye kene yo Yuta tani in ikap porong tina ngan ye in nga, ngan le Satan idewe a ilo lono.

Motong la Yesu iwete panga nen, “Soo so yo lom be kuyeii i, in kuyei taraii.” 28 Yesu iwete panga nen, le nga di diede kapala yo tiye tiwur ye kookoowoo ke kaningi so nga, ngan tilongo, bong ngan lodi galanga ye betanga yo Yesu iwete ngan punu tiap. 29 Ngan Yuta tani in matan kala depe kidi yo ke pat i, le nga di tooltool kapala tiyeisa o Yesu iwete panga be la iyimi kaningi man tikan ye lal maiyoko ke sungunu tani, too be la ikap so pang di tooltool yo ballingadi tiap nga. 30 Ngan Yuta ikap porong kasin tina ngan a ikan, le tina palbe leu inbe ipas a idu pang tana. Ngan bong oo.

31 Yuta ipas a idu tana a ila, motong la Yesu iwete nen, “So yo nookoot nga be pombe pang ye Tool Moolmool ke Maro i, in ole iyeie ene le ilo ete ke be di tooltool tipayiti ye. Inbe urata ki yo be iyeii i, in ole iyeie Maro ene le ilo ete ke be di tooltool tipayiti ye lapau. 32 Ngan kumata be iyeie Maro ene le ilo ete nga, ngan Maro ya taunu ole iyeie Natunu tani in ene le ilo ete nen lapau. Le mooloo tiap Maro ole iyeie ene le ilo ete ke be di tooltool tipayiti ye.”

33 Motong la iwete mulu nen, “Di natuk nga, ole ayang tayepe kasin, lo ngan be kaserau. Ngan betanga i muku ngan aweta pang di Yuda oo, ngan nanga nookoot nga aweta pang nga. Le malala yo be alo pang ye i, in ang nga o ke be kalo ye tiap. 34 Le nookoot nga be awete ger paunu pang nen: Lomim pang di diemim mai san. Ngan au i lok pang mai san, le katoo dada gaongo leu a lomim pang di diemim mai san nen lapau. 35 Kumata be lomim pang di diemim mai san nen nga, ngan ole di tooltool le imot lodi galanga ben ang nga di galiuk moolmool.”

36 Yesu iwete nen, le nga Simon Pita itoru. Iyei ne, “Tool Mai, nga be kulo pang ngai?” Motong la Yesu iraua betanga ki nen, “Malala yo be alo pang ye i, in nookoot nga ong i o ke be kutoo au a aru talo ye tiap. Bong pang dama ni nga, ngan ole kutoo au le kuse ye.”

37 Motong la Pita itoru mulu nen, “Tool Mai, nga yelei a nookoot nga ke be atoo ong tiap nga? Au i ole araia tinik be alonong a amata.”

38 Pita iwete nen, motong la Yesu iyei ne, “Ong i lom tar be ole kuraia tinim moolmool be kulonau a kumata, too? Ngan awete pong moolmool nen, bong katai nga, ngan ole tareke itang tiao, inbe kupataukala a kuwete le patol be ong i lom galanga yau tiap.”