1 Ke limi be atu mulu la iken go pang dama nga, lo ngan be lal ke Paskimoolooningi Ke Maro, in pombe. Ye kene tani in Yesu ipa le la pombe Betani, ye malala ke Lasarus, tool tani yo ipamaditi mulu ye ni ke matenge i. 2 Motong la di tooltool ke malala tani in tiyeie kaningi atu a be nen ngan tikanen ye Yesu, inbe lodi ponana ye. Le nga Mata iso kaningi a be imalimi di ye, inbe Lasarus la iye di tooltool yo tiye Yesu tikan so nga, ngan tiwur ye kookoowoo ke kaningi so. 3 Motong la Madia lo ikaua so ke saliningi yo tikarata ye kai nad le pat ki mai san i, in a isi le si itioo lo Yesu kene pono, inbe imusmus kene ye ya taunu kutono raunu. Ngan so ke saliningi tani in kini ki dook mata san le ingaua rumu lono mai in le imot.

4 Bong Yesu di galiunu tina ngan atu, yo ene Yuta Iskariot, tool tani yo be pang dama ni ngan ole itara Yesu la di koi ki baedi i, in iwete nen, 5 “Ona tiap! Nga yelei takaua so ke saliningi ni a tayawari tiap nga? Nga yo be tayawari nga, ngan matin nga le takap pat silba * Ngan pat silba atu in ben pat ke be tayimi tool atu ye urata kootoonoo ki ye ke atu yo ikau urata ye i. ben 300, lo ngan be takap pat tina ngan pang di tooltool yo ballingadi tiap nga.” 6 Ngan Yuta tani in lono ye di tooltool yo ballingadi tiap nga, ngan la le iwete nen, nga tiap. Bong iwete nen nga, yesoo ya in tool pinnauene. Ngan ya in urata ki ke be matan kala depe ke pat kidi, bong kanakana ngan ya taunu ipinoo pat tina yo titartar lo ye depe tani nga.

7 Yesu ilongo tina yo iwete nen nga, le nga iyei ne, “Ai, kayege sila iyepe! Ya in itarmosaia so in pang lal yo be amata ngan tikaratau a tikelmai au ye i. 8 Di tooltool yo ballingadi tiap nga, ngan kanakana ngan ole kaye di kayepe, bong au i o ke be ayang tayepe ye ke yo kanakana, ngan tiap.”

9 Ye kene tani in, di Yuda malala mai la lodi galanga ye Yesu yo iyepe Betani nga, le nga tila be la tikamata. Ngan lodi be la tikamata Yesu leu tiap, bong be la tikamata Lasarus yo Yesu ipamaditi mulu ye ni ke matenge, in lapau. 10 Le nga di tooltool maimai ke paroranga so pang Maro ngan tikarata betanga be ole tiraumata Lasarus a imata lapau. 11 Yesoo, di Yuda alunu la tikamata so yo Yesu iyeii ye Lasarus i, le nga tiyege di kuto maimai tina, inbe tila le la titara lodi medana pang Yesu nga.

12 Tiyepe a bongbongini ki, le nga di tooltool malala mai tina yo tilo Yerusalem be lo tikamata lal maiyoko ke sungunu tani nga, ngan tilongo bingi ben Yesu la ipa dada i nga be se pombe Yerusalem. 13 Motong la di tooltool tina ngan tikap so dawa ben kautuku raunu a tipakala a tidu pang diki be du tikamata. Le nga du tikamata, motong la koodi le mai nen.

14 Ngan Yesu ikaua asara ke solanga di tooltool yo ene donki i, in kase paunu atu man iwur pono, inbe ipa ye a ilo pang Yerusalem. Ngan iyei nen le iye betanga tina yo tiwodo lo ye Rau ke Maro nga, ngan iwete nen,

17 Ngan ye kene yo Yesu koonoo pang Lasarus a imadit mulu ye ni ke matenge nga, ngan di tooltool malala mai la tiye Yesu tiyepe. Ngan la le di tooltool tina ngan timadit a tikaua bingi ye so tani yo Yesu iyeii i, in pang di tooltool. 18 Ngan nen le di tooltool alunu la tilongo betanga ke mos tani yo Yesu iyeii a be iyei ben tarkilanga panga i, le nga timadit a tipakala a tidu pang diki le du titauaraii dada. 19 Di Paresi tikamata di tooltool tina yo tiyei nen nga, le nga di tapdi tiwetewete nen, “Kakamata nga, nookoot nga idi nga o tayeie so siap, yesoo di tooltool le imot la titoo nga.”

20 Di tooltool malala mai tina yo tilo pang Yerusalem be lo tisung ye lal maiyoko ke sungunu tani nga, ngan di tooltool kapala ngan di Girik. 21 Le nga di Girik tina ngan tila pang ye Pilip, tool ke malala Betsaida yo iken ye tana mai Galili i. Tila ye, motong la tiwete panga nen, “Tool mai, am nga lomam be amkamata Yesu pa.” 22 Le nga Pilip la iwete pang Antares, motong la yaru timadit a tila la tiwete pang Yesu nga.

23 Motong la Yesu iraua betanga kidi yaru nen, “Lal yo Maro be iyeie Tool Moolmool ke Maro ene le ilo ete ke be di tooltool tipayiti ye i, in nookoot nga la pombe nga. 24 Awete pang moolmool nen, kumata be tool atu ipe dingding patunu du tana lono tiap nga, ngan ole isup tiap le kanono tani yo ataleu in la be iken i. Bong kumata be ipe du tana lono le kulini iwi nga, ngan ole isup a ipu le itar kanono alunu welewele. 25 Ngan nen le kumata tool atu be lono pang yepongo ki ke tana i mai san nga, ngan ole ilene. Bong kumata tool atu be iwala murini pang yepongo ki ke tana i nga, ngan ole ikaua yepongo dook mata yo taukan motingi i. 26 Le kumata sei tool be ilonau a iyei urata dawa ben kapraingi kiau nga, ngan ole itoo au. Ngan nen le ni nangai yo be ayepe ye i, in ole ya iyepe ye lapau. Inbe Tamak ole iyitmaka tool tani yo be iyei urata kiau i, in ene.”

27 Motong la Yesu iwete mulu nen, “Nookoot nga au i lok gurrungu san, le nga ole awete belei? Ole be ayei ne, ‘Tamak, kulonau a kugutaka so yo be pombe pang yau nookoot i’? Tiap! Au i ke be awete nen tiap, yesoo ye punu in la le asi tana i ye i, a be lal ke so moonoo nen nga, ngan pombe pang yau. 28 Le Tamak, ong taum kuyeie em le ilo ete ke be di tooltool tipayitong ye!”

Yesu iwete nen, motong la tool atu kalngana iwetewete ke malala ke Maro a isi nen, “Au i ayeie ek le ilo ete ke be di tooltool tipayitau ye oo, inbe ole ayei nen mulu.”

29 Ngan di tooltool malala mai tina yo tikododo potai ye Yesu nga, ngan tilongo, le nga tiyei ne, “Ai, looloo la itara i.” Bong ngan di tooltool kapala tiyei ne, “Tiap! Bangabangana ke Maro atu la iwetewete panga i.”

30 Tiwete nen, motong la Yesu iyei ne, “Betanga yo nookoot si kalongo nga, ngan isi be si ilonau tiap, bong be ilonang. 31 Nookoot nga i lal yo Maro be ikarata betanga kidi tooltool ke tana i ye dada dook tiap kidi yo tiyei nga. Inbe ya in ole inganga tool yo iyei kuto mai a be matan kala tana mai i le imot i, in a ikoo. 32 Ngan au i nookoot nga ayepe ye tana i, bong pang dama ni be tiyitmakau le lo atuku kai palasingi kaini nga, ngan ole agaua di tooltool le imot a timan pang yau.” 33 Yesu iwete nen ngan be nen a ya taunu ipaposi ye dada yo be imata ye i.

34 Le nga di tooltool malala mai tina ngan tilongo, le tiyei ne, “Am nga lomam galanga be ger ke Maro iwete nen, be Kirisi in ole iyepe nen a tala. E nga yelei a kuwete be ole tiyitmaka Tool Moolmool ke Maro nga? Ngan Tool Moolmool ke Maro in sei?”

35 Motong la Yesu iwete nen, “Awete pang nen, lal mooloo tiap la be sul iken kataunu yang nga. Le sul be ikenen yang nen go nga, ngan kapa ye nunngana, a be nen ngan todo idukang be. Yesoo, kumata le tool be ipa todo lono nga, ngan ole lon galanga ye ni nangai yo be ipa pang ye i, in tiap. 36 Le nookoot nga ye kene yo sul tani in ikenen yang go nga, ngan katara lomim medana pang sul tani a be nen ngan kayei ben sul di natunu.” Yesu iwetewete pang di tooltool tina nen a imot, motong la iyege di sila tiyepe, inbe itarkoolene ye di a ipa a ila.

37 Yesu iyei kaiye mos alunu a iyei ben tarkilanga panga be di tooltool tikamata, bong titara lodi medana panga pitiap yege. 38 Ngan iyei nen nga, ngan le lo iyei betanga ke Maro koonoo yo Esai in iwodo nga, le itar kanono moolmool. Ngan Esai tani in iwete nen,

39 Ngan ye punu yo titara lodi medana pang Yesu ye tiap in nen, yesoo Esai iwodo betanga san mulu in iwete nen,

42 Ye kene tani in di tooltool yo titara lodi medana pang Yesu nga, ngan kapala ngan di kuto maimai lapau. Bong titattadai di Paresi, le lodi be tipapos lo medana kidi tina ngan ila mallangana tiap, yesoo ole nen ngan di Paresi tigunkala di le ke be tilo rumu kidi Yuda ke gaongo in lono lo tiye di tigaua mulu tiap. 43 Ngan di Paresi tina ngan lodi pang dada yo be di tooltool tiyitmak edi ye, in mai san, bong lodi pang dada yo Maro be iyitmak edi ye, in tiap.

44 Motong la Yesu iwete le maimai nen, “Sei tool be itara lono medana pau nga, ngan ya in itara lono medana pau leu tiap, bong itara lono medana pang Tamak yo iwangau a asi i, in lapau. 45 Inbe sei tool yo ikamatau i, in ikamata Tamak yo iwangau a asi i. 46 Ngan au i asi ye tana i nga, ngan dawa ben sul, a be nen ngan di sema tooltool be titara lodi medana pau nga, ngan o ke be tiyepe ye ni todo lono mulu tiap. 47 Le kumata sei be ilongo betanga kiau le itoo tiap nga, ngan au tauk i o apaposi ye urata dook tiap ki yo iyeii i, a be nen ngan Maro iyemenaii ye, ngan tiap. Yesoo, au i asi nga be si apapos di tooltool ke tana ye urata dook tiap kidi yo tiyei nga tiap, bong asi nga be si ikap di a apamulu di ye so dook tiap yo be igarung di i. 48 Bong sei tool be ikap betanga kiau a iparama tiap, inbe iwala murini pau nga, ngan betanga kiau tina yo awete nga, ngan ole ipaposi ye urata dook tiap ki yo iyeii i, a be nen ngan Maro iyemenai ye lal yo itaru be ikarata betanga kidi tooltool ye i. 49 Ngan au i awete sokorai betanga nga ye au tauk lok tiap, bong Tamak yo iwangau a asi i, in ya la ikap betanga nga pau be awete, inbe iwete nin dada yo be awetewete ye i. 50 Le lok galanga nen, betanga ke Tamak nga, ngan ke be ikaua yepongo dook mata yo taukan motingi i, in pang di tooltool. Ngan nen le betanga tina le imot yo awete nga, ngan atoo Tamak koonoo ye betanga yo iwete pau be awete nga.”