1-2 Ngan tool atu yo ene Lasarus i, in matamatenge mai i kauu. Ya in iye di lini ru nga Mata iye Madia, ngan tiyepe ye malala yo ene Betani i. Ngan Lasarus lini yo Madia i, in garup tani yo be iti so ke saliningi yo kini ki dook mata i, in ilo Tool Mai kene pono, inbe imusmus ye ya taunu kutono raunu i. 3 Le nga di lini tina ngan tiwanga pang Yesu nen, “Tool Mai, tool tani yo lom panga mai san i, in la matamatenge mai ikauu i.”

4 Ye kene yo Yesu ilongo bangana kidi ye in nga, ngan le iwete nen, “Matamatenge ni ke be iyeie tool ni a imata le ipa so, ngan tiap. Bong be nen a nen ngan di tooltool tikamata gurana mai ke Maro. Le in dada yo be iyeie Maro Natunu ene le ilo ete ke be di tooltool tipayiti ye i.” 5 Ngan Yesu in lono pang Mata iye toonoo inbe Lasarus mai san, 6 bong ye kene yo ilongo betanga be Lasarus in matamatenge mai ikauu nga, ngan le ila tarai tiap. Iyepe ye ke ru mulu ye malala tani yo iyepe ye i.

7 Le nga ke ru tina ngan imot, motong la iwete pang di galiunu nen, “Ai, nga ole tamulu a tala pang tana mai Yudia mulu.”

8 Bong ngan di galiunu tina ngan tiwete panga nen, “Pannoongoo, nookoot sa airi ngan di Yuda tikap malmal pong a tikapye be tikatmatong ye pat nga. E nga yelei a be kumulu a kula pang ni nga?”

9 Motong la Yesu iyei ne, “Nga yelei, manga yo ke be ipa ye muntu le du rrai, ngan sangaul be ru, too? Ngan nen le kumata tool be ipa kemai nga, ngan o ke be itutu tiap, yesoo ke isini le ikamata ni ye. 10 Bong kumata tool be ipa bong nga, ngan ole itutu, yesoo taukan sul yo be ikamata ni ye i.”

11 Yesu iwete pang di nen a imot, motong la iwete pang di mulu nen, “Tool kiidi Lasarus ni ngo iken mata. Bong ole ala, a la apoongoo a imadit.”

12 Motong la di galiunu tiwete nen, “Tool Mai, kumata le be iken mata nga, ngan ole matamatenge ki imot, le tinini dook mata mulu.” 13 Ngan Yesu in iwetewete ye matenge ke Lasarus, bong di galiunu ngan lodi galanga tiap. Tiyeisa o Yesu iwete be Lasarus nga o iken mata moolmool.

14 Motong la Yesu iwete pobe pang di nen, “Lasarus imata oo, 15 bong au i lok ponana yo ala nango tarai tiap nga, a be nen ngan kakamata soo so yo be ayeii panga in nga, ngan ole katara lomim medana pau ye. Oo, kamadit a tala pang ye la takamata.”

16 Yesu iwete nen a imot, motong la Tomas yo tiwete ene san ye Didimus i, in iwete pang Yesu di galiunu kapala ngan nen. Iyei ne, “Ai, be nen ngan idi lapau tamadit a taye Yesu tala, a nen ngan la tiraumatidi taye a tammata.”

17 Ye kene yo Yesu iye di galiunu tina ngan tipa le la pombe potai pang ye malala Betani ye in nga, ngan Yesu ilongo betanga ben Lasarus bobono in titaru lo agoro lono ke di matenge a iken ye ke pai oo. 18 Ngan Betani tani in iken potai pang Yerusalem le manga mooloo tiap.* Manga yo iken kataunu ye malala Betani inbe Yerusalem i, in mooloo tiap ben kilomita tol leu. 19 Le nga di Yuda alunu la timan pang ye Mata iye Madia be man tilon di a be nen ngan lodi modoko ye lidi yo imata i, in be.

20 Ngan ye kene tani yo Mata ilongo betanga ben Yesu la ipa dada i, motong la iyege Madia sila iyepe rumu, inbe ipakala a ila le la itauaraii dada. 21 Motong la iwete panga nen, “Tool Mai, nga yo be kuyepe ni nga, ngan matin nga le lik imata tiap. 22 Bong nookoot nga lapau, au i lok galanga nen, kumata be kutoro Maro ye so sa nga, ngan ole ikauu pong.”

23 Mata iwete nen, le nga Yesu iyei ne, “Lim ni ole imadit mulu le imaur.”

24 Motong la Mata iwete panga nen, “Au i lok galanga nen, ole imadit mulu ye lal yo Maro itaru be ikarata betanga kidi tooltool ye i. Yesoo, ye lal tani ngan ole Maro ipamadit di tooltool matedi a timadit mulu le imot.”

25 Mata iwete nen, le nga Yesu iwete panga. Iyei ne, “Au tauk i la apamadit di tooltool mulu ye ni ke matenge i, inbe akaua yepongo dook mata pang di i. Ngan nen le sei tool be itara lono medana pau inbe imata nga, ngan ole imata le ipa so tiap, bong ole imadit mulu a iyepe ye yepongo dook mata tani in. 26 Inbe di sema tooltool yo timaurur go, inbe titara lodi medana pau nga, ngan o ke be timmata le tipa so tiap. Ngan ong i kutara lom medana ye betanga kiau nga, too tiap?”

27 Motong la Mata iwete panga nen, “E, Tool Mai, au i atara lok medana yong ben ong i Kirisi. Ong i Maro Natunu yo be iwanga a isi tana i.”

28 Mata iwete nen a imot, motong la imulu a ila koonoo pang toonoo Madia a man imangunngun panga. Iyei ne, “Pannoongoo tani in iman oo, le nga itor yong.” 29 Ye kene yo Madia ilongo betanga nen nga, ngan le palbe leu be imadit a ila pang ye Yesu. 30 Ngan Yesu ilo pombe malala tiao, bong iyepe ye ni tani yo Mata la itauaraii ye i. 31 Le nga di Yuda yo tiye Madia tiyepe rumu lono a be tiloni a lono iken dook nga, ngan tikamata tina yo palbe leu be imadit a idu pang tana nga, le nga titoo a tidu. Ngan tiyeisa be idu a ila pang ye agoro ke di matenge yo titara Lasarus bobono ye i, a nen ngan la itang ye nango.

32 Madia imale a ila pombe ye ni tani yo Yesu iyepe ye i, le nga ikamata, motong la igun turunu du Yesu kene punu ke dama, inbe iwete panga. Iyei ne, “Tool Mai, nga yo be kuyepe ni nga, ngan matin nga le lik imata tiap.”

33 Ngan Yesu ikamata tina yo itang, inbe di Yuda yo titoo a tiye timan nga, ngan titang lapau nga, le nga Yesu lono gurrungu inbe katen pas. 34 Motong la itor di nen, “Ni nangai kataru ye i?”

Motong la tiwete panga nen, “Tool Mai, kuman man kumata.”

35 Yesu la ikamata le nga itang.

36 Ngan di Yuda tikamata tina yo itang nga, le nga tiyei ne, “Kakamata nga, ya ni lono pang tool ni mai san.”

37 Bong ngan di diedi kapala tiyei ne, “Ya ni ikarata tool yo matan kis in le matan rere mulu, e nga yelei a lono be ilono tool ni a nen ngan imata be, tiap nga?”

38 Yesu ipa le la pombe ye agoro tani yo titara Lasarus bobono ye i, le nga lono dook tiap, inbe katen pas mulu. Ngan agoro tani in iken ke kawal madini. Inbe pat somai atu la titapulu la tikatkala agoro koonoo ye i. 39 Motong la iwete pang di nen, “Oo, kapulu pat in a ikoo.”

Ngan tool tani imata in lini yo Mata i, in iwete panga nen, “Tool Mai, nookoot nga o ikini a dook tiap oo, yesoo imata a iken ye ke pai oo.”

40 Motong la Yesu iwete panga nen, “Muku ngan awete pong be kutara lom medana pau, ngan ole kumata gurana mai ke Maro.”

41 Yesu iwete nen, le nga tipulu pat tani yo tikatkala agoro koonoo ye i. Motong la itada pang ete, inbe iyei ne, “Tamak, au i lok ponana pong yo kulongo pataraungu kiau nga. 42 Au i lok galanga, ong in kanakana ngan kulongo kook. Bong lok ye di tooltool yo tikododo ni nga, ngan la le awete nen, a be nen ngan titara lodi medana nen, be ong in la kuwangau a asi i.”

43 Yesu iwete nen a imot, motong la koonoo le mai nen, “Lasarus, kupas a kusi tana!” 44 Yesu koonoo nen, motong la Lasarus tani imadit a ipas a isi tana. Ngan le ipa ye wam tina yo tipiu kene le baene le damono ye nga. Motong la Yesu iyei ne, “Kagoolook wam ngan ye, inbe kawete panga a ila.”

45 Di Yuda tina yo timan be man matadi so Madia nga, ngan tikamata so yo Yesu iyeii i, le nga di alunu la titara lodi medana panga nga. 46 Bong di kapala ngan tila pang ye di Paresi la tiwete pang di ye so tani yo Yesu iyeii i. 47 Motong la di tooltool maimai ke paroranga so pang Maro tiye di Paresi tikiu di tooltool kuto maimai kidi Yuda yo matadi kala di ye momo le yepongo kidi nga, ngan man tigaua, inbe tiwete pang di. Tiyei ne, “Ai, nga ole tayei belei? Tool ni iyei gogo mos matana matana alunu san a iyei ben tarkilanga panga oo. 48 Kumata le tapatauu be iyei nen nga, ngan ole di tooltool le imot titara lodi medana panga. Lo ngan di Rom ole timan man tigarung di tooltool kiidi tipa ye bareme mai kiidi yo ke sungunu i.”

49 Motong la edi atu yo ene Kepas i, in iyei tool mai ke paroranga so pang Maro ye rai tani in, in iwete pang di nen, “Ang nga lomim galanga ye so siap yege! 50 Ang nga lomim galanga ye dada atu yo be ilonang, in lapau? Dada dook mata in nen: Kumata be tool atu ikol di tooltool kiidi a imata nga, ngan ole di tooltool kiidi le imot sa tilledi tiap.”

51 Kepas iwete betanga nen ye ya taunu lono tiap, bong iyei tool kuto mai ke paroranga so pang Maro ye rai tani in, ngan la le iwete betanga ben di Maro koonoo ye Yesu yo be imata a nen ngan ilon di Yuda i. 52 Ngan imata nga, ngan be ilon di Yuda leu tiap, bong be igaua Maro di natunu le imot yo timagirigiri a tiyepe nin la nin nga, a be nen ngan man tigaua ye budanga atu. 53 Le nga ye ke tani in a ilo nga, ngan di tooltool maimai kidi Yuda tigaua a tirau betanga, inbe tisere dada yo be tiraua Yesu ye a imata i.

54 Ngan nen le Yesu ipa mallangana mulu la di Yuda matadi tiap, bong iyege ni tani in, inbe ila iyepe ye ni atu yo iken potai pang ye ni sorrakene i. Ila pombe, motong la iye di galiunu sila tiyepe ye malala atu ke ni tani yo ene Epraim i.

55 Ye kene tani in lal maiyoko kidi Yuda yo be lodi tut ye Paskimoolooningi ke Maro i, in potai be pombe. Le nga di Yuda yo tiyepe ye malala kapala nga, ngan alunu tilo pang Yerusalem be lo titoo momo kidi Yuda a di tapdi tiyei di le tinidi galanga ye Maro matana muku ngan, lo ngan be lal ke Paskimoolooningi tani in pombe. 56 Tilo, motong la matadi saraia Yesu, ngan tikamata tiap. Le nga tilo tikodo koongoo lono ke bareme mai ke sungunu, inbe di tapdi tipartortor. Tiyei ne, “Ai, nga lomim tar belei? Ole ise ye lal maiyoko ke sungunu i lapau, too tiap?” 57 Bong di tooltool maimai ke paroranga so pang Maro tiye di Paresi tikap betanga pang di tooltool nen, kumata le sei tool lon galanga ye Yesu be iyepe ngai nga, ngan be iwete pang di a be nen ngan tikauu a tiparama.