1 Motong la alongo tool atu koonoo le kalngana mai ipa ke bareme mai ke sungunu yo iken ye malala ke Maro in a isi. Inbe iwete pang di bangabangana ke Maro tina yo limi be ru nga, ngan nen, “Ai, kala la kapati kate malmal ke Maro yo iken ye omai kiang tina yo limi be ru nga, ngan a idu pang tana.” 2 Motong la bangabangana ke Maro yo imuku i, in ila la ipati omai ki in a idu pang tana pono. Ngan le botoboto medana yo masngana ki dook tiap in pombe pang ye di tooltool yo tarkilanga ke asara gok tani in iken ye tinidi inbe tisung pang kai padodo ki nga.

3 Motong la bangabangana ke Maro yo ru ki i, in ila la ipati omai ki in a idu tiek pono. Ngan le tiek iportak le iyei ben rara ke tool matene. Nen le so le imot yo iken tiek lono nga, ngan timmata lapau.

4 Motong la bangabangana ke Maro yo tol ki i, in ila la ipati omai ki in a idu ye ran maimai inbe ye ran yo gumono nga, ngan lono. Ngan le ran tina ngan tiportak le tiyei ben rara. 5 Motong la alongo bangabangana ke Maro yo matan kala ran tina in iwete nen,

7 Ngan bangabangana tani in iwete nen a imot, motong la alongo tool koonoo ye ni yo kookoowoo ke paroranga so iken ye i, in iwete nen. Iyei ne,

8 Motong la bangabangana ke Maro yo pai ki i, in ila la ipati omai ki in a ilo ke pono. Ngan le ke tani in ikaua gurana mai ke be isini ngan le isini katkat a be nen ngan iyes ben ei a ikan di tooltool. 9 Ngan tina ke tani in iyes mata nen nga, le iyesnai di tooltool tina a igarung di le dook tiap yege. Bong lodi be tiportak lodi, inbe tiyeie Maro ene le ilo ete ke be di tooltool tipayiti, ngan tiap. Bong timadit tina le tigarungu Maro yo gurana ki mai ke be iwete ngan so dook tiap tina yo nen ngan pombe i, in ene ye betanga dook tiap.

10 Motong la bangabangana ke Maro yo limi ki i, in ila la ipati omai ki in a idu kookoowoo ke burungu ke asara gok dook tiap tani in pono. Ngan le ni mai le imot yo asara gok dook tiap tani in matan kala i, in todo iduku le imot. Nen le di tooltool ki tikanamaia masngana mai le tina tikanen medi, 11 inbe tigarungu Maro yo iyepe ete i, in ene ye betanga dook tiap, yesoo ye masngana tani in, inbe ye botoboto medana yo pombe pang ye di nga. Bong ngan lodi be tiportak lodi a tiwala muridi pang dada dook tiap kidi yo tiyei nga, ngan tiap.

12 Motong la bangabangana ke Maro yo limi be atu ki i, in ila la ipati omai ki in a idu ran somai yo ene Yupritis in lono. Ngan le ran tani in imaka le imot a be nen ngan ikarata dada pang di kuto maimai tiye di tooltool kidi ke patokongo be tipa ye a timan nga. Di kuto maimai tina ngan matadi kala tana maimai kapala yo iken ye ni yo ke ipa ye a ise i. 13 Motong la akamata di so sadi yo ke yeingi noonoo ngan tol pombe, bong di ngan dawa ben kuwer. Ngan atu in ipas ye moto koonoo, inbe san in ipas ye asara gok yo dook tiap in koonoo, inbe san in ipas ye tool yo iwete ngan ran ki kaplungunu ye betanga i, in koonoo lapau. 14 Di kuwer tol tina, ngan di so sadi yo tinidi giri leu ye Maro matana nga. Di tol ngan ke be tiyei gogo mos matana matana a pompombe. Inbe di ngan tipa a tila ye di kuto maimai yo matadi kala tana maimai le imot nga, ngan a tiso lodo. Di ngan tiyei nen a be nen ngan di kuto maimai tina, ngan ole tigaua di tooltool kidi ke patokongo, a be nen ngan tinama lal maiyoko ke Maro in be pombe nga, ngan tila la tiye tipatoko. Ngan lal maiyoko tani in lal yo be Maro, yo gurana ki mai san le illos gurana ke so nga le imot i, in itaru be ikarata betanga kidi tooltool ye dada dook tiap kidi tina yo tiyei nga.

15 Bong Tool Mai iwete nen, “Kapalongo. Au i ole amala pang yang dawa ben tool ke pinnau yo iyei urata ki sollono i, le ke be lomim galanga ye lal yo be amala pang yang ye in tiap. Ngan nen le sei tool be matan rere inbe itar lonloningi le so ki potai ye nga, ngan ole lon ponana, yesoo Maro ole iyei urata dook mata panga. Nen le tool tani in o ke be ipa tinini koonoo ye di tooltool matadi tiap, inbe di tooltool ole tikamata tinini a be nen ngan moomoonoo ye, ngan tiap lapau.”

16 Motong la di so sadi tol tina ngan tigaua di kuto maimai tina yo matadi kala tana maimai nga, ngan ye ni atu. Ngan ni tani in tiwete ene ye di Ibru koodi nga, ngan ene la Amagedon i.

17 Ngan so tina ngan imot, motong la bangabangana ke Maro yo limi be ru ki i, in ila la ipati omai ki in a ilo pang lang katene. Ngan le alongo tool kalngana ipa ke bareme mai ke sungunu in lono a isi ye kookoowoo ke burungu ke tool kuto mai in nen. Iyei ne, “So tina ngan imot oo.” 18 Motong la kili itai le nunngana ila be iman, inbe looloo itara le rutunu ipa ye ni mai i le imot, inbe nauningi maiyoko itak lapau. Ngan nauningi maiyoko yo nen nga, ngan sa pombe muku pang ye di tooltool yo tiyepe ye tana i, ngan tiap. 19 Ngan tina yo nauningi tani in itak nen nga, le malala mai Babilon in tana ki perbe le iyei patol, inbe rumu ke di tooltool ke malala maimai yo kapala nga, ngan iduku a idu tana lapau. Ngan Maro lon tut ye dada dook tiap ke di tooltool yo tiyepe ye malala mai Babilon nga, le ipati kate malmal mai ki idu ye malala tani in dawa ben be tati wain surunu ilo ye ruku nga. 20 Nen le motmot le imot tiyege nedi a tikoo, inbe kawal tina nga le imot, ngan tiduku le ke be di tooltool tikamata di mulu tiap. 21 Inbe ki somai imol ke lang katene a isi ngan le si irau di tooltool. Ngan ki tani in patunu imede dawa ben madamada, bong somaimai* Ngan ki patunu tina ngan atu atu ngan moongoo ki ben 50 kilogram. le igarung di tooltool tina le dook tiap yege. Nen le di tooltool tina ngan tigarungu Maro ye betanga dook tiap, yesoo ye yo iwanga urata moonoo masngana dook tiap in a isi igarung di nga.