1 Ye kene tani in di tooltool malala mai timan tigaua mulu a tiyepe le le kaningi kidi imot, motong la Yesu ikiu di galiunu a timan pang ye man iwete pang di nen, 2 “Au i lok pang di tooltool nga san, yesoo timan a man taye di tayepe nanga ye ke tol oo, le nookoot nga taukadi so yo be tikani i. 3 Kumata be atar di a tipa ye pitolo kidi a tila pang rumu kidi nga, ngan ole matadi taltalai a timol dada, yesoo di tooltool tina ngan kapala tipa ke ni mooloo san la le timan ni nga.”

4 Motong la di galiunu tiraua betanga ki nen, “Ona, idi nga tayepe ye ni balim koonoo sa! Ole takap porong ngai be tapakan di tooltool malala mai nga ye i?”

5 Motong la Yesu itor di nen, “Porong kiang ngan dukumu pi?”

Ngan di galiunu tina tiyei ne, “Porong kiam nga dukumu limi be ru.”

6 Motong la Yesu iwete pang di tooltool malala mai tina be du tiwur tana. Inbe ikap porong tina yo limi be ru nga, a iwete lo ponana ki pang Maro ye. Motong la itepalapala, inbe ikap pang di galiunu be la timalimi di tooltool tina ye. Ngan le di galiunu tina ngan tiyei ben yo iwete pang di nga. 7 Inbe di ngan i kidi paranga pattu lapau, le nga tikap pang Yesu a iwete lo ponana ki pang Maro ye. Motong la iwete pang di galiunu be la timalimi di tooltool tina ngan ye. 8 Ngan le di tooltool tina ngan tikan le kapodi sung dook mata. Motong la Yesu di galiunu tiwinoko kaningi naunu naunu tina yo iken, ngan a tipadid ye karei limi be ru le lo ipon. 9 Ngan di tooltool tina yo tigaua a tikan so nga, ngan kinkatingi kidi ben 4,000. Le nga tikan so a imot, motong la Yesu itar di a timulumulu a tila. 10 Motong la palbe leu be iye di galiunu tiyiri ye ookoo kidi, inbe tikooi a tisiut a tila pang tana mai Dalmanuta nga.

11 Tila pombe Dalmanuta a tiyepe, motong la di Paresi pattu timan a man tiye Yesu tiwetewete a tiparsu ye betanga. Ngan lodi be titoua, le nga titoru be iyeie mos sa a iyei tarkilanga panga ben Maro yo iyepe ye malala ki ete ni, in la iwanga a isi i. 12 Bong ngan Yesu lon moo mai san ye di. Le nga iyei ne, “Nga yelei be ang tooltool yo ke nookoot nga kator be kakamata mos sa a iyei tarkilanga pau nga? Awete pang moolmool nen, au i o ke be apatnaia tarkilanga sa a kakamata, ngan tiap.” 13 Motong la iyege di tooltool tina ngan sila tiyepe, inbe iye di galiunu timulu a du tiyiri lo ookoo pono, motong la tipie a tila pang ran koonoo kapala nga.

14 Yesu di galiunu lodi kalli le mala be tikap touo porong dukumu sa mulu tiap, bong dukumu ataleu la tikauu a idu ookoo pono i. 15 Motong la Yesu ikap noonoongoo pang di nen, “Kin kakap tutang, inbe kakawai yang dook leu ye yis kidi Paresi tiye Erot.” 16 Ye kene yo di galiunu tilongo Yesu iwetewete ye so mitiap tani yo ilo ye porong ngan iyeii a isung le imot in nga, ngan di tapdi tiwetewete a tiyei ne, “Iwete nen nga, yesoo ye yo lod kalli le takap touo porong siap nga.”

17 Bong ngan Yesu lon galanga ye so yo tiwetewete ye ngan oo, le nga itor di. Iyei ne, “Ai, nga yelei be ang tapmim kawetewete ye yo kakap touo porong siap nga? Ang nga kakamata so yo ayei nga, e lomim galanga yau tiao, too? Ang nga o kutomim mede dawa ben pat, too? 18 Ang nga matamim, bong nga yelei a kakamata so sa ye tiap nga? Inbe ang nga talngamim, bong nga yelei a kalongo betanga ye tiap nga? Ang nga o lomim tut pitiap yege, too? 19 Oo, ye kene yo atepalapala porong dukumu limi pang di tooltool 5,000 ye in nga, ngan le kapadid karei pi ye porong naunu naunu tina le lo ipon nga?”

Ngan di galiunu tina ngan tiyei ne, “Karei sangaul be ru.”

20 Motong la itor di mulu nen, “Inbe ye kene yo atepalapala porong dukumu limi be ru pang di tooltool 4,000 ye in nga, ngan le kapadid karei pi ye porong naunu naunu tina le lo ipon nga?”

Ngan tiyei ne, “Karei limi be ru.”

21 Motong la Yesu iwete pang di nen, “Ngan nga yelei a le lomim galanga pitiao nga?”

22 Yesu iye di galiunu tina ngan tila pombe Betsaida, motong la di tooltool pattu tikaua tool atu yo matan kis in a timan pang ye Yesu. Timan, motong la tiwete panga, inbe timangmang ye be itara baene lo ye tool tani a be nen ngan matana dook mata. 23 Le nga Yesu itoko tool tani yo matan kis in baene, inbe idede a yaru tidu ke diki ke malala tani in. Motong la ikoronai ngoonoo ilo ye tool tani in matana, inbe itara baene lo pono. Inbe itoru nen, “Kumata so sa lapau, too?”

24 Ngan tool tani in matana pang ete, inbe iwete nen, “E, akamata di tooltool tipa, bong igalanga tiap, dawa ben kai ila be iman nga.”

25 Tina iwete nen nga, le Yesu itara baene mulu lo ye tool tani in matana. Ngan le matana irere le dook mata, inbe ikamata so le imot iken mallangana. 26 Motong la Yesu iwete panga nen, “Kin kupa le kulo malala lono be, bong kupa so le kudi rumu kiong.”

27 Yesu iye di galiunu titoo dada a tilo pang ye malala kapala yo iken potai pang ye malala mai Sisaria Pilipai i. Ngan tipa dada go, inbe itor di galiunu tina nen, “Ai, di tooltool tiwete be au i sei?”

28 Ngan tiyei ne, “Di tooltool kapala tiwete be ong in Yowan yo irriu di tooltool i, inbe kapala ngan tiwete be ong in Ilia. Inbe di tooltool kapala ngan tiwete be ong in Maro koonoo atu yo ke mukot nga.”

29 Motong la Yesu itor di mulu nen, “Ngan ang nga, kawete be au i sei?”

Ngan Pita iraua betanga ki nen, “Ong in Kirisi, tool yo Maro ipootoo be si ipamulu di tooltool ki ye so dook tiap yo be igarung di i.”

30 Motong la Yesu iso lodi be kin tiwete nini pang tool sa be.

31 Motong la Yesu imadit a ipatomonai di galiunu tina nen, “Tool Moolmool Ke Maro ole isolo moonoo le masngana alunu kaiye. Inbe di tooltool maimai kidi Yuda tiye di tooltool maimai ke paroranga so pang Maro, inbe di pannoongoo ke ger ke Maro ole tiwala muridi panga inbe tiraumate le imata. Bong ole iken ye ke ru, lo ngan be ye tol ki ngan ole imadit mulu ye ni ke matenge.” 32 Yesu iwete pang di a ipagalanga lodi ye betanga i, motong la Pita ikauu a yaru leu tila manga mooloo kasin, inbe ipasak panga a be ilele ye betanga yo iweta i. 33 Bong Yesu ilalele a matana pang ye di galiunu kapala, inbe ipasak pang Pita. Iyei ne, “Satan, kukoo yau a kudu ke murik. Betanga yo kuwete nga, ngan kutoo Maro lono tiap, bong kutoo di tooltool ke tana lodi.”

34 Motong la ikiu di tooltool malala mai tina ngan tiye di galiunu man tigaua, inbe iwete pang di nen, “Kumata tool atu lono be man itoo au nga, ngan ya taunu irautoo le du iyepe lopo, inbe ikooroo kai palasingi ki a itoo au. 35 Yesoo, sei tool yo lono mai san ye yepongo ki ke tana i mai mata a iparama i, in ole ilene. Bong sei tool yo lono mai san ye yepongo ki ke tana i tiap, inbe iraia tinini le imot pau be iyei urata ke bingi dook mata kiau i, in ole ikaua yepongo dook mata yo taukan motingi i. 36 Inbe kumata tool atu be iyau balingi matana matana le imot ke tana i panga, lo ngan be imata a ila nga, ngan ole balingi tina ngan iloni belei? 37 Too, soo so dook mata ke be tool sa ikauu pang Maro a be nen ngan iraukolo yepongo ki yo ilene in ye i? So siap! 38 Di tooltool yo nookoot tiyepe nga, ngan tikapsap ye dada yo dook tiap nga, inbe tiwala muridi pau a tiyei dawa ben garup yo idada nintooroo la iyei bauk i. Ngan la kumata tool atu be moomoonoo yau, inbe ye betanga kiau le ipataukala ye di tooltool tina ngan matadi nga, ngan ye kene yo be Tool Moolmool ke Maro imulu a isi ye i, in ole moomoonoo ye tool tani lapau. Ya in ole iye di bangabangana ke Maro yo ipootoo di panga ya taunu nga, ngan tisi inbe ole ipatnaia Tamana nunngana yo maiyoko in mallangana a di tooltool tikamata, bong ye kene tani ole moomoonoo ye di tooltool yo muku ngan moomoodi ye nga.”